Mahsen ong Misineri me Pweipweiek

Lepin koasoai ehu me I keieu pereniki kohsang rehn St. Francis sang Assisi nda, “kalohk rongamwahuo ansou koaros oh ma ke anahne, eri doadoangki lokaia.”¹Uhdahn mehlel dahme lepin mahsen pwoatet kasalehda me pali laud en ahnsou padahk me keieu kaselel sohte kin sansalda ni lokaia.

Ni ansou me kitail kin mehlel oh momouriki atail koasoandi kan, aramas kin tehkada. Ni ahnsou me kitail direkihla popohl oh peren, uhdahn re pahn ahpwete tehkada.

Aramas koaros kin men peren. Ni ahnsou me kitail tohn Mwomwohdiso wet kin direkihla marain en rongamwahuo, aramas kak kilang atail peren oh pil kehn limpoak en Koht me aude oh kadirehla atail mour. Re men ese ia kahrepe. Re men wehwehkihla dah me elehda.

Met kin elehiong irail en ahniki peidek kan me duwehte “dahme ke kin nohn pereniki?” de “Dahme kahrehiong omw kin ansou koaros ahniki lamalam me ke kak ?” Pasapengpen peidek pwukat, ni mehlel, pahn kaweid kitail en koasoaiahda rongamwahu kopwurupwurdohu en Sises Krais.

Koasoaiahda pelien lamalam—ni mehlel ong kompoakapahtail kan oh atail peneinei—kak mwomwen kamasepwehk oh apwal. Ahpw e sohte anahne duwe met. Koasoaiahda irair kan me pid pali ngehn me kitail pein lelohng de kosokosoia kemwekid kan en Mwomwohdiso nan koasoaipene en ehuehu rahn kak en mengei oh kaperen ma kitail pahn ekiste soupeikasal oh doadoahngki moangatail.

Ahi pwoud, Harriet, kin wia karasaras mwahu en met. Ni ahnsou me se kin mihmi Germany, e kin diarada wiepen kihda oaralap kan me pid Mwomwohdiso nan ah kin koasoaieng kompoakapah kan oh aramas teikan me e kin ese. Ni karasaras, ni ahnsou me emen kin idek dahme e wia ni wihkendo, e kin nda, “Rahn Sarawie, irair me se ahniki nihmwen sarawio inenen kaselel! Mwahnakapw men sounpar eisek-weneu kihda padahk kaselel ehu me pid mour mwakelekel mwohn aramas riepwiki me kin towe De, “I esehda duwen emen lih sounpar duweisek me dehkada pilangkes tohtohsang limepwiki oh kihong pelien sawas en aht Mwomwohdiso pwehn pekederlahng aramas me paisuwed nan sampah.”

Pali laud en ahnsou, irail me rong duwen met kin men ahpwete rong. Irail kin kihda peidek. Oh met kin elehiong ansou mwahu en koasoaia rongamwahuo ni wiepe me mengei, soupeikasal, oh sohte mwomwen idihd.

Rahn pwukat mie Internet oh soahng kan me duwehte facebook ape, eri e mengeisang rahn teio en koasoaiong aramas duwen mepwukat ni wiepe duwehte koasoakoasoaipene. Kitail anahnehte en soupeikasal pwehn wia met.

Ahpw me suwed, e inenen mengei en kin akupwung. Kitail kin nohn kalapw akamai, kawe, oh karaunih aramas. Ni ahnsou me kitail kin lingeringerda, mwomwsuwed, de kansensuwedih aramas, irail sohte douluhl pahn men esehla duwen kitail. Kitail sohte kak ese ia uwen tohtohn aramas me kohkohsang Mwomwohdiso de sohte towehla pwehki aramas ndaiong irail mehkot me kansensuwedih de kalingeringerih irail.

Dir en mwomwsuwed nan sampah rahn wet. Pwehki atail kak sehse ihs me nda mehkot nan Internet, e mengei ong aramas en nda mehkot me suwed de kelingeringer. E sou konehng kitail, tohnpadahk kan en atail Krais kadeko, en ahniki koasoandi en limpoak me ahpwete ileile? Pwuhk sarawi kan padahngki, “Amwail koasoi mwohn aramas en katapan oh kansenamwahu; oh kumwail uhdahn pahn ese duwen amwail pahn sapeng koaros ni pwung.” (Kolose 4:6).

I mwahuki madamadau me atail lokaia en dehde duwete mesen lahng me marainiki ketipin oh direki kalahngan. Kumwail kak medewe ia pahn duwen atail peneinei kan, ward kan, wehi kan, oh lella sampah ma kitail pahn doadoangki padahk mengei wet?

Ekei pak kitail kin kak medewehda me pein kitail me kahrehda aramas emen eh alehda de sohte alehda rongamwahuo. E kesempwal en tamataman me Kauno sohte kasik me kitail me pahn kawiliakapwala aramas ong rongamwahuo.

Weliakapw kin pweida kaidehn sang ni atail lokaia ahpw sang ni epwel en nanleng sang Ngehn Sarawi. Ekei ahnsou ehute lepin koasoai en atail kadehde de me pid irair me kitail lelohng kin kak kamwuterekiala mohngiong de ritingada wenihmw ehu nan kapehd en aramas oh elehiong irail en kehn dahme mehlel sang ni kaweid en Ngehn Sarawi.

President Brigham Young (1801–77) mahsanih me e esehda me rongamwahuo mehlel ni ahnsou me e “kilangada ohl emen me samai en lokaia, soakoahiek en kapahrek, me ihte me e kak nda, ‘I ese, sang ni manaman en Ngehn Sarawi, me Pwuhk en Mormon mehlel, me Joseph Smith iei soukohp en Koht.’” President Young mahsanih me ni ahnsouohte me e rongada kadehde karakarahko, “Ngehn Sarawi me pwilido sang rehn aramaso kamarainiada ahi wehwe, oh marain, kilohri, oh mour poatoapoat pwarada mwohi.”²

Riei ohl oh lih kan, kin ahniki pwoson. Kauno kak ketin kalaudehla amwail koasoai oh wiahda irail en kehlail. Koht sohte kin ketin peki kitail en kawiliakapwiala aramas ahpw kitail en kihpeseng ewetail kan. Doadoahk en kawiliakapwiala aramas kaidehn amwail—ahpw ahn aramaso me rong oh ahn Ngehn Sarawi.

Kompoakapahi kan, rahn pwukat ahpwete tohto wiepe me kitail kak kihpeseng ewetail kan oh ehukihong mehteikan rohng kaperen en rongamwahu en Sises Krais. Uhdahn e kak wiawi me kitail koaruhsiehn, lel misinerio me namenek, kak iang doadoahk lap wet.Mie wiepe me koaruhsiehn—lella misineri me ekis pweipweiek—kak towehda doadoahk lap wet. Emenemen kitail kak diarada ia mwomwen atail kak doadoahngki pein atail koahiek kan oh me kitail kin pereniki pwehn sewesehda doadoahk lap wet en audehkihla sampah marain oh mehlel. Ni atail pahn wia met, kitail pahn diar popohl me kin kohdohng irail kan me kin loaloapwoat oh soupeikasal itar en “uh ni duwen sounkadehde kan en Koht ni ahnsou koaros” (Mosiah 18:9).