Faaite i te hoê hoa

I te hoê mahana, te tuatapapa ra vau i ta’u haapiiraa evanelia (séminaire) e ua tae mai te hoê mana‘o nehenehe e te papû. I to’u tai‘oraa i ta’u haapiiraa no te mahana muri mai, ua puta mai te hoho‘a o te hoê hoa i te fare haapiiraa e ua puai roa to’u mana‘o e faaite ia’na i to’u iteraa papû.

Noa’tu râ te papû o teie mana‘o, ua măta‘u rii au. Ua feruri noa vau e, penei a‘e e pato‘i mai to’u hoa ia’u, i te mea ho‘i e, e ere oia i te huru tamahine anaanatae no te tomo mai i roto i te Ekalesia.

 Ua haamana‘o atura vau i te a‘oraa a te tuahine Mary N. Cook no te peresideniraa rahi no te Feia Apî Tamahine, te faaitoito ra oia ia matou ia ohipa puai e ia vai itoito.¹ Ua hinaaro mau vau ia pee i te reira, no reira ua papa‘i au i te tahi rata i teie tamahine ma te faaite papû i te parau mau o te Ekalesia e i to’u here no te Buka a Moromona. I te mahana i muri iho, ua patia vau i te hoê Buka a Moromona e ta’u nei rata i roto i ta’na pute.

 I to’u maere rahi, ua farii maitai to’u hoa i te evanelia. Mai te reira â mahana, ua parau mai oia no ni‘a i te mea ta’na i haapii a tuatapapa ai oia i te Buka a Moromona. Tau hepetoma noa i muri iho, ua faafarerei au ia’na i te mau misionare. I reira noa, oioi roa to’na fariiraa i te haapapûraa a te Varua Maitai e, e parau mau ta’na e haapii ra. Ua ta‘i roa te mau misionare e o vau iho nei i to’na faaiteraa mai ia matou i te mea o to’na aau. Aita i maoro roa, ua bapetizohia to’u hoa ; ua maere roa to’na na metua i te iteraa i te mau tauiraa i tupu i ni‘a ia’na.

 Oaoa roa ho‘i au e, ua nehenehe ia’u ia upooti‘a i to’u măta‘u e ia tauturu i te hopoi i te evanelia i roto i to’na oraraa.