“Talagang nasaktan ako sa ginawa ng isa sa mga kaibigan ko. Alam ko na dapat akong magpatawad, pero paano ko malilimutan ang sakit?”

Hayaang Panginoon ang humatol sa ginawang pananakit ng ibang tao. Alalahanin ang sinabi ng Panginoon: “Ako, ang Panginoon, ay magpapatawad sa yaong aking patatawarin, subalit kayo ay kinakailangang magpatawad sa lahat ng tao” (D at T 64:10). Mahirap kalimutan ang damdaming nasaktan, ngunit kung magdarasal ka at hihingi ng tulong, matatanto mo na kayang pahilumin ng pagpapatawad ang matitinding sugat at palitan ang pagkapoot ng kapayapaan at pag-ibig na tanging Diyos ang makapagbibigay.

Dahil sa pagdurusa ng Panginoong Jesucristo Siya ay nilabasan ng dugo sa bawat butas ng Kanyang balat, ngunit nalampasan Niya ang sakit at nagkaroon ng lakas na magpatawad habang nasa krus. Hindi dahil sa wala Siyang nadamang sakit kundi dahil para sa Kanya, ang tanging mahalaga ay ang kalooban ng Ama. Gayundin sa atin, dapat ang tanging mahalaga ay ang kalooban ng Diyos, at nais Niyang patawarin natin ang lahat. Kahit mabagal ang paggaling ng ating mga sugat, malalampasan natin ang sakit sa pamamagitan ng panalangin at taos-pusong pagpapatawad sa mga nakagawa sa atin ng pagkakamali.

Nalaman ko na ang pinakamainam na paraan para mawala ang sakit ay mahalin ang taong nakasakit sa iyong damdamin. Pagkatapos masaktan ng isang tao ang aking kalooban, sinisikap kong purihin siya at magpakita lalo ng kabaitan sa kanya hangga’t maaari. Sa paggawa nito, hindi na magngingitngit ang iyong kalooban. Sa halip ay mawawala na ito nang tuluyan. Mas magiging matatag ang ugnayan ninyo ng sinumang nakasakit sa iyong damdamin.

Nadama ni Jesucristo ang iyong pasakit upang mapatawad ang iyong mga kasalanan at para mapatawad mo rin ang ibang tao. Kapag nanalangin ka na magkaroon ng kakayahang makita ang isang tao gaya ng pagkakita sa kanya ng Panginoon, makikita mo na mas mauunawaan mo sila. Sa paglipas ng mga linggo, mapapansin mo na maglalaho ang pagngingitngit ng iyong damdamin.

Manalangin sa ating Ama sa Langit na magkaroon ka at ang iyong kaibigan ng lakas ng loob na patawarin ang isa’t isa. Ang pagpapatawad sa isang taong nakasakit sa iyo ay gawain ni Cristo. Napahihilom ng pagpapatawad maging ang lubhang nasaktang damdamin.

Itinuro ni Nephi, “Ang Panginoong Diyos ay nagbigay ng isang kautusan na dapat magkaroon ng pag-ibig sa kapwa ang lahat ng tao, kung aling pag-ibig sa kapwa-tao ay pagmamahal” (2 Nephi 26:30). Para sa akin, ang pag-ibig sa kapwa-tao ang pinakamainam na paraan para mawala ang sakit nang masaktan ng isa sa aking mga kaibigan ang aking kalooban. Ang ibig sabihin ng pag-ibig sa kapwa ay pagtanggap sa mga kahinaan ng isang tao; pagpapasensya sa isang taong bumigo sa atin; at hindi pagdaramdam kapag hindi ginawa ng isang tao ang isang bagay sa paraang inaasahan natin. Kung mahal natin ang ating mga kaibigan, tayo ay pagpapalain.

Dapat mong ipanalangin na matutuhan mong mahalin at patawarin ang ibang tao. Bagama’t kung minsan ay napakahirap magpatawad, ang ating Ama sa Langit ay laging handang tumulong sa atin. Alalahanin ang halimbawang ipinakita ng Tagapagligtas sa pagpapatawad sa ating lahat. Sinasabi sa Mga Taga Colosas 3:13 na, “Mangagtiisan kayo sa isa’t isa, at mangagpatawaran kayo sa isa’t isa, kung ang sinoman ay may sumbong laban sa kanino man: na kung paanong pinatawad tayo [ni Cristo], ay gayon din naman ang inyong gawin.” Ang tunay na pagpapatawad ay isang proseso, minsan ito ay matagal. Ngunit kapag tunay tayong nagpatawad, nakadarama tayo ng malaking kapanatagan at kagalakan. Alam ko na kung pagsisikapan, malilimutan ninyo ang sakit na nadama at makahahanap ng tunay na kaligayahan.

Puno ng kagalakan ang puso ko kapag naaalala ko na maaaring alisin ng kapangyarihan ng pagbabayad-sala ni Jesucristo ang pait na ating nadarama. May mga pagkakataon na tayong lahat ay nagkakaroon ng mapait na karanasan, ngunit sa mahigpit na paghawak sa salita ng Ama sa Langit, matatanggap natin ang lakas na kailangan natin upang makapagtiis. Kahit noong ipinapako Siya ng mga kawal sa krus, hiniling ni Jesucristo sa Ama na patawarin sila. Ang Kanyang kalooban ay puno ng pagmamahal at awa sa lahat ng tao. Alam ko na kung lalapit tayo sa Kanya at hihingin ang Kanyang tulong, mapupuspos tayo ng Kanyang walang-hanggang pagmamahal.