O Iesu Keriso O Lo Tatou Faaola

E mafai ona e faaaogaina le lesona ma le gaoioiga lenei e aoao atili ai e uiga i le autu o le Peraimeri i le masina lenei.

Sa i ai se taimi a o laitiiti ia Elder LeGrand R. Curtis Jr. o le Fitugafulu, sa taaalo ai ma lona tuafafine i se tamai vaa i luga o se vaitafe. I le taimi muamua, sa malie ae a o tafetafea mamao ese atu le vaa mai le matafaga, sa la iloa ai ua tafe atu i le ituvai matautia.

Sa amata ona tauvalaau tamaiti mo se fesoasoani. Sa lagona mai i la’ua e lo la tama ma tamoe saoasaoa ane ai e laveai i la’ua. Na ia laveaia i la’ua, o se mea sa le mafai ona la faia mo i la’ua lava. Na ia faia lenei mea aua e alofa o ia ia te i la’ua.

O nisi taimi tatou te faia ai ni filifiliga sese ma faia mea e aveesea ai i tatou faaleagaga mai le Tama Faalelagi. Na auina mai e lo tatou Tama Faalelagi Lona Alo, o Iesu Keriso e laveai i tatou. Sa mafatia Iesu Keriso mo a tatou agasala ina ia mafai ona tatou salamo ma toe foi saogalemu atu e mau faatasi ma le Tama Faalelagi. Sa faia e le Faaola se mea e le mafai ona tatou faia mo i tatou lava. Sa naunau o ia e faia lenei mea aua e alofa o Ia ia i tatou.

E Molimau Mai Perofeta i le Faaola

Faafetaui molimau taitasi ma le ata o le perofeta na faia. Tusi le numera o le perofeta i le pusa.

“O i matou foi ua matou vaaia ua matou molimau ai foi na auina mai e le Tama o le Alo ia avea ma Faaola o le lalolagi” (1 Ioane 4:14).
“O le mea lea, sa leiloloa tagata uma ma i ai i se tulaga pau, ma o le a tumau ai pea vagana ai ua latou faalagolago i lenei Togiola” (1 Nifae 10:6).
“Ua ou iloa o le a afio mai Iesu Keriso; ioe, le Atalii e Toatasi na fanaua e le Tama, ua tumu i le alofa tunoa, ma le alofa mutimutivale, ma le upumoni. Ma faauta, o ia lea e afio mai na te aveese agasala a le lalolagi, ioe, agasala a tagata uma taitoatasi, o e e tutumau i le talitonu i lona suafa” (Alema 5:48).
“Ma o le a oo mai, o soo se tasi e talitonu i le Alo o le Atua, o ia lava lea o le a mauaina le ola faavavau” (Helamana 14:8).
“Sa ou vaaia ni Tagata se toalua, e le mafaamatalaina lo laua mamalu ma lo laua pupula, o tutu mai i ou luga ae i le ea. Sa fetalai mai le tasi o i laua ia te au, ma sa ia ta’u lo’u igoa ma fetalai mai a o tusi ane lona aao i le tasi—O Lo’u Atalii Pele lenei. Faalogo ia te Ia! ” (Iosefa Samita—Talafaasolopito 1:17).
“O Iesu o … le Alo Pele e Toatasi o le Tama na fanaua. O Ia o lo tatou Togiola; o Ia o lo tatou Puluvaga i le Tama. O Ia lea na maliu i luga o le satauro e togiola mo a tatou agasala” (“Ua Ou Iloa o loo Soifua Lo’u Faaola!” Liahona, Me 2007, 25).

1. Alema

2. Iosefa Samita

3. Samuelu le sa Lamana

4. Ioane

5. Peresitene Thomas S. Monson

6. Liae

Tauagavale: ata na tusia e Jennifer Tolman; taumatau: ata na tusia e Jerry Thompson ma Paul Mann; O Thomas S. Monson, saunia e Knud Edsberg, Faaaloaloga a le Falemataaga o Talafaasolopito a le Ekalesia