E Manaomia e Polofesa Taufaasalalauga ona Galulue i Galuega Faatino a le Ekalesia

I se taumafaiga e faaleleia atili le tala i le Ekalesia i le lalolagi atoa, ua fatuina ai e le Matagaluega o le Tautua Faasalalau se Utuofaamatalaga Faapolofesa Taufaasalalauga (mediapro.lds.org), o se tomatauga mo polofesa taufaasalalauga e fiafia i le fatuina ma le faatinoina o ata, vitio, faalalasauga, faasalalauina sa’o o mea e tutupu, ma isi faasalalauga faaeletonika mo le Ekalesia.

O le faamoemoega autu lava o le utuofaamatalaga ia iloa ai le aufaasalalau faapolofesa talenia i le lalolagi atoa, ma e manao le Ekalesia ia faaaofia ai le anoanoai o tagata taitoatasi ma kamupani “ua suesueina”—pe ua faamaonia—, ma agavaa. Fai mai Scott Olson, le pule o le galuega faatino mo le utuofaamatalaga, “O loo sailia e le Ekalesia i latou ua i ai le poto masani faapolofesa ua tele tausaga o le poto masani. E le o se utuofaamatalga lenei mo le au faapasitaimi.”

I aso ua mavae, a manaomia ona faatino se galuega tau faasalalauga, e totogi konekarate i le lotoifale o Iuta ma malaga atu i se vaalele i se nofoaga e pue ai se vitio pe faia se galuega faatino ona toe foi lea ma faamaea le galuega i le laumua o le Ekalesia. E i ai polofesa o otiovisio a le Ekalesia o loo galulue i galuega faatino, ae ua matua tele naua galuega faatino tau faasalalauga e manaomia ona faia ae e le mafai e ‘au o i ai nei ona faia uma. O se utuofaamatalaga o polofesa talenia i le lalolagi atoa e taua i le lumanai o taumafaiga tau faasalalauga a le Ekalesia.

Fai mai Uso Olson, “Mo le Ekalesia ina ia faaaogaina lelei le utuofaamatalaga MediaPro atoa, o le a manaomia ai nisi polofesa mai le lalolagi atoa e faa’aināina ai. O la matou sini mo le upega tafailagi po o le saite, o le tuu o polofesa taufaasalalauga ua i ai le poto masani i totonu o le utuofaamatalaga a le Ekalesia, a oo ina tulai mai se galuega faatino i soo se itu o le lalolagi, e mafai ona matou faafesootaia ma amata loa lava le galuega.”

A i ai se polofesa taufaasalalauga e fia manao e faitaulia mo galuega faatino, ia auina mai lona igoa, tuatusi imeli, ma se otootoga puupuu o lona talaaga i le mediapro@ldschurch.org. O se vaega o faamatalaga e faatumu e polofesa taufaasalalauga o se talaaga auiliili lea o a latou galuega, faatasi ai ma ni faataitaiga o galuega ua maea, se lisi o tomai, ma lona avanoa. Fai mai Uso Olson, “E taua le faapatino mai o ou tomai aua o nisi tomai e tutusa lava i vitio, ata, ma upega fesootai.”

O le lesitalaina i le MediaPro e le faapea ua mautinoa ai se avanoa e galue ai mo le Ekalesia, ae a le talafeauga ma agavaa, atonu latou te le maua lava se avanoa. O le lesitalaina o o latou faamatalaga ma tomai, e mafai ai e le Ekalesia ona iloa i latou ma vaai po o a mea e mafai ona latou faia.