Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni.

“Ko e Mālohi ʻo e Folofola ʻa e ʻOtuá,” peesi 22: Fakakaukau ke lau mo ho fāmilí ʻa e konga ko e “Ko e Toputapu ʻo e Folofolá,” ʻi he konga ʻo e fakamatalá, pea mou aleaʻi ʻa e founga ʻe lava ʻo hoko ai ʻa e ngaahi folofolá ko ʻetau vaʻa-ukamea. Fakaafeʻi e kau mēmipa ʻo e fāmilí ke nau vahevahe ha meʻa ne nau aʻusia ʻi ha taimi ne nau ongoʻi ai ʻa e mālohi ʻo e folofolá. Pe, vahevahe ʻe he fānau kei iiki angé ha talanoa mei he folofolá naʻá ne fakalotoa kinautolu. Fakakaukau ke ke vahevahe ʻa e tukupā ʻa ʻEletā Tei ke ako fakaʻaho ʻa e folofolá.

“Ko e Hā ʻOku Hoko ʻi he Hili ʻEtau Maté?” peesi 44: Fakakaukau ke mou aleaʻi ʻa e ngaahi fehuʻi ʻoku fokotuʻu atu ʻi he fakamatalá pea mo e ngaahi tāpuaki ʻoku maʻu mei hono ʻilo ko e maté ʻoku ʻikai ko e ngataʻanga ia ʻo ʻetau moʻuí. Mahalo te ke fie ʻeke ange pe ʻoku founga fēfē hono ʻai ʻe he ʻilo ko ʻení ʻetau ngaahi filí takitaha ke mahuʻingá. Fakaʻosi ʻaki haʻo fai ange hoʻo fakamoʻoni ki he palani ʻo e fakamoʻuí.

“Ko e Ongo Lami ʻa Mīkení,” peesi 62: Lau ʻa e talanoa ʻo Mīkeni mo ʻene ongo kiʻi lamí pea aleaʻi ʻa e ʻuhinga naʻe fuʻu fiefia ai ʻa Mīkeni ʻi he konga fakaʻosí. Mahalo naʻa fie maʻu ke mou lau ʻa e Mōsaia 2:17–18 pea mou talanoa fekauʻaki mo e ngaahi tāpuaki ʻoku tau maʻu ʻi he ngāue tokoní. Fakakaukau ke mou aleaʻi ha ngaahi founga ʻe lava ke fetokoniʻaki ai ʻa e kau mēmipa ʻo e fāmilí mo nau tokoni ki he niʻihi kehé. Te mou lava ʻo fakaʻosi ʻaki haʻamou hivaʻi ha foʻi hiva fekauʻaki mo e ngāue tokoní, hangē ko e “Te u Talangofua Leva” (Tohi Hiva ʻa e Fānaú, 71).