ʻOku ʻOmi ʻe he Vahehongofulú ʻa e Uluí
ʻOlokā Nikolaievina Kelipikou, ʻIukuleini
Naʻe ʻohake ʻa e tefito ʻo e vahehongofulú ʻi homau fāmilí ʻi he taimi naʻe kau ai ʻema taʻahiné ki he Siasí. ʻI he taimi ko iá, naʻe ʻikai ke u kau au pe ko hoku husepānití ki he Siasí. Naʻá ne ngāueʻi pē ʻe ʻia ʻene paʻangá, ka koeʻuhí naʻe kei nofo pe mo kimaua, naʻa mau fevahevaheʻaki leva ʻemau paʻanga ne maʻú. ʻOku ʻikai ke u mafakakaukaua ʻe au pe ʻe anga fēfē haʻamau moʻui taʻe kau ai e pēseti ʻe 10 ʻo ʻene vahé kuó ne pehē ke totongi ki he vahehongofulú, ka naʻe fāifai pē ʻo u anga ki he fili ʻa ʻeku taʻahiné. Ko e taimi pē naʻe haʻu ai mo ʻene vahé ki ʻapí, ko ʻeku ʻuluaki fehuʻí pē, “Kuó ke ʻosi toʻo hoʻo vahehongofulú?”
Naʻe fāifai pē peá u fie ʻilo ki he ongoongoleleí, ka naʻá ku pehē ke ʻoua naʻá ku kau ki he Siasí koeʻuhí he te u iku totongi vahehongofulu. Naʻe fuʻu tōtuʻa ia ke fai ha totongi vahehongofulu ʻe ua mei ha fāmili pē taha!
Hili haʻaku maʻulotu ʻo laka hake ʻi ha taʻu kakato ʻe taha, kuo kamata ke u ongoʻi taʻe-fiemālie mo hohaʻa. ʻI heʻeku fakakaukau pea mo lotú, naʻá ku fakatokangaʻi naʻe fie maʻu ke u totongi vahehongofulu. Naʻá ku ʻohovale au heʻeku holi ko ʻení, ʻi hono fakahoa atu ki heʻeku muʻaki taʻelotó.
ʻI he Sāpate hokó pē, naʻá ku kole leva ha laʻi pepa foaki vahehongofulu mei he palesiteni fakakoló. Naʻá ku taʻe fiemālie ʻi heʻeku fanongo kapau he ʻikai ke u hoko ko ha mēmipa, he ʻikai ke u lava ʻo totongi vahehongofulú. Ka, te u lava pē ʻo fai ha foaki. Ko ia, ne u foaki leva e pēseti ʻe 10 ʻo ʻeku vahé ki he Siasi ʻo e ʻEikí. Naʻá ku ongoʻi ha fiemālie, fiefia, pea mo ha nonga ʻi he taimi pe ko iá. Naʻe ʻikai ke u faʻa tatali ki he ʻaho ʻo hoku papitaisó kau lava ʻo totongi ha vahehongofulu moʻoni.
ʻOku ou ʻilo ko e ngaahi tāpuaki fakatuʻasino ʻoku maʻu ʻe homau fāmilí ʻoku maʻu ia mei he totongi vahehongofulú. Ka ko e ngaahi tāpuaki maʻongoʻonga tahá ko e ngaahi ongo taʻe-mafakatataua ʻoku mau maʻu ʻi he taimi ʻoku mau talangofua ai ki heʻemau Tamai Hēvaní: ʻa e nonga ʻi he talangofuá, ʻa e falala he ʻikai tuku kimautolu heʻemau Tamai Hēvaní ke tuēnoá, pea mo e ongo ʻo e nongá mo e fiefiá.