Na Faamuamua la Matou Sefuluai

I le taumafanafana o le 2006, sa faigaluega ai lo’u toalua o se aveloli. Talu ai sa toesea o ia mai le aiga mo le tusa ma le lua vaiaso i se taimi e tasi, o le tiutetauave o le totogiina o pili, sa pa’ū lea i o’u luga. O lana galuega sa lē mautū, ma o la matou tupe maua sa fesuisuia’i mai lea masina i lea masina, o le mea lea, sa le faigofie ai le paketiina o a matou tupe.

I lena Iulai, na laitiiti atu ai lana siaki, nai lo le tulaga masani, ma ua laitiiti atu nai lo le mea sa ou fuafua i ai. Ina ua uma ona ou teuina lana siaki, na ou faatusatusaina le aofaiga ua i ai i le faletupe i la matou lisi o tupe faaalu ua tatau ona i ai. Na tonu ia te au, afai ou te totogia mea uma lava, e aofia ai ma la matou sefuluai, o le a tusa ma le $30 e lē atoa ai. O i matou o tagata e totogi atoa le sefuluai, ina ua aoaoina se lesona e ala i se aafiaga faigata i nai tausaga talu ai, ina ua lē atoa le totogiina o la matou sefuluai. O le faamisi o le sefuluai i lenei taimi, sa lē o se tasi o tali i lea taimi.

Na ou manatua lo’u faalogo ai i tala o tagata, o e na faamuamua le tusiaina o siaki o a latou sefuluai, a o utiuti le faasoa, ma i’u ina maua tupe e ala i auala faavavega. Sa masani ona ou tusiaina siaki i le faasologa o siaki e tatau ona meliina i lena aso, o le mea lea, o le siaki o le sefuluai sa seāseā ona avea ma siaki ou te tusia muamua. Ae o lena aso, na tonu ai ia te au, e manaomia lo’u tusia muamua o la matou siaki o le sefuluai, ua iloa o le a fesoasoani mai le Alii i se auala mo i matou e totogi ai a matou pili.

O le Aso Gafua na sosoo ai, na ou mauaina ai le tala o se vasega faalenuu na ou lesitalaina ai lo’u atalii matua, ua faaleaogaina, ma o le siaki e $20 na ou tusiaina i le masina talu ai ua toe faafoi mai. Ina ua ou tago e faapaleni la’u tusi siaki, i le toe tuuina ai i totonu o lena $20, na ou iloa ai e $23 se sesē o la’u faaopoopoga i le vaiaso na muamua atu. I le faaopoopo atu i ai, i le lua aso mulimuli ane, na matou maua ai se siaki o se tupe toe faafoi mai e $36 mai le matou foma’i, mo le ova ona totogi o se pili. O le mea lea, nai lo le $30 na le atoa ai, sa ia i matou le toeitiiti $50 faaopoopo.

Na faataunuu e le Alii Lana folafolaga o loo i totonu o le Malaki 3:8–12 faapea afai tatou te totogi a tatou sefuluai, o le a Ia sasaa maia faamanuiaga. Ou te iloa ona o lo matou tali atu e mulimuli i le poloaiga a le Alii ina ia totogi muamua a tatou sefuluai, lea na faamanuiaina ai matou.