Nofo ai i Cape Town

Talu mai lava le taimi na ou auauna ai i la’u misiona i le Misiona a Lonetona i Egelani, na ou manao e toe foi atu e nofo ma faigaluega ai iina. I le faatoa maua ai o se faailoga tikeri o le Matuaofaiva, na tonu ai ia te au atonu o le taimi sa’o lea mo au e siitia atu ai i Lonetona. Na ou faamautuina se galuega, ma sa ou lagonaina le fiafia e uiga i le malaga atu.

Peitai, i se tasi po, na ou tatalo ai ina ia iloa le finagalo o le Alii ma, pe ua sa’o mo au le siitia atu i Lonetona. A o ou taumafai ai ou te moe, sa i ai se manatu sa faaauau ona sau i lo’u mafaufau: “E manaomia lou nofo ai i Cape Town.” O lenei manatu sa faaauau ona oo mai mo le tele o itula. O le mea lea, na tonu ai ia te au, e finagalo le Atua mo au ia ou nofo i Cape Town. O le mea lea, e ui lava sa ou manao ou te siitia atu, na ou filifili e nofo ai. I le taimi lava lena, na mafai ai loa ona ou moe.

O le aso na sosoo ai, na amata ona ou fetuutuunaia le mea na tupu i le po na mavae atu ma faaauau ona ou tuufesili, pe tatau lava ona ou alu i Lonetona, i le faaiuga. Peitai, o lena po, o le aafiaga mai le po na mavae, sa faapea ona toe tupu foi. O le manatu “E manaomia lou nofo ai i Cape Town” na faaauau ona sau i lo’u mafaufau i taimi uma. A o ou mafaufau loloto i nei manatu, na amata ona faamalieina au faapea e finagalo moni lava le Alii mo au ou te nofo ai i Cape Town, ma sa ou manao e faia le mea e finagalo ai le Alii ou te faia.

O le vaiaso na sosoo ai, na valaau mai ai lo’u peresitene o le siteki ina ia ma feiloai. Na vave ona ou iloaina faapea, sa i ai se valaauga na finagalo le Alii mo au e faataunuuina. Na molimau mai le Agaga faapea o le mafuaaga na manaomia ai lo’u nofo ai i Cape Town, ona sa i ai se galuega e finagalo le Alii mo au e fai.

Na ou taliaina le valaauga o le avea ai ma peresitene o Tamaitai Talavou a le siteki, ma a o auauna ai mo nai tausaga na sosoo ai, sa mafai ona avea au ma meafaigaluega i aao o le Alii. I le avea ai o se taunuuga, o lo’u olaga ma olaga o tagata na ou auauna i ai, na faamanuiaina tele. Na ou tuputupu a’e i tulaga faataitai, ma, na aoaoina e le Alii au i le tele o mea e ala i la’u auaunaga mo isi.

Talu mai lena taimi, na mafai ai ona ou atiina ae le faalagolago sili atu i le Alii. E maeu lo’u faafetaia o uunaiga filemu a le Agaga, lea na taitaiina au ia iloa ma faia ai Lona finagalo. E ala i le faaitiitia o le masalosalo, ae naunau e mulimuli i le musumusuga ua ou maua, ua taitaia au e mauaina le olioli ma le filemu sili, i le iloa ai faapea o loo faamalieina lo’u Tama Faalelagi i lo’u olaga.