O Aiga o se Vaega o le Fuafuaga a le Tama Faalelagi

O loo faamatala mai i le Tusi a Mamona se tagata amioleaga e igoa ia Amalekia. Sa manao o ia e faaleaga le Ekaelsia ma pule ia sa Nifae e fai ma o latou tupu.

O Kapeteni Moronae o se taitai malosi ma amiotonu o le autau a sa Nifae. Sa manao Kapeteni Moronae e faamanatu atu i tagata le taua o le puipuia o o latou aiga ma lo latou faatuatuaga. Sa ia sasaeina lona ofutele ma fai ai se fu’a, po o se tagavai. Sa ia tusia ai i luga upu nei:

“Mo le manatuaina o lo tatou Atua, ma la tatou tapuaiga, ma le saolotoga, ma lo tatou filemu, a tatou ava, ma a tatou fanau.”

Sa ia ta’ua lana fu’a “o le tagavai o le saolotoga,” ma sa ia faapipiiina i le pito o se pou. Ona ia tootuli lea ma tatalo ina ia tumau le saoloto o tagata, ina ia mafai pea ona latou tapuai i le Atua ma maua Ana faamanuiaga. (Tagai Alema 46:1–21.)

O le asō, ua ia i tatou se mea e faamanatu mai ai ia i tatou le taua o o tatou aiga ma lo tatou faatuatuaga. O Le “O Le Aiga: O Se Folafolaga i le Lalolagi.” O nisi nei o ona upu:

“O le aiga o le totonugalemu lea o le fuafuaga a Lē Foafoa, mo le taunuuga e faavavau o Lana fanau. … O le aiga ua faauuina e le Atua.”