E Le Mafai Ona E Sau I Luga Nei

O lo’u toalua o Ioane, o se tagata tino ese. O lona umi e ono futu fa inisi (1.9 m), ae e sili atu ma le 200 pauna (90.9 kg) le mamafa. Mo ia, o le malaga i le vaalele i le vaega o pasese taugofie sa matua sili ona le toafimalie, ma sili ona tiga.

O Aokuso 2006 sa valaauina ai i maua e auauna atu i se misiona faaleaoaoga a le Ekalesia i le Iunivesite o Polika Iaga–Hawaii. Ina ua oo i le taimi ma te foi mai ai i le aiga, sa ma fā’atu po o le a le mea e tatau ona ia onosaia i le malaga a le vaalele e foi i Amerika. I le taimi na siaki ai pepa malaga sa ma fiafia i le iloa sa i ai se nofoa e tasi sa avanoa i le vaega o pasese taugata, o lea sa ma suia i ai lana pepa malaga. O le a mafai ona saofai o ia i se nofoa toafimalie ma le tele o se avanoa mo ona vae uumi.

Pe tusa o le ogatotonu o le faigamalaga, sa tonu ai ou te alu atu e vaai pe o a mai o ia. A o ou latalata atu i le vaega o pasese taugata, sa tu mai i le faitotoa se tagata fesoasoani i luga o le vaalele e taofi a’u.

“E i ai se mea e te finagalo i ai?” na ia fesili ai.

“Ioe, ou te fia vaai i lo’u toalua mo sina taimi,” sa ou tali atu ai.

“E faamalie atu,” sa ia fai mai fiafia ae sa mautu, “e le mafai ona e sau i luga nei.”

“Ae o ia o lo’u toalua, e na o lo’u fia vaai lava ia te ia mo se minute.”

Sa ia polokaina pea le faitotoa ma toe fai mai, “Ou te faamalie atu, ae e le faatagaina oe i luga nei. E mafai ona ou faaoo atu i lou toalua se feau, ma afai e manao i ai, e mafai ona sau o ia e asi oe. Ae o le tulafono, e na o pasese faapitoa lava e mafai ona i ai i le vaega lenei.”

Sa ou le mautonu mo se taimi, ae o le vaaia o lona mausali pea, sa ou toe foi filemu atu ai i lo’u nofoaga i le vaega o pasese taugofie.

Sa amata ona ou mafaufau e uiga i tikeri e tolu o le mamalu o loo ta’ua i tusitusiga paia ma ta’u mai e perofeta. Tatou te faitau e faapea, o le a asiasi atu Keriso ia i latou e i le malo terasitila (tagai MF&F 76:77), ae o agelu auauna o le a asiasi atu ia i latou e i le malo telesitila (tagai MF&F 76:88), ae o i latou o e o loo i malo maualalalo ifo e le mafai ona o atu i le malo selesitila (tagai MF&F 76:112; tagai foi MF&F 88:22–24). O le mafaufau ai i lo’u aafiaga, sa ou lagonaina sa ou vaai i sina faaataataga o le mea e ono i ai mo i latou e i ai i malo maualalalo ifo. O a ni o latou lagona pe a faalogo i upu, “Ou te faamalie atu, e le mafai ona e sau i luga nei”?

Pe a ma le lima masina mulimuli ane, ae maliu lo’u toalua i le kanesa. O lo’u aafiaga i luga o le vaalele ua tuuina mai ai ia te a’u se uunaiga faaopoopo ia [ou] ola ina ia ou le toe faalogo lava i na upu—aemaise o le isi itu o le veli.