Hu, Kaa, na Da Ase

Nyame se yɛnda No ase wɔ nhyira biara a yenya fi No hɔ ho. Ɔyɛ mberɛw dɛ yɛnnkɔdwen hɛn ndaase mpaabɔ ho, yɛtaa kã nsɛm kor noara, na mbom yennyi pɛ biara dɛ hɛn ndaase no bɛyɛ akoma mu akyɛdze ama Nyankopɔn. Na ɔwɔ dɛ “[yɛ]da ase ….wɔ Sunsum mu”(N&A 46:32) ama yeenya enyisɔ a odzi mu wɔ dza Nyankopɔn dze ama hɛn no ho.

Yebesi dɛn akaa dza Nyame ayɛ ama hɛn nyina no, no mu kumaa mpo? Ɔsomafo John kyerɛɛw dza Agyenkwa no kyerɛkyerɛɛ hɛn faa nkaa akyɛdze a ofi Sunsum Krɔnkrɔn akyɛdze mu ba: “Na Okyigyinafo no a ɔyɛ Sunsum Krɔnkrɔn no a Egya no bɔsoma no wɔ me dzin mu no, ɔno na ɔbɛkyerɛkyerɛ hom ndzɛmba nyina; ɔbɛkaa hom dza makã akyerɛ hom nyina.”(John 14:26).

Sunsum Krɔnkrɔn no dze dza Nyame akyerɛkyerɛ hɛn no ho nkaakaa san brɛ hɛn. Na kwan kor a Nyame dze kyerɛkyerɛ hɛn nye Ne nhyira; ntsi, sɛ yɛsan mu kyerɛ gyedzi a, Sunsum Krɔnkrɔn no dze Nyankopɔn N’ayamuyie ho nkaa babrɛ hɛn.

Hom botum asɔ iyi ahwɛ wɔ mpaabɔ mu ndɛ. Hom botum edzi mbransɛm yi do “Hom nda Ewuradze hom Nyankopɔn ase wɔ adze nyina mu”(N&A 59:7).

President Ezra Taft Benson (1899–1994 susuu dɛ mpaabɔ ma yenya mber yɛ iyi. Ɔkãa dɛ: “Joseph Smith, Nkɔnhyɛnyi no, kãa no ber bi dɛ bɔn kɛse kor a Nda a Odzi-Ekyir Ahotseweefo bedzi ho fɔ nye bɔnyiayɛ. Mefa no dɛ hɛn mu dodowara nndwen ho dɛ ɔyɛ bɔn kɛse. Ɔyɛ hɛn ntɔyɛɛ kɛse dɛ hɛn mpaabɔ, na Ewuradze hɔ ntotɔserɛ mu no, yebisa nhyira binom kã ho. Mbom ɔyɛ a menya atsenkã dɛ ɔsɛ dɛ yɛdze hɛn mpaabɔ no mu dodowara kyerɛ hɛn enyisɔ na ndaase ma nhyira a yeenya no dadaw no ho. Yenya no mbordo.”¹

Hom botum enya Sunsum Krɔnkrɔn akyɛdze ho sũahu yi ndɛ. Hom botum dze ndaase ahyɛ nsumaamu mpaabɔ ase. Hom botum ahyɛ ase akan hom nhyira na nkyii hom atweɔn mber kumaa. Sɛ hom nya gyedzi a, Sunsum Krɔnkrɔn akyɛdze no bɛma hom ehu dɛ nhyira binom ho nkaakaa bɛpem abɛhyɛ hom adwen mu. Sɛ hom hyɛ ase kyerɛ kor biara ho enyisɔ a, hom mpaabɔ bɛgye mber kakra akyɛn daadaa dze no. Hom dze enyisɔ bɛkaakaa.

Hom botum ayɛ dɛmara ber a hom rekyerɛw hom journal mu. Fitsi mber ahyɛse no, Sunsum Krɔnkrɔn no aboa nkorɔfo wɔ iyi ho. Hom kaa dɛ Moses nwoma no kã dɛ, “Na wɔdze nkaa nwoma siei, no mu na wɔkyerɛɛw Adam ne kasaa, osiandɛ wɔdze maa dodowara a wɔfrɛɛ Nyankopɔn dɛ wondua sunsum no ne nkenyan do nkyerɛw” (Moses 6:5).

President Spencer W. Kimball (1895–1985) kyerɛkyerɛɛ nkenyan akyerɛw mu: “Hɔn a wosie nkaa nwoma no, na wɔbɔtɔ dɛ wɔkaa Ewuradze wɔ hɔn daadaa abrabɔ mu. Journal mu akyerɛw yɛ kwan a yɛdze kan hɛn nhyira na yegya nhyira yinom ho nkanee ma hɛn mbasantsen.²

Ber a ahyɛ ase rekyerɛw no, ibotum ebisa woho dɛ, “Nyame esi dɛn ehyira emi na m’adɔfo ndɛ?” Sɛ itaa dze gyedzi yɛ iyi a, ibohu dɛ erekaakaa nhyira horow no. Na ɔtɔfabi a wɔdze akyɛdze binom bɛba w’adwen mu a annhyɛ no nsɛw da no mu, mbom nkyii na ibohu dɛ Nyame Ne nsa ada w’abrabɔ do.

Mobɔ mpaa dɛ hom bɔkɔ do dze gyedzi abɔ mbɔdzen ehu, akaa, na wɔada ase wɔ dza hɛn Ɔsor Egya na hɛn Agyenkwa no ayɛ na wogu do reyɛ dze ebuei fie kwan akɔ Hɔn nkyɛn.