Parau poro‘i a te Peresideniraa Matamua, Atete 2013
Ite, haamana‘o e haamauruuru
Ua ani mai te Atua e ia haamauruuru tatou Ia’na no te mau haamaitairaa atoa o ta tatou i farii no ô mai Ia’na ra. E mea ohie no tatou ia pure ma te feruri ore i roto i ta tatou mau pure haamauruururaa, ma te faahiti pinepine i te mau parau nei â, aita râ e hinaaro mau i roto i te aau ia faaite i te mauruuru i te Atua. Titauhia ia tatou ia « haamauruuru… na roto i te Varua » (PH&PF 46:32) i reira tatou e ite ai i te aau mehara mau no te mau mea ta te Atua i horo‘a mai ia tatou.
Nahea ta tatou e nehenehe e haamana‘o mai i te hoê noa a‘e tuhaa o te mau mea atoa o ta te Atua i rave no tatou ? Ua papa‘i te aposetolo Ioane i te mea ta te Faaora i haapii mai ia tatou no ni‘a i te hoê tao‘a haamana‘oraa o te tae mai na roto i te horo‘araa i te Varua Maitai « Na te Faaa‘o râ, na te Varua maitai ra, o ta te Metua e tono mai ma to’u nei i‘oa ra, na’na e haapii mai ia outou i te mau mea atoa ; e e faaite faahou mai hoi ia outou i te mau parau atoa ta’u i parau atu ia outou na » (Ioane 14:26).
Na te Varua Maitai e faahaamana‘o i te mau mea ta te Atua i haapii mai ia tatou. E hoê o te mau rave‘a ta te Atua no te haapii mai ia tatou, na roto ïa i Ta’na mau haamaitairaa ; e no reira, mai te peu e ma‘iti tatou e faaohipa i te faaroo, e faahaamana’o mai te Varua Maitai ia tatou i te mau maitai o te Atua.
E nehenehe ta outou e tamata i te reira i roto i te pure i teie mahana. E nehenehe ta outou e pee i te faaueraa « e haamaitai atu oe i te Fatu ra o te Atua i roto i te mau mea atoa ra » (PH&PF 59:7).
Ua parau te peresideni Ezra Taft Benson (1899–1994) e e faanaho te pure i te taime no te rave i te reira. Te na ô ra oia : « Ua parau te peropheta Iosepha i te hoê taime e te hoê o te mau hara rahi o ta te Feia Mo‘a i te Mau Mahana Hopea Nei i rave oia ho‘i te hara no te aau mehara ore. Te feruri nei au e, aita te rahiraa o tatou i mana‘o e, e hara rahi te reira. E peu rahi na tatou i roto i ta tatou mau pure e i roto i ta tatou mau taparuraa i te Fatu ia ani i te mau haamaitairaa hau atu. I te tahi râ taime, te mana‘o nei au e, i roto i ta tatou mau pure, e ti‘a ia rahi atu te mau parau haamaitai e te haamauruuru no te mau haamaitairaa i fariihia. E fana’o rahi to tatou ».1
E nehenehe ta outou e farii i teie huru iteraa na roto i te horo‘raaa i te Varua Maitai i teie mahana. E nehenehe ta outou e haamata i te hoê pure omo‘e na roto i te mauruuru. E nehenehe ta outou e haamata i te tai‘o i to outou haamaitairaa e i muri iho e faaea rii i te hoê taime. Mai te mea e faaohipa outou i te faaroo, na roto i te horo‘araa i te Varua Maitai, e ite outou e, e faaîhia to outou varua i te mau haamana‘oraa no te tahi atu mau haamaitairaa. Mai te mea e haamata outou i te faaite i te aau mehara no te reira mau haamaitairaa tata‘itahi, e nehenehe ta outou pure e roa rii a‘e i tei matarohia. E tae mai te haamana‘oraa e oia’toa te aau mehara.
E nehenehe ta outou e tamata atoa i te reira raveraa a papa‘i ai outou i te hoê parau i roto i ta outou buka aamu. Ua na reira te Varua Maitai i te tauturu i te mau taata mai te haamataraa mai o te tau. Te haamana‘o ra outou e te parau ra te buka a Mose e, « e ua haapaohia te hoê buka haamana‘oraa, e ua papaihia hoi te mau mea i roto i te reira na roto i te reo o Adamu, e ua horoahia atu hoi ia ratou atoa o tei tiaoro atu i te Atua, ia papai na roto i te varua faaûrûraa » (Mose 6:5).
Te faaite ra te peresideni Spencer W. Kimball (1895–1985) i taua huru papa‘iraa faaûruhia ra : « Te feia o te tape‘a i te hoê buka haamana‘oraa e mea papû roa e vai noa te Fatu i roto i te haamana‘oraa i te mau mahana atoa o to ratou oraraa. Ua riro te mau buka aamu ei rave‘a no te tai‘o i to tatou mau haamaitairaa e ia vaiiho i te hoê tapura no teie mau haamaitairaa no to tatou huaai ».2
A haamata ai outou i te papa‘i, e nehenehe ta outou e ui ia outou iho, « nahea to te Atua haamaitairaa ia’u e te feia o ta’u i here i teie mahana ? » Mai te mea e rave pinepine maitai outou i te reira e na roto i te faaroo, e hitimahuta outou iho i to outou haamana‘oraa i te mau haamaitairaa. E i te tahi taime, e farii outou i te mau tao‘a tei afa‘ihia mai i to outou varua e o ta outou i ore i haapa‘o i te roaraa o te mahana, o ta outou râ e ite atu o te hoê ïa tuuraa rima o te Fatu i roto i to outou oraraa.
Te pure nei au e ia rave â tatou i te hoê tautooraa tamau i roto i te faaroo no te ite, no te haamana‘o e no te haamauruuru no te mau mea ta to tatou Metua i te Ao ra e to tatou Faaora i rave na e Ta’na e rave ra no te haamatara i te e‘a no te ho‘iraa ia Raua ra.
© 2013 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/12. Parau faati‘a no te iritiraa : 6/12 Iritiraa no First Presidency Message, August 2013. Tahitian. 10668 895
Haapiiraa no roto mai i teie parau poro‘i
I roto i teie parau poro‘i, te ani manihini mai nei te peresideni Eyring ia tatou ia haamana‘o i te mau maitai o te Metua i te Ao ra i roto i ta tatou mau pure. A tauaparau e te feia ta outou e haapii ra e nahea te pure ma te aau mehara e ti‘a ai e tauturu ia tatou ia itea i te rima o te Fatu i roto i to tatou oraraa. A feruri e pure ma te tuturi e te feia ta outou e haapii ra ma te tuu i te mana‘o i te taata e faahiti i te pure ia faaite noa oia i te haamauruururaa.
E nehenehe atoa ta outou e tuatapapa i te faufaa rahi o te aau mehara na roto i te tai‘oraa i teie mau irava e teie atoa mau irava o ta te peresideni Eyring i faahiti : Salamo 100; Mosia 2:19–22; Alama 26:8; 34:38; Te Parau Haapiiraa e te Mau Parau Fafau 59:21; 78:19; 136:28.