2013
Ohipa totauturu
Atete 2013

Parau Poro‘i na te mau tuahine hahaere, Atete 2013

Ohipa totauturu

A tai‘o i teie haapiiraa na roto i te pure, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa. No te mau haamaramaramaraa hau atu, a haere i ni‘a i te reliefsociety.lds.org.

Te Faaroo, Te Utuafare, Te Totauturu

Te mau opuaraa o te ohipa totauturu a te Ekalesia no te tauturu ia i te melo ia faarava‘i ia ratou iho, ia utuutu i te feia vĕvĕ e te rava‘i ore, e ia rave i te taviniraa. Te ohipa totauturu o te tumu ïa no te ohipa a te Sotaiete Tauturu. Ua haapii mai te peresideni Henry B. Eyring, Tauturu Matamua i roto i te Peresideniraa Matamua e :

« Ua faanaho [te Fatu] mai te haamataraa mai o te tau i te mau rave‘a no te tauturu i Ta’na mau pĭpĭ. Ua ani manihini Oia i Ta’na mau tamarii ia horo‘a i to ratou taime, ta ratou rave‘a, e ia ratou iho no te amui atu Ia’na i roto i te taviniraa ia vetahi ê… 

« Ua ani manihini Oia e ua faaue ia tatou ia amui atu i roto i Ta’na ohipa no te faateitei i te feia e au ia tauturuhia. Ua rave tatou i te hoê fafauraa ia rave i te reira i roto i te pape o te bapetizoraa e i roto i te mau hiero mo‘a o te Atua. E faaapî tatou i te fafauraa i te mau sabati atoa i te taime a rave ai tatou i te oro‘a ».1

I raro a‘e i te faatereraa a te episekopo e aore râ a te peresideni amaa, e tauturu te feia faatere o te fenua iho i te au maitai o te taata i te pae varua e te pae tino. Pinepine te mau rave‘a no te taviniraa e haamata na roto mai i te mau orometua hahaere o tei imi i te faaûruraa no te ite e nahea ia pahono i te mau hinaaro o te mau tuahine o ta ratou e hahaere ra.

No roto mai i te mau papa‘iraa mo‘a

Luka 10:25–37; Iakobo 1:27; Mosia 4:26; 18:8–11; Te Parau Haapiiraa e te Mau Parau Fafau 104:18

No roto mai i to tatou aamu

I te 9 no tiunu 1842, ua faaue te peropheta Iosepha Semita i te mau tuahine no te Sotaiete Tauturu ia « tauturu i tei vĕvĕ » e ia « faaora i te mau varua ».2 Te vai noa ra teie mau fâ i te aau o te Sotaiete Tauturu e ua faaitehia te reira i roto i ta tatou tumu parau « E ore roa te aroha e mou » (1 Korinetia 13:8).

Ua tuu o Emmeline B. Well te paeraa o to tatou peresideni rahi no te Sotaiete Tauturu e to’na na tauturu i teie tumu parau i te matahiti 1913 ei haamana‘oraa no ta tatou parau tumu niu : « Te parau atu nei matou e ta [tatou] fâ o… te tape‘a maite i te mau haapiiraa faaûruhia a te Peropheta Iosepha Semita a heheu ai oia i te opuaraa ia nehenehe i te mau vahine ia haamanahia na roto i te piiraa a te autahu‘araa ia putuputuhia ratou i roto i te mau faanahonahoraa e au no te utuutu i te feia ma‘i, no te tauturu i te feia i roto i te fifi, no te tamahanahana i te feia paari, no te faaara i te taata ara ore, e no te tauturu i te mau otare ».3

I teie mahana te toro nei te rima tauturu a te Sotaiete Tauturu na te ao nei na roto i to te mau tuahine faaiteraa i te aroha, te hinaaoro mau o te Mesia, i to ratou taata tupu (hi‘o Moroni 7:46–47).

Te mau nota

  1. Henry B. Eyring, « Te mau rave‘a no te rave i te maitai », Liahona e Ensign, Me 2011, 22.

  2. Iosepha Semita, i roto E Mau Tamarii Tamahine i roto i To’u Basileia : Te Aamu e te Ohipa a te Sotaiete Tauturu (2011), 71.

  3. E Mau Tamarii Tamahine i roto i To’u Basileia, 71.

Eaha ta’u e nehenehe e rave ?

  1. Nahea vau i te faaineine ia atuatu ia’u iho e to’u utuafare i te pae varua e i te pae tino ?

  2. Nahea vau i te pee i te hi‘oraa maitai o te Faaora a pahono ai au i te hinaaro o te mau tuahine o ta’u e haapa‘o nei ?