O Le Au Paia mo Vaitau Uma

E i ai ni mea ou te manatua i lo’u laitiiti o se vaega o le lalolagi e mafai ona avea ma se ata o se kata e lafo i le meli mo vaitau fesuisuiai o le tausaga. E mamalu ma matagofie masina taitasi e sau ma mou atu. I se aso matagofie naua o le taumalulu, sa faapulou ai e le kiona momosi ia atumauga ma magaala o le aai. Na aumaia e le tautotogo timuga faamama ma le fotu a’e naua o le ola lanulauava. Na avea ia lagi gase o le taumafanafana o se tapoleni lanumoana matagofie mo le mutigitigi o se la susulu. Ma o le tautoulu mata’ina na liuaina le natura e avea ma atalafoia feilafi o le lanumoli, samasama ma le lanumumu. Ao ou tamaitiiti, sa ou fiafia i vaitau taitasi, ma e oo mai i lenei aso, ou te fiafia i uiga ma le tulagaese o vaitau taitasi.

Ua i ai foi ni vaitau i o tatou olaga. O nisi e mafanafana ma faafiafiaina. O isi e leai. O nisi o aso i o tatou olaga e matagofie e pei o ni ata i se kalena. Ae e i ai foi aso ma tulaga e mafua ai le lototiga ma e ono aumaia ai i o tatou olaga ni lagona loloto o le faanoanoa, inoino, ma le ita.

Ou te mautinoa sa i ai se taimi sa tatou mafaufau uma ai lava e manaia le nofo i se laueleele e na o aso o vaitau o ata atoatoa e faatumulia ai ma aloese ai mai taimi lē fiafia i va o ia vaitau.

Peitai, e le mafai. E le manaomia foi.

A o ou vaavaai atu i lo’u lava olaga, ua manino ai lava o le tele o taimi o le tuputupu ae aupito maoae, na oo mai ia te au a o ou uia vaitau matagiā.

Na silafia e lo tatou Tama Faalelagi ua i ai le poto uma, ina ia tuputupu a’e Ana fanau ia avea ma tagata na mamanu i latou ia avea ai, o le a manaomia ona latou oo i vaitau o faigata i le taimi o lo latou olaga faaletino. Fai mai le perofeta o le Tusi a Mamona o Liae a aunoa ma mea faafeagai, “e le mafai ona i ai o le amiotonu” (2 Nifae 2:11). O le mea moni, o le oona o le olaga e mafai ai ona tatou iloa, faatusatusa, ma talisapaia lona suamalie (tagai MF&F 29:39; Mose 6:55).

Ua faaupu e Peresitene Polika Iaga i le ala lenei: “O tagata atamamai uma e faapaleina i palealii o le mamalu, tino ola pea ma le olaga e faavavau e tatau ona laasia puapuaga uma na atofaina mo tagata atamamai e laasia, ina ia maua ai lo latou mamalu ma le faaeaga. O mala uma e mafai ona oo mai i luga o tagata ola o le a puapuagatia ai … e saunia ai i latou e olioli i le afioaga o le Alii. … O tofotofoga ma aafiaga uma e te laasiaina ua tatau ai mo lou faaolataga.”¹

O le fesili e le o le, pe o le a tatou oo i vaitau o faigata ae o le, pe faapefea ona tatou tatalia ia afā. O lo tatou avanoa sili i le taimi o vaitau fesuisuia’i o le olaga o le pipiimau lea i le afioga faamaoni a le Atua, aua o Lana fautuaga ua mamanuina e le gata ina ia fesoasoani ia i tatou e tatalia ai afā o le olaga ae faapea foi ona taialaina ai i tatou ia manumalo ai. Ua tuuina mai e lo tatou Tama Faalelagi Lana afioga e auala mai i Ana perofeta—o le malamalama taua lea ua mamanuina e taitaia i tatou e ui atu i luitau o vaitau faigata e agai atu i le olioli e le mafaamatalaina ma le malamalama susulu o le ola e faavavau. O se vaega taua o le aafiaga o o tatou olaga le atiina ae o le malosi, lototele, ma le amiosa’o e pipiimau ai i le upumoni ma le amiotonu e tusa lava po o a fesouaiga tatou te oo i ai.

O i latou ua ulu ifo i le vai o le papatisoga ma mauaina le meaalofa o le Agaga Paia ua tutu o latou vae i luga o le ala o le avea ma soo ma ua poloaiina ai e mulimuli mausali ma le faamaoni i tulagaaao o lo tatou Faaola.

Na aoao mai e le Faaola e oso a’e le la “i e ua amioleaga atoa ma e ua amiolelei, ma le … ua [e to ifo] i e ua amiotonu ma e ua amioletonu” (Mataio 5:45). O nisi taimi tatou te le malamalama pe aisea e tutupu ai ni mea faigata, pe le talafeagai, i le olaga.Ae i le avea ai ma soo o Keriso, tatou te faatuatuaina afai tatou te “saili ma le filiga, tatalo e le aunoa, ma ia talitonu, … o le a galulue faatasi mea uma mo lo [tatou] lelei, pe afai [tatou] te savavali sao” (MF&F 90:24; ua faaopoopo le faamamafa).

I le avea ai ma tagata o Lana Ekalesia, o le Au Paia, tatou te auauna atu ma le fiafia ma le naunautai i soo se tau ma vaitau uma. Ma a o tatou faia faapea, o le a faatumulia o tatou loto i le faatuatua paia, faamoemoe faamalolo, ma le alofa mama faalelagi.

Ae, e tatau lava ona tatou uia vaitau uma—o taimi fiafia ma taimi tiga. Ae po o le a lava le vaitau, i le avea ai ma soo o Iesu Keriso, o le a tumau lo tatou faamoemoe ia te Ia pe a tatou savavali atu i Lona malamalama.

O le otootoga, o i tatou o le Au Paia a le Atua, ua naunau e aoao ia te Ia, ia alolofa ia te Ia, ma alolofa i o tatou uso a tagata. O i tatou o tagata malaga i luga o le auala faamanuiaina o le avea ma soo, ma o le a tatou savavali ma le mausali e agai atu i la tatou sini faalelagi.

O le mea lea, ia avea i tatou ma Au Paia i le tautotogo, taumafanafana, tautoulu, ma le taumalulu. Ia avea i tatou ma Au Paia mo vaitau uma.