“I Pahn Ieiang Uhk … I Sohte Pahn Keseiukala”

Nan nei pwuken ketemen pwohnget, I pahn ntingihdi, “Met wiahier ehu tiepene me keieu kamarain nan sohte lipilipil tiepene lap me I towehdahr. Mehkoaros wiawihier ni mwohmw keieu lap oh me pid pali ngehn.”

Riei ohl oh lih akan, sounpwong weneu samwalahro ni atail tuhpene nan tiepene lap, ahi pwoud kempoak, Frances, wie wonohn nan imwen wini, pwehki ah pwupwidi ohla rahn kei mwowe. Nan Mei, wihk kei mwurin ah nanti en powehdi ah ohla kan, e waila nan mour soutuk. I inenen loaloidiki. Ngehi oh ih pwopwoud nan Tehnpas Sarawi en Salt Lake ni Oaktohpe 7, 1948. Lakapw pahn wia aht pahr en ketemen nempe 65. Ih mwohn limpoak en ahi mour, iengei likilik, oh kompoakapahi me keieu keren. Ahi kin nda me I loaloidiki sohte pil kak kasalehda uwen loal en ahi pepehm kan.

Tiepene lap wet wia ketemenpen ansou me I malipilipohng Pwihn en Wahnpoaron Ehk-riemeno sang President David O. McKay sounpar 50 samwalahro. Erein pahr pwukat koaros I kin pehm ni ahi pwoud kempoako eh kin utungie ni unsek oh sohte mehkot liki. Ah kin tohnmetei me dir sohte kak wadawadda elehieng ei kak kapwaiada ahi pwukoa malipilip. Sohte pak ehu I kin rong eh kaulim ni ei kin kalapw anahne doadoahk rahn kei oh wihk kei dohsang ih oh nait serihkan. Uhdahn ih tohnleng mehlel.

I men kaping kalahnganki, pil iangahki ahi peneinei, limpoak lap me kumwail kasalehiong kiht sang ansou me Frances sipalla leledohr met. Kisin likou epwikihkei kin pekpekederdo sang nan sampah pwon kaskasale kaping ong ih oh limpoak ong aht peneinei. Se alehdi tesin kan en rohs kaselel. Se kapingki kidelepen sawas en mwohni me kohdahr ong General Missionary Fund en Mwomwohdiso ni ketemenpe. I weliandi kiht koaros me liho mehsangehr, oh kapingkihong kumwail amwail limpoak oh nsenoh.

Me I kin utuhtki mehlel ni ansou kempoake wet iei ahi kadehde en rongamwahu en Sises Krais oh wehwe me I ahniki me ahi werek Frances wie momourte. I ese me aht tohrohrpeseng wet pahn ongete ansou kis. Se katengteng nan tehnpas en Koht sang rehn emen me ahniki manaman en mweidada nanleng oh mweidada nin sampah. I ese me se pahn tuhpene ehu rahn oh sohte pahn pwurehng tohrohrpeseng. Kamarain wet kin utung ie.

Riei ohl oh lih akan, mwein kitail kak nda me sohte emen aramas nan sampah me sohte pehm lokolok oh nsensuwed, oh pil sohte ehu ahnsou nan poadoapoad en aramas me sohte pingiping oh nsensuwed.

Ansou me kitail kin lelohng kahpwal nan mour, mie kasongosong kitail en peidek, “Dah me ngehi ki?” Ekei pak e kin mwomwen sohte marain ni imwin ahlo, sohte dakadahn ketipin pwehn powehdi rotorot en pwohng. Kitail pehm me kitail kapilkihpenehier likidek en ouraman sohte pweida kan oh loaloid en koapwoaroapwoar me kin sohrala. Kitail kin iang kihda pekipek sang nan pwuhk sarawi, “Ia duwe sohte wini nan Kilead?”¹ Kitail kin ahniki pepehm en lekidekla, mohngiong ohla, sopwoupwoula. Kitail kin kakete kilangki atail paisuwed kan kilahs en kaulim. Kitail kin inangih mehkot en apwalihala atail kahpwal kan, manokehla me kanengamah me kin kalapw anahnepe.

Kahpwal kan me kin kohdohng kitail kin kihieng kasongepen atail koahiek en kanengamah oh doudoulahte. Ehu peidek kesempwal me anahnepe en pasapengla iei: I pahn pwupwidi, de I pahn kanekehla? Ekei kin pwupwidi ni arail kin diarada me irail sohlahr kak powehdi arail kahpwal kan. Pwehn kanekehla wehwehki en kanengamah lao lel imwin mour.

Ni atail pahn medemedewe kahpwal kan me kak lel kitail, kitail kak iang Sohp en mahso nda, “Pwe aramas kin ipwidiong nan apwal.”² Sohp iei emen ohl “mwahu men” me kin “pwongih Koht, oh … kin sohpeisang me suwed.”³ Ni eh ahniki mour mwahu, kepwe, Sohp alehdi kasongosong me kak kauwehla aramas sohte lipilipil. Ni ah kepwe koaros eh kohsang ih, kompoakapah kan ahr mwamwahlikihla ih, lokolok pwehki kahpwal pwukat, oh likidengkihla mehlahn ah peneinei, e alehdi kaweid en “lahlahwehki … ke ahpw mehla.”⁴ E powehdi kasongosong wet oh kalohngki sang ni wasa keieu loal kan en ngeni:

“Mie emen me ketiket nanleng me pahn iangiehla oh uhpalihkin ie.”⁵

“I ese me mie mehmen nanleng me pahn ketidohng sewese ie.”⁶

Sohp kolokolte pwosono. Kitail pahn wia duwehte ni atail pahn sohpai kasongosong kan me iei atail?

Ansou sohte lipilipil me kitail pehm atail toutoukihla kahpwal kan en mour, kitail tamataman me mehteikan pil aluhdohr nan ahl wet, kanengamahiongehr, oh pil powehdier.

Poadoapoad en Mwomwohdiso nan irair en ansou pwukat, direki soaiepen irail akan me nannanti ahpw kolokol teng oh koapwoaroapwoar. Kahrepe? Pwe irail kihiengehr rongamwahu en Sises Krais nan werengen arail mour. Ih met me pahn seweseikitail en kanengamahiong kahpwal koaros me pahn kohdo nan atail mour. Kitail pahn ahnikihte irair apwal akan, ahpw kitail pahn kak en sohpai, en wenla mwowe ni soupeikasal, oh powehdi.

Sang nan wasahn lokolok, sang uluhl me wisekesengkihla pilen mahs, kitail kin pwokpwokdahlahng kamehlel sarawi oh inou kesempwalo: “I pahn ieiang uhk [oh] … I sohte pahn keseiukala.”⁷ Soangen kaloalamwahu wet kesempwalsang mehkoaros.

Ni ahi seiloakihier wasa doh nan sampah pwon kapwkapwaiada ahi pwukoa, soahng kei I pil wehwehkihier—ehu irair me pil sohte tikitik iei me aramas koaros kin pehm nsensuwed oh lokolok. I sohte kak en wadekada uwen lokolok oh nsensuwed me I kilangehr ni ahi kin pas rehn aramas akan me mih nan irair en pahtou, soumwahu, mweipeseng, lokolongki seri me sapeik, de lokolongki lipwen dihp. I kak doudoulahte, pwe inenen dir en kahpwal me kitail kak en lelohng. Pwehn kihda ehute karasaras me apwal, ahpw ansou me I kin medewe duwen kahpwal, I kin tamanda Brother Brems, emen sounpadahk en Santi Sukuhl ni ahi mwahnakapwo. Ohlo wia emen tohn Mwomwohdiso poadidi, ohl me mohngiong en kohl. Ih oh ah pwoud, Sadie, naineki seri welimen, tohtohn irail sounparihte kiht seri en nan ahi peneinei.

Mwurin ngehi oh Frances aht pwopwoudda oh keseusang nan wardo, se kin kilang Brother oh Sister Brems oh towe kan en ahr peneinei ni kapwopwoud kan oh mehla kan, oh pil iangahki ni kapokon kan en ward.

Nan 1968 ahn Brother Brems ah pwoud, Sadie, mehla. Riemen en nah seri welimeno pil mehla mwurin sounpar te depe.

Ehu rahn kereniong sounpar 13 samwalahro, nein Brother Brems nah serepein keieu laud delepwohndo. E kawehwehdo me ah pahpa kahlapo lelehr sounpar 105. E nda, “Ohlo kin mih nan wasahn apwalih me mah ahpw kin tuhwong ah peneinei Rahn Sarawi koaros, ih kin kihda ehu padahk en rongamwahu.” E doulah, “Rahn Sarawi et Pahpa Kahlap ndahing kiht, ‘Nei serihkan, I pahn mehla nan wihk et. Menlau likuwerih Tommy Monson. E pahn ese dah me en wia.’”

I kohla rehn Brother Brems nisoutuk en mandao. I wereila sohte kilang ih. I sohte kak lokaiahieng, pwe e solahr rong wasa. I sohte kak ntingihieng ehu kisin likou pwehn wadek, pwe e solahr kilang wasa. Peneineio ndahiengie me ma re pahn lokaiahieng re kin ntingihki nan peh pali meingo sendin pehn pali teio eden aramas me kohdo mwemweit reh. Soahng koaros me ke pahn ndahieng pahn wiawi nin duwe met. I idawehn koasoandi wo oh ale sendin peho ngehi ntingihdi T-O-M-M-Y M-O-N-S-O-N, ahd me e kin esehkinie sangete mahs. Brother Brems perenda, oh ale pehika, oh kihieng pohn moangeo. I ese me e men ale kapai en priesthood. Ohl me weie kohla wasao iangie kiht kihieng peht ka pohn moangen Brother Brems oh kihieng ih kapai me e inangiho. Mwuri, pilen mesehkan wie kerekersang mese kun ko. E poarokedi peht ka ni kalahngan. Mendahte ah sohte kak rong kapakap en kapai me se kihiengiho, Ngehno uhdahn kehlail, oh I kamehele me e kamarainkihier oh wehwehki me se kihdahr kapai me e anahne. Ohl mwahu menet solahr kilang wasa. E solahr rong wasa. E kin mihmi pwohng oh rahn nan pere tikitik ehu nan ihmwo. Ahpw sireio pohn meseo oh ah koasoai inenen sairie. “Kalahngan en komwi,” e nda. “Semei Nanleng inenen mwahu ong ie.”

Nan wihko, duwehte me Brother Brems koasoaiahdao, e sipalla. Sohte pak ehu me e medemedewe ah apwal akan; ihte, e kalkalahnganki ah kapai tohto kan.

Samatail Nanleng, me kin ketkihieng kitail tohto mehn perepereniki, pil mwahngih me kitail kin kasukuhlda oh keirda oh kehlailla ni atail kin sohpai oh powehdi kasongosong kan me kitail anahne en daulih. Kitail ese me mie ansou me kitail pahn ahniki weikek en mohngiong laud, ansou me kitail pahn mwahiei, oh ansou me kitail pahn kasongosong lao lel idin atail koahiek en kanengamah. Ahpw, soangen kahpwal pwukat kin mweidehng kitail en wekila ong me mwahusang, en onehda sapahl atail mour kan ni wiepe me Sahm Nanleng kin padahkihieng kitail, oh en wiahla mehkot weksang me kitail wia mahso—mwahusang me kitail wia mahso, wehwe laudsang me kitail ahniki mahso, kadeksang me kitail wia mahso, oh ahniki kadehde kehlailsang me kitail ahniki mahso.

Met konehng wia atail pwukoa—en nantihte oh kanengamah, ehng, ahpw en pil mwahula oh kehlailla ni pali ngehn ni atail pahn weweid nanpwungen ketipin oh pahtou. Ma sohte kasongosong kan me kitail en powehdi oh kahpwal kan en apwaliala, kitail pahn duweduwehte, ni sohte keirda de kerenlahng atail koasoandi en mour soutuk. Soun ngihso koasoaia duwen met ni lepin mahsen pwukat:

Sounkomouro kelehpw mwahngih uwen loal en atail kasongosong kan, atail medek, oh atail lokolok. Ih kelehpw kin ketkihieng kitail popohl soutuk nan ansou apwal akan. Ih kelehpw kin kamwahuihki ngenitail lokolok kan Sapwellime mahsen en kamwahu kan:

“Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla.

“Kumwail ale oh kapaikada ei mehn wisiket, oh kumwail padahngki sang ie, pwe I me opampap oh nan kapehd karakarahk: kumwail ahpw pahn diar kommoalpen ngenomwail kan.

“Pwe mehn wisik me I pahn kihong kumwail me mengei, oh audepe kan me marahra.”⁹

Menda ma e wia ansou me keieu mwahu de ansou me keieu suwed, E kin ketiket rehtail. E ketin inoukihier me met sohte pahn wekila.

Riei ohl oh lih akan, kitail en ahniki loaloapwoat ong Samatail Nanleng me sohte kin duwehte uh me kin kohdo de kohla de wekiwekidek peian pahr akan de kahpwal akan nan atail mour. Kitail sohte konehng en anahne ahniki irair en apwal pwehn tamataman Ih, oh kitail sohte konehng en mihla pahn atail kahpwal kan mwohn atail pahn patohwanohng Ih atail pwoson oh atail likilik.

Kitail en nannanti ansou koaros en karanih Samatail Nanleng. Pwehn wia met, kitail anahne kapakap ong Ih oh rong Ih rahn koaros. Kitail anahne Ih nan awa koaros, mendahte ma e wia ansoun ketipin de keteu. Kitail en tamataman ansou koaros Sapwellime inouo: “I pahn ieiang uhk … I Sohte pahn keseiukala”¹⁰

Sang ni kehl en ngeniet unsek, I kadehde me Koht ieias oh poakohng kitail, me Sapwellime Iehros mourki oh pwoukinkitailla, oh me rongamwahu en Sises Krais me wia marain me kin dakerada nan rotorot en atail mour kan. En wia duwe met erein, iei duwen me I kapakapki ni lengileng sarawi en Sises Krais, ahmen.