Na Faasilasila atu le Faatupulaia o le Faitau Aofai o Tagata ma Faifeautalai i le Konafesi Aoao

Ua ausia le 15 miliona o le faitau aofai o tagata o le Ekalesia, na faasilasila ai e Peresitene Thomas S. Monson i le sauniga na tatalaina ai le Konafesi Aoao Lona 183 Faaleafatausaga i le aso 5 Oketopa, 2013. Sa ia faasilasilaina ai foi e faapea talu lava ona tuu i lalo le tausaga mo auaunaga faafaifeautalai ia Oketopa 2012, ua matua televave lava le faatupulaia o faifeautalai faamisiona i le lalolagi atoa—mai le 58,500 i le 80,333.

“O loo faaauau pea ona tuputupu ae le Ekalesia ma le mausali ma ua suia ai olaga o tagata e toatele i tausaga uma,” sa saunoa ai Peresitene Monson. “Ua salalau atu i le salafa o le lalolagi a o saili e a tatou faifeautalai i latou o loo sailia le upumoni.”

Sa ia uunaia tagata o le ekalesia ma faifeautalai ia aufaatasi le tasi ma le isi i le faasoaina atu o le talalelei. “O le taimi lenei mo tagata uma ma faifeautalai e o mai faatasi ai, ia galulue faatasi, ma galueaiina le tovine a le Alii ina ia aumai agaga ia te Ia,” sa saunoa ai Peresitene Monson, lea ua atoa nei le 50 tausaga talu ona auauna atu o se Aposetolo.

I le sauniga o le aoauli o le Aso Toonai, e toatolu ia uso o le Korama Muamua a Fitugafulu—Elder John B. Dickson, Paul E. Koelliker, ma F. Michael Watson—na faamaloloina ai ma le mamalu ma aloaia o ni pulega aoao ua malolo ma le mamalu, faapea ai foi ma Elder Kent D. Watson o le Korama Lona Lua o Fitugafulu na faamaloloina foi ma le mamalu. E faaopoopo atu i ai, o Julio A. Angulo, 45, o Bogotá, Kolomupia; Peter F. Evans, 54, o le Aai o Sate Leki, Iuta, ISA, ma Gennady N. Podvodov, 47, o Donetsk, Iukureini, sa lagolagoina o ni Fitugafulu Eria. Sa faasilasila ai foi le faamaloloina o César H. Hooker ma Craig T. Wright o ni Fitugafulu Eria.

E faitau miliona tagata na maimoa pe faafofoga i le konafesi i le lalolagi atoa e ala i faasalalauga i televise, Initoneti, leitio, ma satelite. O le taimi muamua lenei, na maua ai le sauniga a le au perisitua i le afiafi o le Aso Toonai i luga o faasalalauga faatelevise faapea ma faasalalauga tuusao i luga o le Initoneti. E silia ma le 100,000 tagata na auai i sauniga e lima i le Nofoaga Autu mo Konafesi i le Aai o Sate Leki, Iuta, i le aso 5 ma le 6 o Oketopa. Sa maua foi le konafesi e auala atu i ala o faasalalauga eseese i gagana e 95 ma faasalalau atu ai i atunuu ma teritori e 197.

Sa faamaeaina e Peresitene Monson le konafesi i se aioiga mo tagata o le Ekalesia ina ia faaali se agalelei faateleina i le tasi ma le isi ma ia “maua pea … o faia e le aunoa le galuega a le Alii.”