Faʻu ʻo ha Peesi Mītiá maʻá e Kau Taki ʻo e Siasí

Kuo fokotuʻu ʻe he Siasí ha peesi mītia fakasosiale maʻá e kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻi he Facebook mo e Google Plus. ʻE hoko ʻeni ko ha ʻū peesi fakaʻofisiale maʻá e Takimuʻa takitaha, pea te nau takitaha pule pē ki heʻenau peesi kae tokangaʻi ʻe he Siasí maʻanautolu.

ʻE lava ke maʻu ʻa e ʻakauni fakaʻofisiale ʻi he Facebook mo e Google Plus ʻaki haʻamou fekumi ki ai ʻi he facebook.com/lds mo e plus.google.com. Ke ʻiloʻi pe ʻoku moʻoni ha saiti pe peesi mītia fakasōsiale, kumi pe ʻoku ʻasi ai e fakaʻilonga (logo) ʻa e Siasí.

Ko kinautolu ʻoku nau muimuiʻi e ʻū pēsí ni te nau maʻu ai e ngaahi fakamatala fakamuimuitaha ki he ngāue ʻa e Takimuʻa takitaha. Naʻe pehē ʻe Teili Sōnasi, ʻo fakafofongaʻi e Siasí, “ʻE hanga ʻe he Siasí ʻo fakahū ki ai ha ngaahi fehokotakiʻanga ki he ngaahi lea, fakamatala, vitiō mo e ngaahi nāunau kehe ʻe fie maʻu maʻanautolú.”

ʻE hanga ʻe he ʻū peesi ko ʻení ʻo fakaʻatā ki he kakaí ke faingofua ange ai ʻenau lau e lea ʻa e kau palōfita moʻuí pea ʻe hanga ʻe heʻenau “saiʻia” aí, ʻo ʻai ke hā e ngaahi nāunau ko ʻení ʻi he konga ʻo e Facebook ʻoku hā ai ʻa e ngaahi fakamatala ʻoku fokotuʻu ʻe ha taha (feed), ʻa ia ʻe lava ke mamataʻi mo vahevahe atu ʻe he niʻihi kehé he taimi pē ko iá.

ʻOku tokoni hono fokotuʻu e ʻū peesi fakaʻofisialé ke ʻiloʻi ʻe he kāingalotú ʻa e ʻū peesi ʻoku tokangaʻi ʻe he Siasí pea maluʻi ai e fakafoʻituituí mei he ʻū peesi loí.