Mubotum Akyɛ Mormon Nwoma a?

Me nsɔwdo skuul afe a odzi kan mu no, me seminary kyerɛkyerɛnyi kãa kyerɛɛ m’adzesũafo no dɛ yɛmfa Mormon Nwoma no bi mma anyɛnkofo a wɔnnyɛ asɔrmba. Nna mefɛer adze paapapa dze, naaso megyee too mu.

Midzii nda kakra ana mirenya akokodur no, mbom nkyii memaa me nyɛnko Britny nwoma no bi ewiaber edzidzi ber, na megyee dasegye tsiabaa. Britny daa me ase wɔ nwoma no ho.

Skuul afe n’ewiei no, Britny tuui, mbom nna yɛkɔdo nya nkitahodzi. Ɔkãa ne skuul fofor ho nsɛm kyerɛɛ me na mbrɛ n’anyɛnkofo nyina yɛ Asɔrmba, mbom ɔannkã sunsum mu asɛm biara annkyerɛ me.

Dɛm sesãa ansaana mirifir edzi akɔ m’asɛmpakã. Menyaa amandzɛɛbɔ bi fii Britny hɔ dɛ ɔwɔ asɛm kɛse bi ma me: wɔrobonuma no, na ɔpɛ dɛ ɔda me ase dɛ mayɛ ne nyɛnko na makyerɛ fasusu pa.

Nyame faa mfe-15-banyimba a ɔfɛr adze a onnyi asɛmpasomafo sũahu biara na Ɔkyerɛɛ no obi a Onyim dɛ ɔbɛgye asɛmpa no dɛ ɔnye no nkyɛ. Minyim dɛ sɛ yetsie Sunsum no a, yebotum ehu nkorɔfo a woetwa hɛnho ehyia a wɔrotweɔn esũa afa asɛmpa a wɔdze asan aba no ho. Minyim dɛ sɛ yɛboa dze nyimpa kor mpo brɛ Ewuradze a, “mbrɛ [ye]bodua nye no edzi dɛw wɔ [hɛn] Egya n’ahenman no mu a!” (N & A 18:15).