Yac Nga kuh in Akacsruhi ke sie Puk luhn Mormon?

Ke yac se emet luhk ke high school ah, mwet luti luhn seminary luhk ah suli kuhlahs luhk ah in sang kapi luhn Puk luhn Mormon nuh sin kawuck ma tiac mempucr uh. Nga ne mwekihn na pwacye, nga eis solsol sac.

Nga sislah lwen ekahsr in puhlaikyak, tuhsruhk kais kuhtuh na ne nga sang nuh sin kawuck se luhk ah Britny puk se ke pacl in mongo in infulwacn lwen ac oruh fahkwack luhlahlfongi fototo se. Britny el fahk kuloh nuh sihk ke puk sac.

Ke sahflahiyacn yac sac, Britny el mukwilac, tuhsruhk kuht srwackna asramsrami. El sruhmuhn nuh sihk lutlut lal ah ac lah apkuhran in kawuck lal nuh kwewa mempucr ke Alu uh, tuhsruhk el tiac wi sramsramkihn kuhtwena ma ke ip luhn nguhn nuh sihk.

Eklac met liki nga som nuh ke misin luhk ah. Nga eis pweng se sel Britny fahk lah oasr pweng na yohk srihpac se lal nuh sihk: el ac pacptaislac, ac el ke fahk kuloh nuh sihk ke nga kawuck nuh sel ac oruh sie mwe srihkasrak wowo.

God El sang tuhlihk mukul mwekihn matwac 15 se ma wacngihn etuh luhn misineri la ac kohlohllah in akacsruhi ke wosasuc nuh sin mwet se El etuh ac insese nuh kac. Nga etuh lah in porongo ke Nguhn, kuht nuh kwewa kuh in sokwack mwet rauni kuhtlac suc ma tuhpan in lohng wosasuc fohlohkyak sac. Nga etuh lah kuht fin kahsruh in use finne mwet se nuh yurin Leum, engan lasr uh ac wo yurin mwet sacn ke tohkohsrahi luhn Pahpah tuhmasr! (liye D&C 18:15).