Sucu ac Kawuck Ne Tok

Acn nuh kwewa kom muhta we an, oasr kawuck lom suc suk ke mwe engan yohk ma kom sokwack ke moulkihn wosasuc fohlohkyak luhn Jisus Kraist. Sahp elos koflah ahkuhtweyac ke kahs mwe engan sacn, tuhsruhk elos kuh in akihlen ke elos liye ke moul lom an. Elos ac fah semuhtweng in lutlutkihn kuhfa luhn mwe engan sacn, yohkna ke elos liye lah kom sun ma upac oacna elos.

Kom puhla mwe engan ke kom liyacacng masap luhn God uh. Pa ingacn mwe insewowo uliyucklac ke moulkihnyacn wosasuc (liye Mosiah 2:41). Kom tiac oaru in ahkos masap luhn Leum in liyeyuck sin mwet sahyac, tuhsruhk elos suc tuni mwe engan lom uh pa ahkoeyucklac sin Leum in lohng pweng wo ke Fohlohkyak luhn wosasuc uh.

Mwe insewowo ma utuckot nuh sum tari an orwaclah kunohkohn ac pacl na wolacna nuh sum. In oa sie mwet tuhma lutlut olweacng luhn Jisus Kraist, oreklac kom in tahfwelah nuh sin mwet sahyac sie pacl wowo in suk mwe engan yohk, yohk na nuh sin kawuck lom an ac mwet ke sucu lom an.

Leum El liye pacl wowo lom ac ahkuhtweyac kunohkohn ke El fahk lah ma kunen mwet nuh kwewa suc sensenkackihnyuck tari nuh se in sensenkihn nuh sin mwet tuhlan la an (liye D&C 88:81).

Leum El ahkfihsracsryelah masap sac in ahkosyuck ke eklac se ma sikyak ke insiyom ke kom eis ac moulkihn wosasuc luhn Jisus Kraist. Sahflahiyac ah, luhngse lom nuh sin mwet sahyac an kapwack, oacna kena lom nuh selos in eis mwe engan se pacna kom puhlakihn an.

Sie mwe srihkasrak ke eklac sac pa ohiyacn paing lom nuh ke pacl in kahsruh orekma luhn misineri luhn Leum. Misineri ke pacl nuh kwewa sa etwacack lah elos kuh in motko in eis sin sie mwet eklac na pwacye top kuhlwacng ke elos siyuck selos ke mwet in luti. Mwet ma eklac wo uh kena kawuck ac mwet ke sucu in akacsruhi ke mwe engan lalos.

Ke mwet kol ke misin luhn ward kuh misineri uh siyuck ke inen mwet in luti uh, mwe kaksyak yohk se nuh sum. Elos etuh lah kawuck uh liye tari mwe engan lom uh ac, pwacnwacng, kawuck ingoh ahkolah tari in lohng ac sulaclah in eis wosasuc. Ac oasr puhla wo lalos lah kom ac fah kawuck ma elos ac fah enenuh ke elos eklac mwet ke Alu uh.

Kom tiac enenuh in sahngweng lah ac wacngihnlac kawuck lom ke kom suli misineri uh in sonolos uh. Oasr kawuck luhk suc tiac luhngse misineri uh tuhsruhk kulohkihn nuh sihk ke yac pucspucs ke nga sang nuh selos sie ma elos etuh lah sacohk na pwacye nuh sihk. Kom kuh in kawuck ne tok ke tuhkahkihn wosasuc uh, suc elos liye lah usot mwe engan lom. Nimet sislah sie pacl wowo in suli sie kawuck an ac yohkna nuh sin sie mwet ke sucu in sulaclah in ukwe plwacn luhn mwe engan uh.

Wacngihn pacl wowo yohk nuh ke solsol sacn liki na lun tempuhl luhn Alu uh. We Leum El kuh in sang akwuck luhn molwelah nuh sin mwet mahtuh lasr suc tiac kuh in eis ke moul uh. Elos ngweti nuh yurum ke luhngse ac finsrak. Leum El olwelah tari lah ac fah oasr pacl wowo lalos in tuhkuh nuh in tohkohsrahi Lal (liye D&C 137:7–8), ac El kahsrwe kom in puhla luhngse nuh selos.

Puhs suwos puhla tari engan ke sang akwuck ke tempuhl nuh sin mwet sahyac, oacna ke kom oruh ke kom sang inen mwet nuh sin misineri in ohsun nuh se uh. Kom puhla tari finne engan yohk in oruh akwuck uh nuh sin mwet mahtuh lowos an. Tuh ahkkahlwemyeyyuck nuh sel Mwet Pahluh Joseph Smith lah mwe engan ma pahtpaht lasr uh kuh in oasr kuht fin sang nuh sin mwet mahtuh lasr inkacnek se in eis mwe insewowo sacn ke akwuck luhn tempuhl nuh sin mwet misac (liye D&C 128:18).

Pacl in Krismas oruh kuht in motko ke nuhnak loal ac puhla lasr ke Mwet Lahngo ac engan ma wosasuc Lal use nuh sesr uh. Kuht ahkkahlwemye wo srui lasr nuh Sel ke kuht sang mwe engan sac nuh sin mwet sahyac uh. Srui eklac nuh ke engan ke kuht sang ine nuh sin misineri uh ac ke kuht us inen mwet mahtuh lasr nuh ke tempuhl uh. Kahlwemiyacn srui lasr uh kuh in oruh kawuck ac sucu lasr uh in ma ne tok.