Utuafare e Hoa e a Muri Noa’tu

Noa’tu te vahi te ora ra outou, e hoa to outou e imi ra i te oaoa rahi a‘e ta outou i ite mai na roto i te oraraa i te evanelia a Iesu Mesia tei faaho‘i-faahou-hia mai. Eita paha ta ratou e nehenehe e ta‘o papû i taua oaoa ra, ua ti‘a râ ia ratou ia haro‘aro‘a i te reira a ite ai ratou i te reira i roto i to outou oraraa. E hinaaro ratou ia haapii mai i te tumu no taua oaoa ra, e no te mea atoa râ, te ite nei ratou e, te faaruru nei outou i te mau tamataraa mai ia ratou atoa.

Ua farii outou i te oaoa no to outou haapa‘oraa i te mau faaueraa a te Atua. Tera mau te hotu i fafauhia no to outou oraraa i te evanelia (hi‘o Mosia 2:41). Aita outou e haapa‘o maite nei i te mau faaueraa a te Fatu ia itehia mai outou e te taata, noa’tu râ, no ratou e hi‘o nei i to outou oaoa, te faaineinehia ra ratou e te Fatu no te faaroo i te parau apî maitai no te Faaho‘i-faahou-raa mai o te evanelia.

Na teie mau haamaitairaa tei horo‘ahia mai ia outou i faatupu i te mau titauraa e te mau rave‘a faahiahia no outou. Ei pĭpĭ na Iesu Mesia tei rave i te fafauraa, ua titauhia ia outou ia faatae ia vetahi ê i te rave‘a e itehia mai ai te oaoa rahi a‘e, i to outou ihoa râ mau hoa e mau fetii.

Ua ite te Fatu i te rave‘a na outou e ua faataa mai i ta outou titauraa na roto i teie faaueraa : « E mea ti‘a roa i te taata atoa tei faaarahia ra ia faaara’tu i to’na ra taata tupu » (PH&PF 88:81).

Ua faaohie a‘e te Fatu i taua faaueraa ra ia haapa‘ohia na roto i te tauiraa e tupu nei i roto i to outou aau a farii ai e a ora atoa ai outou i te evanelia a Iesu Mesia. Ei hopearaa, e tupu to outou here no vetahi ê i te rahi, mai to outou atoa hiaai ia farii ratou i taua oaoa nei ta outou iho i farii.

Hoê hi‘oraa no taua tauiraa nei, o to outou ïa huru i te fariiraa i teie fana‘o ia tauturu atu i roto i te ohipa misionare a te Fatu. E ite oioi mai te mau misionare rave tamau e, ua ti‘a ia ratou ia farii mai, mai roto mai i te hoê melo faafariu mau, te hoê pahonoraa au i te titauraa no te tahi taata ia haapii. Te vai ra te hiaai i roto i te melo faafariu no te mau hoa e te mau fetii ia amui atoa mai ratou i roto i teie oaoa to’na.

Ia ani ana‘e mai to outou taata faatere ohipa misionare no te paroisa e aore râ te mau misionare i te i‘oa no te tahi taata no te haapii atu, e tapa‘o te reira no te parau haapopou ia outou. Ua ite ratou e, te ite noa nei te mau hoa i to outou oaoa, e no reira, ua faaineinehia taua mau hoa ra no te faaroo e no te ma‘iti ia farii i te evanelia. E e tiʻaturiraa atoa to ratou e, o outou mau te hoa e hinaaro ratou no te tomo mai i roto i te basileia.

Eiaha roa’tu outou e taiâ ia moʻe atu to outou mau hoa na roto i te aniraa i te mau misionare ia farerei ia ratou. E mau hoa ta’u tei ore i farii i te mau misionare, tera râ, ua haamauruuru mai ratou ia’u na roto i te mau matahiti e rave rahi no te pûpûraa ia ratou i te hoê mea ua ite ratou e mea faufaa roa no’u. E nehenehe ta outou e faariro i te mau hoa ei mau hoa e amuri noa’tu na roto i te pûpûraa’tu i te evanelia, ratou hoʻi tei ite i te faataeraa te reira i te oaoa ia outou. Eiaha roa’tu e fariu ê i te hoê rave‘a no te titau manihini i te hoê hoa, e hau atu râ, te hoê fetii, ia ma‘iti ia pee i te faanahoraa no te oaoa.

Aita e rave‘a rahi a‘e no taua titauraa manihini ra maori râ i roto i te mau hiero o te Ekalesia. I ô, e nehenehe ta te Fatu e pûpû i te mau oro‘a no te faaoraraa no to outou mau tupuna tei ore i fana‘o i te reira i roto i te oraraa. Te hi‘o nei ratou i ni‘a ia outou ma te here e te ti‘aturi. Ua fafau te Fatu e, e riro ratou i te farii i te rave‘a no te haere mai i roto i To’na basileia (hi‘o PH&PF 137:7–8), e ua tanu Oia i te here no ratou i roto i to outou aau.

E rave rahi o outou tei farii i te oaoa no te pûpûraa i te mau oro‘a o te hiero ia vetahi ê, mai te reira atoa ia horo‘a outou i te i‘oa o te taata i te mau misionare ia fareireihia ratou. E ua hau roa’tu to outou oaoa i te raveraa i te mau oro‘a no to outou mau tupuna. Ua heheuhia i te peropheta Iosepha Semita e, e tae to tatou oaoa mure ore maoti râ, ia pûpû tatou i te eʻa no taua haamaitairaa ra i to tatou mau tupuna e ti‘a’i nei, na roto i te mau oro‘a monoraa i te hiero (hi‘o PH&PF 128:18).

E faafariu te tau noela i to tatou aau i te Faaora ra e i te oaoa ta Ta’na evanelia i hopoi mai. E faaite tatou i to tatou mauruuru Ia’na a pûpû ai tatou i taua oaoa ra ia vetahi ê. E riro te mauruuru ei oaoa a pûpû ai tatou i te mau i‘oa i te mau misionare e a hopoi ai tatou i te mau i‘oa o to tatou mau tupuna i te hiero. Na teie parau papû no to tatou mauruuru e nehenehe e taamu i to tatou mau hoa e mau utuafare e a muri noa’tu.