Parau Poroʻi na te mau Tuahine Hahaere, Titema 2013
Te Misioni Hanahana a Iesu Mesia : Te Tamaiti Fanau Tahi
A tuatapapa na roto i te pure i teie materia ma te imi ia ite eaha te faaite atu. Nahea te maramaramaraa i te oraraa o te Faaora e i Ta’na misioni e faarahi ai i to outou faaroo Ia’na e e haamaitai ai i te feia ta outou e haapa‘o nei na roto i te mau tere hahaereraa ? No te mau haamaramaramaraa hau atu, a haere i ni‘a ia reliefsociety.lds.org.
Te Faaroo, Te Utuafare, Te Totauturu
Ua parauhia to tatou Faaora, o Iesu Mesia, te Tamaiti Fanau Tahi no te mea o Oia ana‘e te taata i ni‘a i te fenua tei fanauhia i te hoê metua vahine tahuti e te Metua Tane tahuti ore. Ua farii oia i te mau mana hanahana na roto mai i te Atua, To’na Metua Tane. Na roto mai i To’na metua vahine, o Maria, ua farii Oia i te huru tahuti, e e roohia Oia i te poia, te poihâ, te rohirohi, te mauiui e te pohe.1
No te mea o Oia ana‘e, o Iesu Mesia, te Fanau Tahi a te Metua, ua ti‘a Ia’na i te horo‘a i To’na ora e te rave faahou mai. Te haapii nei te mau papa‘iraa mo‘a e, « na roto i te taraehara a te Mesia », e roaa ia tatou « te ti‘a-faahou-raa » (Iakoba 4:11). Te haapii atoa nei tatou e, te taatoaraa e « faati‘a-tahuti-ore-hia mai… i te ora mure ore » mai te peu e « faaroo » tatou (PH&PF 29:43).
A maramarama hope roa ai tatou i te auraa i te parau e, e Tamaiti Fanau Tahi Iesu na te Metua, e rahi atoa’tu to tatou faaroo i te Mesia. Ua parau Elder D. Todd Christofferson no te Pŭpŭ no te Tino Ahuru Ma Piti Aposetolo e, « Te faaroo ia Iesu Mesia, o te mana‘o papû ïa e te ti‘aturi papû i (1) To’na ti‘araa ei Tamarii Fanau Tahi na te Atua, (2) Ta’na Taraehara hope, e (3) To’na ti‘a-faahou-raa mau ».2 Ua faaite papû mai te mau peropheta no teie anotau e : « O [Iesu Mesia]… te Tamaiti Hoê roa i roto i te tino, te Faaora o to te ao nei ».3
No roto mai i te mau Papa‘iraa Mo‘a
Ioane 3:16; Te Parau Haapiiraa e te Mau Parau Fafau 20:21–24; Mose 5:6–9
No roto mai i to Tatou Aamu
Tei roto i te Faufaa Apî te mau aamu no te mau vahine, tei itehia e tei ore i itehia, tei faaohipa i te faaroo ia Iesu Mesia, tei haapii e tei ora i Ta’na mau haapiiraa, e tei faaite i to ratou iteraa papû no ni‘a i Ta’na ohipa, Ta’na mau semeio e To’na hanahana. Ua riro teie mau vahine ei mau pĭpĭ hi‘oraa maitai e ei feia ite faufaa rahi i roto i te ohipa no te faaoraraa.
Ei hi‘oraa, ua faaite o Mareta i to’na iteraa papû puai no te hanahana o te Faaora a parau ai oia Ia’na e, « Ua faaroo vau e, o oe te Mesia te Tamaiti a te Atua o te haere mai i te ao nei ra » (Ioane 11:27).
Te tahi o te mau ite matamua no te hanahana o te Faaora, o To’na metua vahine ïa, o Maria, e to’na fetii o Elisabeta. I muri noa mai to te melahi Gaberiela fâraa ia Maria, ua haere oia ia Elisabeta ra. I te taime ihoa a faaroo ai Elisabeta i te reo o Maria, ua « î a‘era Elisabeta i te Varua Maitai » (Luka 1:41) e ua faaite papû e, e riro mai Maria ei metua vahine no te Tamaiti a te Atua.
© 2013 by Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/13. Parau faati‘a no te iritiraa : 6/13. Iritiraa no Visiting Teaching Message, December 2013. Tahitian. 10672 895
Eaha Ta’u e Nehenehe e Rave?
-
No te aha e mea faufaa rahi no’u iho ia maramarama i te mau ti‘araa o Iesu Mesia?
-
Nahea to tatou faaroo i te faarahihia a haapa‘o ai tatou i ta tatou mau fafauraa?