O Le Auala Faaofuofu o le Manumalo

I le taimi o le tautotogo, sa ma auai atu ai ma lo’u toalua i le taaloga lakapi faa-Amerika a le tama tama a le ma tama e fa-tausaga le matua. Na fiafia tagata uma ao taufetuli atu tamaiti i soo se itu e tuli le polo. Ina ua ili le faaili mulimuli, e lei iloa e tagata taaalo po o ai ua manumalo ae po o ai ua faiaina. Sa na o lo latou taaalo lava i le taaloga.

Na talosagaina e faiaoga o au ia le au taaalo e faatalafo ma le isi au. Ona matou iloa atu lea o se mea mataina. Sa valaau atu le latou faiaoga e fai se auala faaofuofu o le manumalo.

Na tutu i luga matua, matua o matua, ma soo se tagata na o mai e matamata i le taaloga ma faatulaga ni laina se lua e faafesagai le tasi ma le isi. Ona siiina lea i luga o latou lima ma fatuina se faitotoa faaofuofu. Na feei tamaiti ao latou tamomoe atu i lalo o lima o tagata matutua o loo faamalo atu ma agai atu ai lava i le ala.

E lei umi ae filifili foi tamaiti mai le isi au e auai i le fiafia. Na faamalo uma atu tagata matutua i au taaalo uma ao latou tamomoe atu i le auala faaofuofu o le manumalo.

I lo’u mafaufau sa ou iloa atu se isi ata. Sa ou maua le lagona o loo ou vaai atu i nei fanau o ola i le fuafuaga a le Tama Faalelagi na fatuina mo tamaiti uma. Sa latou tamomoe i le ala lauitiiti ma vaapiapi, i lalo o lima o tagata e alolofa ia i latou. Na lagona e tamaiti taitoatasi le olioli ina ua i ai i le ala.

Sa “fai e [Iesu Keriso] le ala ma taitai mai” mo i tatou taitoatasi.¹ Afai tatou te mulimuli i Lana taitaiga, o le a tatou toe foi uma atu i lo tatou aiga faalelagi ma saogalemu ai i aao o le Tama Faalelagi.