Talofa, Tamai Mamoe

Sa ma fesoasoani atu ma lo’u toalua i le ma tama teine ma lana fanau tama e toalua i le malae vaalele, lea na latou sauniuni ai mo le latou malaga toe foi atu i le aiga. Na ma fesoasoani i le ma tama teine ao fealuai ma siaki ia atopau, sue tusifolau, ma vaaia se tamaitiiti ulavale e tolu tausaga. O Tommy, o le atalii a le ma tama teine, e tasi tausaga na moegapepe i totonu o lana taavale toso seia oo ina ua faafuasei ona ala i luga. Sa fefe o ia ao taumafai ia masani i le pisa, sesega o moli, ma le vevesi lautele.

Sa ou vaaia ona foliga ma iloa ai le mea o le a tupu, o lea sa ou valaau atu i lau tama teine. Sa vave ona ia punou i lalo, opo mai ona foliga i ona lima, pupula sao atu i ona mata, ma fai atu ma le agaalofa, “Talofa, tamai mamoe”.

I se taimi vave lava na suia ai lona muaulu maanuminumi, gutu faauu, ma ua vaivai ona tauau ao maua e lona tino le toa. Na ia tuuina mai se ataata laiti a o le’i toe moeiini ona laumata. Sa suia lona fefe i se faamautinoaga toafimalie ma le filemu lea e foliga mai ua siomia ai o ia. O se faaaliga laitiiti ae mamana o le faatuatuaina e Tommy o lona tina. O lana pa’i mai masani, leo, ma le i ai iina na faamafanafana ai o ia.

Faapei o Tommy, na tatou lagonaina uma le fefe, le le mautonu, ma le lofituina. E lagona le mafanafana i le iloa o Iesu Keriso, o le leoleo Mamoe Lelei, o loo valaau mai ia i tatou. Na te silafia Lana lafu, ma e mafai ona tatou faalagolago atoatoa ia te Ia. Na ia saunoa ma le alofa, “Ou te tuuina atu ia te outou le manuia, o lo’u manuia ou te avatu ai ia te outou. … Aua le atuatuvale o outou loto, aua foi tou te matatau” (Ioane 14:27).

Ou te iloa o le taimi o le le mautinoa e mafai ona tatou maua ai le mafanafana ma le faamautinoaga ao tatou liliu atu i le Leoleo Mamoe Lelei ma le faatuatua ma le faalagolago. Pe faamanuiaina au i le toafilemu i le ogatotonu o le vevesi, ou te fiafia e tomanatu i lena taimi i le malae vaalele faatasi ai ma la’u tama teine ma lana tama tama. Faapei o Tommy, ou te manavaina se mapuea ao faamamaina a’u avega. I le aluga o na taimi, ou te lagona ai se faamalo patino “Talofa, tamai mamoe” mai lo’u Leoleo Mamoe.