O Ai e Fia Tatalo?

I la’u misiona, na ma aoao ai ma la’u soa se aiga e i ai ni tamaiti se toatele. I se tasi o taimi e faatulaga ai ma fuafuaga, sa ma tatalo ai ma talatalanoa po o le a le lesona e sosoo e tatau ona ma aoaoina i tamaiti, ma sa ma malilie uma e aoao atu e uiga i le tatalo.

Ina ua ma taunuu i lo latou fale, sa matuai fiafia le tina matua ma tamaiti.Sa ma amataina le lesona i se tatalo. Na filemu ma sauni tamaiti e faalogo. Na ma faamalamalamaina ia i latou le auala ma le mafuaaga e tatalo ai. I le faaiuga o la maua lesona, na ma fesili atu ia te i latou, “O ai e fia tatalo faaiu?”. Sa mananao uma i latou e tatalo! O lea sa matou faia ai se faatulagaga mo i latou e tuuina atu ia tatalo i taimi uma lava ma te o mai e fai le lesona. Sa ma valaauliaina foi i latou e tatalo pe a ma le i ai.

Ina ua mavae lena lesona, sa ou mafaufau, “Aisea e faigofie ai i le fanau iti le tatalo ao ma tagata sailiili matutua atu e fai si faigata o le tatalo?” Sa ou mauaina se tali i le Bible Dictionary [Lomifefiloi o le Tusi Paia]: “A outou aoaoina loa le sootaga moni o i tatou ma le Atua (faapea, o le Atua o lo tatou Tama, ma o i tatou o Ana fanau), ona avea lava lea o le tatalo ma a tatou mea masani ma faaosofia i le loto (Mata. 7:7–11). O le tele o faigata ia e ta’ua e uiga i le tatalo e tulai mai mai le faagaloina o lenei mafutaga” (“Tatalo”; tagai foi i le Taiala i Tusitusiga Paia, ”Tatalo,” scriptures.lds.org).

Talu mai lena taimi, ua ou taumafai e fesoasoani i tagata ia malamalama i o latou sootaga moni ma lo tatou Tama oi le Lagi. E finagalo lo tatou Tama oi le Lagi e talanoa i Ana fanau, e pei lava ona mananao o tatou matua faalelalolagi e talatalanoa faatasi ma i tatou. E alofa o Ia ia i tatou, e finagalo o Ia e talanoa ma i tatou, ma e finagalo o Ia ina ia tatou talanoa atu ia te Ia.