ʻOkú ne Fie Maʻu ʻa e ʻOfá

Naʻe ʻikai ko ha talavou taʻu hongofulu tupu makehe au pea siʻi ha taimi ne fakamoleki ke tokoniʻi e niʻihi kehé. Lolotonga e taimi ko ʻení naʻe fakaafeʻi au ʻe heʻeku fineʻeikí ke ma ō ʻo ʻaʻahi ki he tokoua ʻeku kui fefiné ʻi ha ʻapi ʻo e kau toulekeleká.

Ne mau ō mo e taʻahine ʻoku ou tokoua ʻaki mo ʻene tama fefine ko Sitefanī ʻi he ʻaʻahi ko ʻení. Naʻe taʻu fitu pe valu ʻa Sitefanī. ʻI heʻemau hū ki he ʻapi ʻo e kau toulekeleká, naʻá ne taʻataʻalo ki he tokotaha kotoa pē naʻá ne sio ki aí. Naʻa nau malimali ʻo hangē naʻá ne tufa atu e huelo ʻo e laʻaá mo e ʻumatá. Ka naʻá ku fakaʻehiʻehi mei he sio hangatonú.

ʻI he taimi naʻa mau hū atu ki he loki e tokoua ʻeku kui fefiné ʻa ia naʻá ne loki mo ha fefine toulekeleka ʻe taha, ne u fai hoku lelei tahá ke nofo atu pē mei mui. Ka naʻe puna ʻa Sitefanī ia ki he mohenga e tokoua ʻeku kuí pea kamata ke fai ha ngaahi talanoa.

Naʻá ku fakatokangaʻi ha meʻa fekauʻaki mo e loki ko ʻení. Naʻe ʻi he tafaʻaki e tokoua ʻeku kui fefiné ha ngaahi fakaʻilonga ʻo e ʻofá mo e fāmilí. Ne tau ha ngaahi tā mo ha tā fakatātā ʻaki e kalá he holisí, pea teuteuʻi ʻe he ngaahi matalaʻi ʻakaú ha tēpile laukongá. Naʻe ʻikai ha meʻa ia he tafaʻaki ʻe taha ʻo e lokí. Naʻe ʻikai ha fakaʻilonga ʻo ha kau ʻaʻahi; kaati pe tautau he holisí ha ngaahi fakatātā.

Naʻe tangutu toko taha pē ʻi ha sea saliote teketeke ʻa e kaungā loki ʻo e tokoua ʻeku kuifefiné pea naʻe ʻikai haʻane tokanga mai kiate kimautolu. Naʻá ne ngūngū ha foʻi fasi pea tātā e nima hono sea saliote teketeké, ne u kiʻi ongoʻi taʻefiemālie ai.

Ne fusi ʻe Sitefanī e nima ʻo ʻene faʻeé pea fehuʻi ange, “Fineʻeiki, ko e hā e meʻa ʻoku hoko ki he fefine ko eé?” Ne punou hifo e faʻē ʻa Sitefanī ʻo fanafana ange, “ʻOkú ne fie maʻu e ʻofá.” Naʻe ʻikai ke u mateuteu ki he meʻa naʻe hokó.

Ne ʻikai toe momou ʻa Sitefanī, naʻá ne lele atu ʻo ne puna ʻo huki ʻi he fefiné. Naʻe kamata leva ke ne fai ʻene ngaahi talanoá ki ai fai ange ha ngaahi fehuʻi kehekehe. Naʻe ʻikai ke tali ʻe he fefiné. Ka, ne tafe hifo mei hono fofongá e loʻimatá ʻi heʻene fāʻofua kia Sitefanií. ʻI he ngaahi miniti hoko, ne huki pē ai ʻa Sitefanī, milimili hono ʻulú mo ʻuma ki hono kouʻahé.

Naʻe teʻeki ke u mamata ʻi ha faʻahinga ʻofa taʻesiokita pehē, pea naʻá ku feinga ke ʻoua naʻá ku tangi. Hili iá, ʻi heʻema fakaʻuli atu mei he ʻapi ʻo e kau toulekeleká, naʻá ku ofo ʻi he lava ʻa Sitefanī kei siʻi ʻo taʻe-siokitá mo e fonu ʻi he ʻofá mo e manavaʻofa ki ha taha ne ʻikai ke na maheni.

Naʻe faifai pea liliu ʻeku moʻuí pea ngāue fakafaifekau taimi kakato. Lolotonga ʻeku ngāué, ne fai mai ʻa Sitefanī ha fanga kiʻi tohi lelei naʻe kau ai ʻa e ngaahi fakatātā ʻo hangē ko ia ʻi he loki ʻo e tokoua ʻeku kui fefiné he ʻapi ʻo e kau toulekeleká.

Kimuʻa peá u foki ki ʻapí, naʻá ku maʻu ʻa e ongoongo fakamamahi ne mālōlō ʻa Sitefanī ʻi haʻane puke. Naʻá ku tangi ʻi he mole kei talavou ʻa ʻene moʻuí, ka ʻoku ou kei houngaʻia ʻi heʻene faʻifaʻitakiʻangá. Naʻá ne akoʻi kiate au ʻa e ʻuhinga moʻoni e ngāue tokoní.

ʻOku ʻikai totonu ke tau toe fakakaukau ki he foungá pe ʻoku totonu koā ke tau tokoni. Kapau ʻoku ʻi he feituʻu totonu ʻa hotau lotó, ʻe hoko e ngāue tokoní ko ha konga ʻo ʻetau moʻuí, ʻo ʻikai ko e meʻa pē ʻoku tau faí.