Cov Mus Saib Xyuas Tom Tsev tsab Xov, Peb Hlis Ntuj 2014
Yexus Khetos lub Luag Hauj Lwm Los Saum Ntuj Los: Qhov Kaj ntawm lub Ntiaj Teb
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej lub neej thiab lub luag hauj lwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Thaum peb to taub tias Yexus Khetos yog qhov Kaj ntawm lub Ntiaj Teb, peb txoj kev ntseeg Nws yuav loj tuaj thiab peb yuav rais los ua ib lub teeb uas ci rau lwm tus pom kev. Khetos tau ua tim khawv txog Nws lub luag hauj lwm uas yog qhov kaj tseeb uas ci rau txhua tus txiv neej thiab poj niam uas los nyob hauv lub ntiaj teb (saib Q&K 93:2) thiab tau hais kom peb “tsa [Nws] lub teeb kom ci rau lub ntiaj teb” (3 Nifais 18:24).
Peb cov yaj saub kuj tau ua tim khawv txog Khetos txoj Kev Kaj. Thawj Tswj Hwm Henry B. Eyring, tus Pab Cuam thib Ib hauv Thawj Pawg Thawj Tswj Hwm hais tias: “Txhua lub sij hawm nej xaiv sim los ua neej zoo li tus Cawm Seej, ces nej zaj lus tim khawv muaj zog tshaj qhov qub.” Muaj ib hnub nej yuav paub ntawm nej tus kheej tias Nws yog qhov Kaj ntawm lub Ntiaj Teb. …Nej yuav rov qab muab Khetos txoj Kev Kaj ci rau lwm tus hauv nej lub neej.”1
Txwj Laug Quentin L. Cook ntawm Pawg Kaum Ob tug Thwj Tim hais txog qhov uas peb yuav ua qhov kaj ci rau lub ntiaj teb hais tias: “Peb yuav tsum pov hwm peb tej tsev neeg thiab nyob ua ke nrog txhua tus neeg uas xav ua zoo ua txhua yam peb ua tau kom muaj qhov kaj, kev cia siab, thiab kev coj ncaj ncees hauv peb tej zej zog.”2
Los ntawm cov Vaj Lug Kub
Los ntawm Peb zaj Keeb Kwm
Niaj hnub no cov poj niam uas yog Haiv Neeg Ntseeg hauv Hnub Nyoog Kawg tsa lawv tej lub teeb kom siab.
Nyob hauv theem 80 ntawm ib lub tsev siab nyob hauv Hong Kong, Suav Teb, ib tug viv ncaus uas xiam hoob khab—tib tug Neeg Ntseeg hauv nws tsev neeg—tau tsim ib lub tsev uas yog ib qho chaw pov hwm rau nws thiab cov neeg qhua kom lawv hnov tau tus Ntsuj Plig. Nws cov vaj lug kub, nws tej phau ntawv Koom Haum Niam Tsev thiab nws phau nkauj qhuas Vajtswv yeej nyob ze. Nws tau mus rau lub tuam tsev ua kab ke rau nws cov poj koob yawm txwv.3
Nyob hauv Brazil ib tug niam tsev ncaj ncees tau tu nws cov me nyuam loj hlob nyob hauv txoj moo zoo txoj kev kaj. Nyob hauv nws lub tsev uas yog thwv cib liab ua lawv tau hu zaj nkauj los ntawm lub Koom Haum Me Nyuam Yaus, thiab cov duab los ntawm Liahona txog cov tuam tsev, Vajtswv cov yaj saub, thiab tus Cawm Seej tau npog lawv tej phab ntsa. Nws thiab nws tus txiv tau muab ntau yam tso tseg kom thiaj mus tau ua kev cai sib khi hauv lub tuam tsev ua rau lawv cov me nyuam yuav muaj niam muaj txiv uas yuav nyob mus ib txhis ua ke. Nws thov Vajtswv tsis tu tsis tseg kom tus Tswv yuav pab nws tu nws cov me nyuam loj hlob hauv txoj kev kaj, qhov tseeb, thiab lub zog ntawm txoj moo zoo.4
© 2014 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/13. Pub txhais ua lus Hmoob: 6/13. Kev txhais lus Visiting Teaching Message, March 2014. Hmong. 10863 295