Fakakaungāmeʻa He ʻInitanetí
Naʻe talamai kiate au ʻe ha kaungāmeʻa hoku fāmilí ko ʻAlekisānita ʻo kau ki hono fakafotu ko Lile.* ʻOkú ma toʻu pē, pea naʻá ne fie maʻu ke u maheni mo ia. Ne ʻikai ke u fakakaukau ki ai, ka ʻi he hili ha ngaahi uike siʻi mei ai, naʻá ne tānaki atu au ko ha kaungāmeʻa ʻi he Facebook.
Mālō e lelei, Sitefinī! Ko Lile au, ko e fakafotu ʻo ʻAlekisānitá. Naʻá ne talamai ʻokú ta mei taʻu tatau pē.
Mālō e lelei Lile. ʻOku ou manatu ne u fanongo kau kiate koe. Naʻe pehē ʻe ʻAlekisānita ʻokú ke nofo ʻi ʻAlapēnia. “Fakalata moʻoni!”
ʻOku fakaoli—kiate au, ngali fakalata e nofo ʻi ʻAmeliká! Hahaha. Ko e hā te ke fai he fakaʻosinga ʻo e uike ní?
Te u pasiketipolo he pongipongi Tokonakí, peá u ʻalu leva ki ha Temipale ʻo e Siasí. ʻI he ʻaho Sāpaté te u ʻalu ki he lotú. Ko e hā e meʻa te ke faí?
ʻIkai ke loko ʻi ai ha meʻa ʻe fai. Naʻá ku mamata ki ha fakatātā ʻo e Temipale Sōlekí ʻi he ʻInitanetí. ʻOku fakaʻofoʻofa! Naʻe talamai ʻe heʻeku faʻētangatá ko e Māmonga koe, ʻo hangē pē ko ia. Ne u faʻa ʻalu mo ia ʻi ha ngaahi taimi ki he lotú. Naʻá ku fuʻu saiʻia ai! Te u fiefia ke ʻalu he uike kotoa pē, ka ʻoku faʻa ʻi ai ha ngaahi meʻa ke fai mo hoku fāmilí ʻi he ʻaho Sāpaté.
Kapau ʻokú ke loto ki ai, ʻe lava ke u hiki ha fakamatala he lotú ʻi he uike kotoa pē pea ʻoatu kinautolu kiate koe. Ko e founga ia te ke lava ʻo ako lahi ange fekauʻaki mo e meʻa ʻoku mau tui ki aí.
ʻOiauē, fakamālō atu! Te u fie fanongo ki he meʻa ʻoku mou talanoa ki aí.
Hei, Lile! ʻOku ou ʻamanaki ne lelei ho uiké. Naʻe sai e lotú ʻaneafi. Ko ha ngaahi fakamatala ʻeni ne u hiki. Naʻa mau talanoa lahi fekauʻaki mo e ngāue tokoní mo e lotú.
-
ʻI he taimi ʻoku tau tokoni ai ki he kakai kehé, ʻoku tau tauhi ki he ʻOtuá (lau ʻa e Mōsaia 2:17 ʻi he scriptures.lds.org).
-
Vakaiʻi ʻa e “Daytonʻs Legs” ʻi he YouTube. ʻOku kau ki ha kiʻi tamasiʻi ne tokoni ki hono kaungāmeʻa, ʻa ia ne mamateá, ke kau ʻi ha feʻauhi lova pasikala, kakau mo e lele.
-
ʻOku ʻi ai ʻa e ʻOtuá pea ʻe fanongo kiate koe ʻi he taimi ʻokú ke lotu aí. Ne u maʻu ʻa e fakamatala ko ʻení ʻoku talanoa fekauʻaki mo e founga ʻo e lotú: lds.org/youth/article/how-to-pray.
Sitefanī, mālō ʻaupito! Naʻe fakalaumālie ʻa e vitiō ko iá! ʻOku ou lotu lahi, pea ʻoku ou loto ke fai ʻa e meʻa ʻoku totonú, … ka te u ʻilo fēfē ʻoku totonu ʻa e meʻa ʻoku ou faí?
ʻOku Hoko Atu e Talanoá …
ʻOku kei akoʻi pē ʻe Sitefanī ʻa Lile ʻo kau ki he ongoongoleleí ʻaki hono ʻoatu ʻene fakamatalá mo tali ʻene ngaahi fehuʻí. ʻOku pehē ʻe Sitefanī ko e taimi ʻokú ne hiki ai e fakamatalá he Sāpaté, “ʻoku ou manatuʻi fuoloa ange ia.” Pea ʻi hono tali e ngaahi fehuʻi ʻa Lile, ʻoku maʻu ai e Sitefanī ha faingamālie ke fai ha ngaahi fealēleaʻaki ʻuhingamālie ki he ongoongoleleí mo ʻene ongomātuʻá. Kuo toe akoʻi ʻe he meʻá ni ʻa Sitefanī ki he ngāue fakafaifekaú. ʻOkú ne pehē, “ʻOku lava ke u hoko ko ha faifekau, neongo ʻoku ou kei siʻi.”