Naʻe Tali ʻe he Palōfita ʻEku Lotú

ʻI he fakaʻosinga hoku taʻu hono uá, ne u tohi kole ki he polokalama fokotuʻutuʻu fakatātā ʻi heʻeku ʻunivēsití. Naʻe ʻikai ke tali au, ka naʻá ku lava ke toe kole ʻi he taʻu hono hokó. Ne ʻikai ke u fiefia ke toe tatali ʻi he taʻu ʻe taha ke ʻosi mei he akó.

Ko e meʻa ofi taha ki heʻeku lesoni tefitó ko e faitaá (photography). Ko ia ne u lotu kau ki hono liliu ʻeku tefitoʻi lēsoní pea ne u ongoʻi ʻoku lelei ke fai ia. Ne u fie maʻu ke maʻu hoku mataʻitohí!

ʻI he kamata ʻa e semesitā ʻo e faʻahitaʻu fakatōlaú, ne u toʻo ha ngaahi kalasi fekauʻaki mo e faivá pea mo e hisitōlia ʻo e ʻātakai ʻo e faitaá. Ne u fiefia fakatouʻosi ʻia kinaua. Ka ʻi heʻeku vakai ki he silapa ʻo ʻeku kalasi ki he faivá, ne u fakatokangaʻi ne fie maʻu e kau akó ke mamataʻi ha ngaahi faiva R-rated lahi. ʻI heʻeku kalasi faitaá, ne fakamatala e faiakó ko e ngaahi faiva te mau ako ki aí ʻe ʻi ai e fetāʻaki, fakahohaʻa mo fakasekisuale. Naʻá ne pehē ʻoku meimei ko e lahi taha ia ʻo e ngaahi tā ʻo e ngaahi ʻaho ní e ponokalafí.

Naʻe tō hifo hoku lotó ʻi heʻeku fakakaukauʻi e meʻa ke faí. Naʻá ku ʻiloʻi naʻe fepaki ia mo e meʻa ʻoku akoʻi he ongoongoleleí, ka naʻe pau ke toʻo e ngaahi kalasi ko ʻení. Ne u fakakaukau ki he folofola fekauʻaki mo e ʻi he māmaní kae ʻikai ʻo e māmaní (vakai, Sione 15:19). ʻE lava nai ke u ʻi he ngaahi kalasi ko ʻení kae ʻikai ʻo kinautolu?

Naʻá ku lotu ke ʻiloʻi e meʻa ke faí mo maʻu ʻa e tui ke fai e meʻa totonú. Ne u talanoa mo hoku uaifí, mātuʻá mo e tokouá. ʻI heʻeku talanoa mo hoku tokouá, naʻá ne fakamanatu mai e veesi ko ʻení: “He ko e hā hono ʻaonga ki he tangatá, ʻo kapau te ne maʻu ʻa māmani kotoa pē, kae mole ai hono laumālie ʻoʻoná? pe ko e hā ʻe foaki ʻe ha tangata ke fetongi ʻaki hono laumālié?” (Mātiu 16:26).

Naʻá ku ʻiloʻi ʻoku mahuʻinga e akó, ka naʻá ku ʻi he malaʻe hala nai? Te u nofo fakataimi fēfē mei he akó kuó u mei ʻosí?

ʻI he valengapō ʻe taha lolotonga ʻeku ʻā mo ʻema pēpē ne siʻi puké, ne u fakakaukau ke fekumi kia Palesiteni Tōmasi S. Monisoni he ʻInitanetí. ʻIkai fuoloa kuó u mamataʻi ha lea ʻa Palesiteni Monisoni ʻi he konifelenisi lahi ne fai ʻi ʻOkatopa 2011. Naʻá ku fakafanongo fakamātoato ʻi heʻene talanoa kau ki he hōloa ʻi he tuʻunga fakaeangamaʻa ʻo e sosaietí, ʻo pehē kuo tali ʻe he tokolahi ʻa e ʻulungaanga taʻe feʻunga mo taʻemaʻá.

Pea naʻá ne lea ʻaki e meʻa ne u fie maʻu ke fanongo ki aí: “Kuo pau ke tau loto-toʻa ʻi ha māmani kuo mamaʻo ʻaupito ia mei he meʻa fakalaumālié. ʻOku mahuʻinga ke tau siʻaki ha meʻa pē ʻoku ʻikai fenāpasi mo ʻetau tuʻunga moʻuí, tau fakafisi ke tukuange ʻa e meʻa ʻoku tau fakaʻamua tahá: ko e moʻui taʻengatá ʻi he puleʻanga ʻo e ʻOtuá.”¹

Ne ongo mālohi moʻoni kiate au e ngaahi leá ni. ʻI he mokulukulu hoku loʻi matá, ne u ʻilo kuo tali ʻe ha palōfita moʻui ʻeku lotú.

Neongo ne u toloi ʻeku ngaahi palani ke ʻosi mei he akó, ʻoku ou ʻilo ʻe tāpuakiʻi ʻe he ʻEikí hoku fāmilí mo au ʻi heʻemau muimui ki he palōfitá, siʻaki e fakakaukau ʻa e māmaní, talangofua ki he ngaahi fekaú, pea poupouʻi ʻa e ngaahi tuʻunga moʻui ʻo e ongoongoleleí.