Vaqa ni Veisiko, Julai 2014
Na iLesilesi Vakalou i Jisu Karisito: Dautataro
Vulica ena masumasu na itukutuku oqo ka tovolea mo kila na ka mo na wasea. Ena vakalevutaka vakacava na nomu vakabauta na nomu kila na bula kei na ilesilesi ni iVakabula, ka yaco me vakalougatataki ira talega o vakaraica voli ena veisiko? Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
Sa Dua na noda Dautataro vei Tamada ko Jisu Karisito. Na vosa dautataro e vu mai na vosa vaka-Roma makawa e kena ibalebale “e dua e vakamamasu ena vukuna tale e dua.”1 Sa mai vakamamasu na iVakabula ena vukuda, ni sa tu vua na kila vakavinaka, lewa, kei na loloma veivueti. Ni da kila oqo sa na rawa meda vakasinaiti kina ena loloma kei na vakavinavinaka ki na Nona Veisorovaki.
“Dou vakarorogo vei [Jisu Karisito] sa sorovaki kemudou vei Tamada, io vei Koya sa vakamamasu e na vukumudou—
“A sa kaya: Tamaqu, mo ni nanuma na nona rarawa ka vakamatei ko Koya sa tawacala; io ko ni sa dau lomani Koya vakalevu; mo ni nanuma ni sa mai dave na nona dra na Luvemuni; io ko ni sa lewa me mai dave na nona dra, mo ni vakarokorokotaki kina;
“Ia Tamaqu, mo ni lomani ira na wekaqu oqo ka ra sa vakabauta na yacaqu; io me ra lako mai vei au ka rawata na bula tawamudu.” (V&V 45:3–5).
Me baleti Karisito ni sa noda Dautataro, e kaya kina o Elder D. Todd Christofferson ena Kuoramu ni iApositolo Le Tinikarua: “Sa rui ka bibi dina sara vei au, meu dau taura na gauna e rawa ena ituvaki cava ga meu cuvaki ena masu ki na itikotiko vakalou ni loloma soliwale, me na rogoca na noqu tagi na Tamaqu Vakalomalagi, o Koya na noqu Dautataro, e sega ni ivalavala ca, a dave na Nona dra, mena kerea meu vukei.”2
Mai na iVolanikalou
Mosaia 15:8–9; Moronai 7:28; Vunau kei na Veiyalayalati 29:5; 110:4
Mai na Keda iTukutuku Makawa
Ena gauna taucoko ni itukutuku ni Lotu ni Turaga, era sa dau muria tu mai na tisaipeli marama i Jisu Karisito na Nona ivakaraitaki. A dua na dautataro yalodina ka yaloqaqa o Esiteri. A vakauta yani vua o Moatekai na luvei tamana lailai e dua na ilavelave ni ivakaro vakatui mera sa vakarusai na Jiu, ka sa lesi koya me laki “curu vua na tui me vakamasuti koya [na tui] ena vukudra na kai nona.” A tomana: “Ia ko cei e kila de ko sa yaco beka mo ranadi e na vuku ni gauna oqo?” (Esiteri 4:8, 14.)
E dina ga ni ka rerevaki me dautataro ena vukudra na kai nona, sa vakadonuya ga o Esiteri: “Ia kau na qai lako ga vua na tui, ia sa sega ni vaka na lawa: ia kevaka kau sa mate, au sa mate ga” (Esiteri 4:16).
A sa laki vosa ena vakarokoroko o Esiteri vua na tui ka “cuva sobu ki yavana, ka vakamasuta ni sa vakawai na matana … me vukica na ivola … me vakarusai ira na Jiu.” A tomana o Esiteri, “Niu na vosota rawa vakaevei meu raica na ca ena yacovi ira na kai noqu?” (raica na Esiteri 8:3, 5–6). Sa vakamalumalumutaki na yaloi koya na tui, ka sa vakadonuya kina na nona kerekere.3
© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/14. Vakadonui me vakadewa: 6/14. Vakadewa ni Visiting Teaching Message, July 2014. Fijian.10867 858
Vakasamataka Oqo
Ena rawa vakacava ki na tataro i Jisu Karisito me vakauqeti keda meda loloma veivueti ka vosoti ira kina na tamata?