Klumech er a Oldingel e Olisechakl, Ongeuid el buil 2014
Chedaol el Urerel a Jesus Kristo: Mesebechakl
Mosuub er tial klumech loba nglunguuch e mosiik el mo medengei a kirem el mo ouchais. Ng mekera klemedengei er kau er a klengar me a urerel a Osobel a le choisisii a klaumera er kau er Ngii e lomekngeltengat er tirkel momekerreu er tir lokiu odingel me a osisechakl? A lmuut el bebil er a omesodel, e bo er a reliefsociety.lds.org.
Klaumerang, Telungalek, Ngeso
A Jesus Kristo a Sebechekled el mo er a Chedam. A tekoi el mesebechakl a ngar er ngii a uchelel tekoi er a Latin el kmo “ngike el mengeluch el kirel a tang.”1 A Osobel a mesebechakl er kid, lousbech a mui el klemedengei, llemalt, me a chubechub. Se el bo dodengelii tiang eng sebechel mekekid er a beltikelreng me a omereng el saul el kirel a Tngakireng.
“Morrenges er a [Jesus Kristo] el ngii a sebechekled el mo er a Chedam, el mengeluch er ngii el kirem—
“El kmo: Chedam, a ringel me a kodall er ngike el dimlak a kngtil, el kau a kilengei er ngii; a rsechel a Ngelekem el Sechal a mlechoit, a rsechel ngike el kau uldureklii me luchul e a klebkall le ko er kau;
“A le uaisei, e Chedam, e bechititerir tirka el odam er ngak el tir oumera er ngak, me lemei er ngak e bo el nguu a diak a ulebengelel klengar” (D&C 45:3–5).
Ng millekoi el kirel a Kristo el Mesebechakl er kid, e a Elder D. Todd Christofferson er a Chelechad er a Teruich me a terung el Apostol a dilu el kmo: “Ng kmal klou a belkul el mei er ngak, el sebechek el ngii di el taem me a ngii di el ker e ak melchesuar chubechub lokiu a nglunguuch, el Demak er a Babeluades a remenges ongtik, e a Sebecheklek, el ngii a dimlak a kngtil, el rsechel a mlechoit, a mesebechakl er ngak.”2
Ngara Chedaol Llechukl
Mosiah 15:8–9; Moroni 7:28; Doctrine and Covenants 29:5; 110:4
Ngara Reksi er Kid
Chelsel a reksi er a Ikelesia er a Rubak, e a redil loltirakl er a Jesus Kristo a di mla oltirakl Okesiul. A Esther a mle mesisiich a klaumera er ngii e bekeu el mesebechakl. A ta er ngii er a Mordecai a uldureklii a babilengel a merreder el mo er ngii el kmo a re Jews a mo kodall, e dilu er ngii me bo “longedecheduch er a [merreder] el kirel a rechedal.” E dirrek el dilu el kmo: “Ng techa mle medengei el kmo kau a mei er a beluu er a chelsel a uai tia el taem?” (Esther 4:8, 14.)
Meng dimlak el iior er tia el kengaol teletael el mo mesebechakl er a rechedal, e a Esther a kilengei: “Me ak mo omes er a merreder, el denguu er a llach eng diak el sebechel tekoi: e ak mad, e a kuk mad” (Esther 4:16).
Me a Esther a milngedecheduch er a merreder loba ngariou el reng “el mlo outubaruach er ochil, e lmangel lolengit er ngii … me lak bo loltirakl a tekoi er se el babilengel … el mo omekeuad er a re Jews.” E dirrek el millekoi el kmo, “Ak mekera otekur a ringel el kirel a kodellir a rechedak?” (mesa Esther 8:3, 5–6). Ng mlo chelellakl a rengul a merreder, e kilengei er a ongtil.3
© 2014 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/14. Kengei er a oidel: 6/14. Oidel a Visiting Teaching Message, July 2014. Palauan. 10867 881
Momtab er Tiang
Ng mekera sebecheklel a Jesus Kristo e rullid el mo odersii a chubechub me a klausubes el mo er a rebebil?