Faamanuiaga O Isa
E alala le tusitala i Massachusetts, ISA.
“O lou aiga e manuia i le mana o le perisitua” (Tusipese a tamaiti, 102).
“Pe o i ai se mea o e popole ai?” Sa fesili atu ai tina i a Isa a o la tietie atu i le fale mai le lotu.
Sa faataupupula i fafo Isa i alavai na fesopoa’i i auala o Amsterdam. “Fai mai lo’u faiaoga Peraimeri o le i ai o le perisitua i lou aiga o se faamanuiaga,” o le tala lea a Isa. “Ae e le maua e Tama le perisitua, e le mafai la ona faamanuiaina i tatou.”
“E mafai lava ona maua le perisitua i lo tatou aiga, e tusa lava pe o lou tama e le o se tagata o le Ekalesia,” o le tala lea a Tina. “E toatele tagata agavaa e umia le perisitua i le uarota e mafai ona fesoasoani ia te oe. Ae faapefea Uso Van Leeuwen, lo tatou faiaoga o aiga?”
Sa fiafia Isa ia Uso Van Leeuwen. Sa ia aumaia i taimi uma keke manutinuti, kuki e fiafia i ai Isa, ma talanoa ma ia e uiga i le faasaienisi, lana mataupu sili ona lelei. Ae i le lotu na faamatala e isi tamaiti o latou tamā o tuuina atu ia i latou faamanuiaga faaleperisitua pe a latou mama’i pe le fiafia. E le mafai e Isa ona fesili atu i lona tama mo se faamanuiaga.
“Ou te alofa iaTama,” le tala a Isa. “Ae maimau pe ana i ai sona perisitua.”
Ina ua latou taunuu i le fale, sa i le umukuka Tama o loo kuka le taumafataga o le afiafi. “Na faapefea mai le lotu?” sa ia fono atu ia i laua.
E lei tali atu Isa. Nai lo o lena, sa ia alu atu i lona potu ma faapalasi ifo i luga o le moega. Sa ia moomoo maimau pe ana fai si eseese o mea.
O le vaiaso na sosoo ai sa fai ai se suega tele a Isa i le aoga. O tamaiti uma lava i Netherlands e tatau ona fai se suega ina ua 12 tausaga le matutua e iloa ai po o fea e alu e aoga i le tausaga e sosoo ai. E ui lava sa suesueina malosi Isa ma sa saunia, sa matuai popole lava o ia. O le po a o loma le suega, o lona manava sa pei na saisaia ini taaiga. Sa le mafai ona moe o ia. A o ia feminoiai ma feliuliu i le moega, na ia manatua le lesona mai le Peraimeri e uiga i le fesili atu mo se faamanuiaga faaleperisitua pe afai e te fefe. E ui lava ina le mafai ona tuuina atu ia te ia e lona tama se faamanuiaga, sa ia iloaina o le a fesoasoani le Tama Faalelagi ia te ia pe a ia fesili atu.
Sa oso ese Isa mai le moega ma savali atu i totonu o le potu malolo. Sa faigaluega Tina, ae o Tama sa i le nofoa o loo matamata le TV.
“Pe o lelei mea uma?” o le fesili lea a Tama.
“Ua ou matuai fefe lava i le suega taeao,” o le tala lea a Isa. “E te manatu e mafai ona ta valaau atu Uso Van Leeuwen ma fesili atu ia te ia e tuuina mai ia te au se faamanuiaga?”
“Ou te iloa o se manatu lelei lena,” sa fai atu ai Tama. “Sei ou valaau atu ia te ia.”
E lei umi ae o mai Uso Van Leeuwen ma lona atalii o Jaan ma tuu atu ia Isa se faamanuiaga. Na ole atu Uso Van Leeuwen i le Tama Faalelagi e fesoasoani ia Isa ina ia aua le popole mo le suega ma fesoasoani ia te ia ia manuia lana suega. A o tuuina atu e Uso Van Leeuwen le faamanuiaga o Isa, sa saofai Tama i le nofoa ma piilima ona lima ma moeiini ona mata.
Ina ua uma le faamanuiaga sa maua e Isa se lagona sili atu ona lelei. Sa lei toe fufusi tele lona manava, ma sa amata ona fiamoe. “Ia manuia taeao,” na fai mai ai Uso Van Leeuwen a o la tuumuli ese. “Sa e galue malosi lava, ma ou te iloa o le a fesoasoani le Tama Faalelagi ia te oe ina ia manuia.”
“Ou te mitamita ia te oe mo le mauaina o le faatuatua,” na fai atu ai Tama ia Isa ma tu toe tuu o ia i lona moega. “E tusa lava pe le o au o se tagata o le Ekalesia, ou te fiafia e te talitonu i le Atua, ma ou te faamoemoe ia e iloa e faapena foi au.”
“Faafetai lava, Tama,” le tala a Isa, ma na ia [Tama] kisi atu i lona alafau.
A o ia faapupuu i lalo o ona ieafu, sa lagona e Isa le fiafia ma le toafilemu. Sa faafetai o ia i le i ai o se tama e alofa ia te ia. Sa fiafia o ia sa talitonu lona tama i le Tama Faalelagi ma Iesu. Ma sa ia iloaina e mafai ona faamanuiaina pea lava o ia ma lona aiga e le perisitua.