O Se Lologa o Manatuaga Fiafia
Gina Sconiers, Iuta, ISA
Ata na tusia e Bradley Clark
Ona o ni paipa tuai ma se faavae e lē lelei, o lou fale a o ou laitiiti e lolovaia i soo se taimi lava e tele ai le timu mai se afa. Ona o afa i Virginia, ISA, e mafai ona uumi mo ni itula, e masani lava ona osofai mai le vai.
Sa matou nonofo i lena fale i le tele o tausaga o lo’u tuputupu ae, o lea sa ou mafaufau ai o lologa o se mea masani.
Ina ua mavae ni nai afa, sa faaleleia atili a matou togafiti e tau ai ma lologa ma aoao e galulue faatasi. E masani ona oso mai afa i le tuneva o le po, ma e fafagu i luga i matou e o’u matua e galulue i o matou tulaga a o sosolo malie mai le vai mai le potu i lalo e pei o le sosolo malie mai o le mauga mu. E asu e lo’u tuagane ma lo’u tama le vai i pakete i fafo i le ala savali a o ma faaaogaina solo taele ma lo’u uso e mimiti ai le vai ina ia faasao ai le kapeta.
Ma te talie a o ma feosofi ma sisiva i luga o na solo taele, a o lagonaina le susu maseesee i le va o o ma tamatamaivae, ma vae o o ma ofuvae moe. E faatopetope ona tatau i fafo e Tina ia solo taele ua susu pala, liaʼi atu i totonu o le masini faamago, ma aumaia ni solo mago mo le ma osoosoga. Afai loa ua faamalieina i matou ua saogalemu le fale, ona matou o lea i le umukuka e faamamago ai ma fiafia i le koko vevela ma keke mo a matou galuega. Afai e lei oo i le taimi mo le aoga, ona matou toe taumafai lea e momoe.
O nei lologa atonu na tuuina atu ai i ou matua le popole tele, ae ou te manatua na taimi o nisi o taimi aupito sili ona fiafia o lou laitiiti, e ui lava i le papa mai o faititili ma le feemo mai o le uila. O le mea moni, o le manogi o le kapeta susu o loo aumaia ai pea ia te au se lagona o le misia o lou aiga.
E mafai lava e o’u matua ona tauivi na o laua ma le lologa, ae ou te matuai fiafia lava na la faafaigaluega i matou uma i le puipuiga o lo matou fale. O le tauivi ma le vai sa avea o se mea fiafia aua sa matou faatasitasi ma sa tofu i matou ma se vaega e faatino.
O lenei ua ou matua, ou te mafaufau i na aso ma manatunatu pe faapefea ona ou fatuina lena lava fiafia o le galulue faatasi i la’u lava fanau. E ui lava ou te faafetai e le lolovaia lo’u fale, ou te iloa e i ai lava se mea e le manaomia o le a osofaia ma le le maalofia lo matou aiga.
E tusa lava po o a ni faafitauli o le a aafia ai lo’u aiga i le lumanai, ou te faamoemoe o le a matou faatasitasi ma galulue faatasi i le puipuiga o o matou tulaga faatauaina, lo matou faatuatua, ma le tasi ma le isi. Ona atonu, e oo lava i taimi faigata, e mafai ona matou talie, ataata, ma lagona le fiafia a o matou galulue soosootauau.