O Le a le Pese o le a Ou Usuina?
David M. Flitton, Iuta, ISA
Ata na tusia e Bradley Clark
I le taimi o la’u auaunaga o se faifeautalai faamisiona ua toeitiiti atoa le 40 tausaga talu ai i le taulaga o Levin, Niu Sila, sa ou taina le piano i Aso Lua taitasi mo tamaiti o le Peraimeri. Ou te manatua lelei le lagona matagofie na ou maua mo nei fanau a o matou usuina faatasi pese a le Peraimeri e oa i le talalelei.
Ia Fepuari 2013, sa ou toe foi i Niu Sila mo se malologa. I le avea ai ma se tagata e fiafia e sopo, sa ou faatauina ni pepa malaga i se malaga savali i le fa aso i le alasopo lauiloa o Milford Track i Fiordland National Park i le Motu i Saute.
Sa faatasi mai ia te au ni tagata Amerika se toatolu ma le 37 isi tagata sopo mai i le salafa o le lalolagi, e aofia ai Ausetalia, Pasila, Egelani, Finelani, Siamani, Isaraelu, ma Iurukuei. I le taimi o la matou sailiga, na matou fefaasoaai ai ni manatu, aafiaga, ma manatu i le mea sili matou te mafaia ona o la matou faafitauli i le eseese o gagana. E lei umi se taimi mo o matou eseesega i aganuu ma manatu faaletagata e mou ese atu ona o lo matou sootaga ua faatupulaia.
I le faaiuga o le aso lona tolu o le savaliga, o se tasi o tagata sopo na manao e fausia i luga o la matou faauoga ua faatupulaia ma oso i luga, na faasilasila mai e ao ona matou faia se faaaliga taleni. Sa ia fai mai o le a ia amataina le faaaliga. Sa ia filifili e faasoa mai lana taleni o le faamatalaina o tala, lea na ia faataitaia i lona ofisa o le pisinisi i Kaisareia, Isaraelu. Sa sologa lelei lana tala, lea na ia faailoa mai ai o le a ia toe faamatalaina se isi tala. Ae peitai a o ia faasoa mai ni faamatalaga le talafeagai, sa ou iloaina o le afiafi o le a faigofie ona iu i se mea e itiiti ifo mai le faagaeetia.
I le taimi o lana tala, sa ou lagonaina se uunaiga malosi e pese mo le vaega. Ae o le a se pese o le a ou usuina i a’u uo fou mai i le lalolagi atoa? Sa malosi le oo mai o le tali ia te au: “O Le Atua Lou Tama” (Viiga, nu. 184).
Sa ou le mautonu ae sa ou toe tepa i lo’u manatuaga o le alofa mo tamaiti Peraimeri o Niu Sila. Sa ou tulai i luga ma faamalamalama atu o le a ou usuina se pese faapitoa sa ou usuina i le toeitiiti 40 tausaga talu ai faatasi ma tamaiti i Niu Sila. Sa ou faamalamalama atu faapea sa avea au ma se faifeautalai, na aoaoina nei fanau, ma na faatupulaia le alofa ia i latou. Ona ou faia lea o se tatalo le leoa, ma ole atu mo se fesoasoani e usuina le pese i se auala o le a faamanuiaina ai le vaega.
Na sologa lelei le pese, ma mulimuli ane sa ou lagonaina le Agaga. Sa ataata a’u uo fou, ma na foliga mai o le pese na tatalaina o latou loto. E lei umi ae tutulai foi isi ma amata ona faasoa mai a latou taleni faamusika. O se vaega o tamaitai e toafa, sa le fia auai i le taimi muamua, na usuina ni pese na filifilia mai le aufaipese a le latou ekalesia. O le isi tagata sopo na aoaoina i matou i se pese faaleaganuu a tagata Iutaia.
I le faaiuga o le faaaliga taleni, sa usuina e se tamaitai talavou lalelei mai Ausetalia ni pese se tolu i le Faamaori, lana lava gagana. E moni lava o le Agaga o lo tatou Tama Faalelagi na oo malie mai ia i matou ma fesoasoani ia i matou e iloa ai o i matou o fanau uma a le Atua, ae le ni “tagata ese po o e ua aumau” (Efeso 2:19) mai atunuu eseese.
Ou te faafetai mo na tamaiti Peraimeri i le taulaga laitiiti o Levin lea na fesoasoani e toto i totonu ia te au le moni o i tatou o fanau uma a lo tatou Tama Faalelagi. Ou te faafetai foi i na manatuaga na ou maua ai le lototele e faasoa atu ai lena molimau e ala i le pese.