Tatou te Talanoa ia Keriso
O Le Folafolaga o Lo Matou Lumanai Faatasi
E alala le tusitala i Iuta, ISA.
Ina ua maua lou toalua i le kanesa, sa ou lagona e pei ua solofa i lalo lo matou lalolagi. Faatasi ai ma se fanau e toavalu e tausi, o le a faapefea ona ou faia na o au?
O se taeao puaoa o le Aso Sa a o ou tu ai i le paipa o le umukuka ma faamaea le fufuluina o ipu o le ti. Sa matamata la’u fanau laiti e toalua i se vitio o tusitusiga paia i le potu o le aiga i tafatafa o le umukuka. Sa lofituina au i mafaufauga, ma sa susu uma o’u alafau i loimata. Sa le mafai ona ou aveese mai i lou mafaufau le kanesa lea ua osofaia lo matou aiga. Sa tauivi lo’u toalua ma lenei kanesa mo ni nai tausaga, ae o lea ua sosolo. Sa foliga mai ua faavaivaia lo’u faatuatua. Sa tumu lou mafaufau i fesili “ae faapefea pe afai?” mafaufauga.
Sa faafuasei ona faalavelave mai le vitio o tusitusiga paia i ou mafaufauga i upu mai se leo mālū: “Faalologo ia, ina malū ia. …
“Se a le mea tou te fefefe ai faapea? Se a le mea tou te le faatuatua mai ai?” (Mareko 4:39–40).
Sa ou faapalasi i lalo le soloipu ma faliu atu e vaai i le TV. O le vitio sa faatatau i le Faaola i le vaoia o le matagi. Sa foliga mai e peiseai sa fetalai mai e le Faaola lava Ia ia upu ia te au. Sa faatumulia au i se lagona o le mafanafana ma le filemu. O se faamanatu o le pipiimau i le faatuatua lea sa tele ina ou aoaoina i le tele o tausaga o le kanesa. O se faatuatua o loo lagolagoina e upu o lou faamanuiaga faapeteriaka.
Sa ou mauaina lou faamanuiaga faapeteriaka ina ua 15 ou tausaga. O le fuaiupu e tasi lea sa foliga mai i lena taimi na faamatalaina se vaega o la’u faaipoipoga i le malumalu ua taofimauina nei se folafolaga sili mo au. Sa talanoa e uiga i se tagata amiotonu e umiaina le perisitua o le a ou faaipoipo i ai ma faapea mai o le a ia “fesoasoani ia te oe, taiala oe ma lagolagoina oe, e le gata i lou talavou ae e manino lava i ou tausaga mulimuli ane.”
A o ou faitauina ma saga faitauina lou faamanuiaga faapeteriaka i tausaga o tauiviga ma le kanesa, sa aumai e lena fuaiupu ia te au se faamoemoe sili. O taimi taitasi, sa ou maua ai se faatuatua faafouina i le folafolaga o lo matou lumanai faatasi. Ou te manatuaina le mafanafana sili na tuu mai e le Agaga ia te au ina ua faatoa aafia lou toalua i le kanesa. Sa ou taulotoina lena vaega o lou faamanuiaga faapeteriaka, ma ina ua maua mai taunuuga o suesuega o le kanesa sa faaletonu, sa ou manatuaina lena folafolaga.
Sa ou aoao e tuu atu i le Faaola e tauave i matou, sa ou aoao e tatau ona ou tausia lou faatuatua ia mausali, ma sa ou aoao ia faatoilaloina le faatupulaia o le fefe i le faatuatua. Sa faamanatu mai ia te au e le vitio i lena taeao ia ou faalagolago i le Alii.
O le i ai o le faatuatua ou te maua ai le tomai e tuu atu ai ia Iesu Keriso e tauave au avega. E pei lava o le nuu o Alema o e sa faapologaina sa lei lagonaina le avega i o latou tua (tagai Mosaea 24:14), e faapena foi la i lo matou aiga o loo tauivi ma le kanesa. Ua mafai e lo matou aiga ona feagai ma le kanesa e aunoa ma le lagonaina o avega na te mafai ona aumaia.
O loo faia pea ni suesuega i lou toalua e tuliloa ai matauaola o le kanesa pe sue ia maua ni tuma o loo mafua ai. O loo i ai pea a matou pili o le falemai [e totogi] ma aafiaga tumau o togafitiga. Ma o loo ou tatalo pea i aso uma ina ia le toe maua lou toalua i le kanesa. Ou te tatalo pea ia ma tau fai ola uma ia matutua. O loo ou faapea atu foi i le Tama Faalelagi, “Ia faia Lou finagalo.”
Ou te leiloa po o afea e oo mai ai ia “tausaga mulimuli ane” ia o loo taua i lou faamanuiaga. Ou te faamoemoe o upu o i lou faamanuiaga o loo faatatau lea i se taimi o le a mafai ai ona ma o ma lou toalua i se misiona pe a matutua le ma fanau. Ou te faamoemoe o loo faatatau lea i se taimi o le a taitai ai e lou toalua le matou solofanua a o tietie ai le fanau a le ma fanau ma i se taimi o le a tuupuna solo ai le fanau a le ma fanau i luga o ona tulivae. Ae ou te iloa po o le a lava le taimi e aveese atu ai e le Atua o ia mai lenei lalolagi, o le a faia i Lana lava taimi.
Ou te le o toe popole lava la po o afea e oo mai ai na “tausaga mulimuli ane.” E le afaina lea. Ou te talitonu o le a faamamaluina e le Alii lena folafolaga na faia ia te au i lou faamanuiaga faapeteriaka. Sa ia tausia i matou i le aluga o nei tausaga, ma o le a Ia tausia i matou i le lumanai.