Mai le Misiona
O Se Vavega i le Malae Vaalele
E alala le tusitala i Iuta, ISA.
E tasi se tamai uunaiga ae mafai ona suia ai olaga mo le lelei sili atu.
Ata na tusia e David Malan
I le avea ai ma se faifeautalai fou i Iapani, sa faigata ia te au ona malamalama i soo se tasi, ma e leai se auala e faamasani ai ia i latou. Sa faigata ona aoao e alofa ini tagata sa ou le iloa, ae maise lava pe a le mafai ona ou malamalama i mea sa latou fai mai ai. Ae sa ou faia se taumafaiga e faaali atu ai lo’u alofa mo i latou, ma sa ou talisapaia a latou taumafaiga e aapa mai ia te au.
O vaiaso taitasi, ma te maua ai ma la’u soa se papa falaoa e fai i le fale mai se tuafafine o le uarota e igoa ia Sister Senba. Sa ia faaalia lona alofa mo faifeautalai e ala i le taoina oni falaoa i le fale, ma tusia ni faamatalaga laiti lava, ae mai le loto.
Sa ootia lo’u loto ona sa alofa mai se tasi ia te au. Sa uunaia au e faaali atu lo’u agaga faafetai ia te ia i sina ala itiiti. Sa ou tusia se tamai tusi e faailoa atu ai lou matuai faafetai mo ia ma le osigataulaga na ia faia ma lona aiga e fesoasoani ai i faifeautalai. Na amata ona ma uo, ma sa amata ona ou mafaufau ia te ia o lo’u “tina e mamao mai lou aiga.”
Na mavae atu masina. I se taeao po o se tasi aso Lulu na ou maua ai se valaau mai lo’u peresitene o le misiona, na fai mai ia te au ia ou siitia atu i lalo i Okinawa. Ina ua ou tuu i lalo le telefoni, sa faatumulia a’u i le lagona sili ona oona toe suamalie. Sa ou faatu e fai atu au faatofa. O telefoni taitasi e ta’u atu ai i tagata o le uarota o le a ou malaga ese i le aso na sosoo ai na tiga ai lo’u loto. O le faatofa atu i tagata ua amata ona ou alofa tele i ai sa sili atu ona faigata nai lo le mea sa ou mafaufauina o le a i ai.
A o ou faaiuina nei valaauga uma, sa ou matauina pau le tagata e le’i taliina le telefoni o Sister Senba. Sa ou faanoanoa o le a le mafai ona ou faatofa atu i se tasi sa matuai latalata lava i lo’u loto.
O le taeao na sosoo ai na matou o ai ma isi faifeautalai e toalua i le malae vaalele. Ina ua matou taunuu atu i le laulau o pepa malaga ma taumafai e faatau ni pepa malaga, na fai mai tagata faigaluega ia i matou ua teena a matou kata. E le’i i ai ni a matou tupe e totogi ai pepa malaga, ma o le a malaga le vaalele i le 10 minute! O le toatolu o i matou sa le to’a. O le a matou misia le faigamalaga ma tuua ai i le malae vaalele mo le aso atoa.
Ae o lo’u popolevale atoa lava na liua i le mafanafana ina ua ou faliu i tua ma vaai i a Sister Senba o savalivali mai i le malae vaalele. Sa faateia au ona o loo i ai o ia iina aua na te le’i iloaina le taimi o la matou vaa. A o ia faanatinati mai ia i matou, sa ataata o ia ma tuuina mai ia i matou uma ni falaoa e ave i luga o le vaalele.
A o matou faamalamalama atu ia te ia o le a misia le matou faigamalaga, sa amata ona faanoanoa o ia. E leai se tasi o i matou na iloa le mea e fai. Ona amata lea e Sister Senba ona laga lana ato, ma vaavaai mo se mea e mafai ona fesoasoani ai ia i matou. Sa ia oso fiafia i luga ina ua ia maua se tamai teutusi i lana ato lea na ia, tuuina ai, ini vaiaso ua tuanai le ¥50,000—le aofaiga tonu o le tupe sa matou manaomia. Na ia tuuina mai ia i matou le tupe, ma sa mafai ona matou maua ai a matou pepa malaga i le taimi o le vaa. Sa matou faafetai ia te ia ma aunese uma o le lotofaafetai na matou mafaia, faatofa atu, ma faanatinati atu i luga o le vaalele.
Ina ua lele ese le vaalele, na faliu mai lo’u uso a faifeautalai ia te au ma fai mai, “Pe le o ia o se tagata ofoofogia?! O se vavega lena mea!”
Ona ou iloaina ai lea o se vavega moni lava lena mea. Ona ia fai mai lea, “O le a se mea o fai mai ai lau tusi puupuu?” Sa ou iloa atu o ia faitauina se tusi puupuu sa i ai faatasi ma le falaoa na tuuina atu ia te ia e Sister Senba. Ina ua ou iloaina sa ou maua foi se tusi puupuu, sa ou aumaia i fafo le tusi puupuu ma faitau se tamai fasi pepa na tusia faapitoa lava ia te au, lea na vave lava ona faatumuina o’u mata i loimata. Na faapea mai, “ou te alofa ia te oe! Faamolemole aua nei galo mai au! O le a ou le faagaloina lava oe!”
I lena taimi sa ou lagonaina ai le Agaga ua sili atu le malosi nai lo se isi lava taimi muamua. Sa aoaoina au e le faataitaiga a sister Senba i le taua o le mulimuli i uunaiga a le Agaga—e tusa lava po o le a le laitiiti po o le tulagaese atonu e foliga mai ai le uunaiga. E ala mai i nei uunaiga ua ia i tatou le mana e suia ai olaga mo le lelei sili atu. Ou te iloa e le o se laki lea na sau ai o ia i le malae vaalele. O se vavega lena mea.
E moni lava e faaaoga e le Alii mea faatauvaa e faataunuu ai Lana galuega. O se faamanuiaga lava mo i tatou tagata o lenei Ekalesia le i ai o Lana uunaiga i o tatou olaga. Sei o tatou tumau i le agavaa ina ia maua ai nei uunaiga ma faamanuia ai olaga o fanau a le Atua.