ʻIenisī

Ne mau fie maʻu maʻu pē mo hoku ngaahi tokouá ha hoosi. ʻI heʻeku taʻu 9 pe 10 nai, naʻe fakatau mai ʻe heʻeku tangataʻeikí ha hoosi fefine ʻuliʻuli fakaʻofoʻofa. Ne mau ui ia ko ʻIenisī. Ne mau fiefia ʻaupito ke maʻu ʻa e hōsí ni, ka naʻe teʻeki ai ke akoʻi ia ke lava ʻo fai ha heka ai. Ne mau fuʻu kei iiki ke fai kotoa e ngāue lahi ʻoku fie maʻu ke akoʻi ʻaki ha hōsí, ko ia naʻe kole ʻe heʻeku tangataʻeikí ha kaungāmeʻa ʻokú ne ʻilo lahi ki he fanga hōsí ke tokoni ʻi hono akoʻi ʻo ʻIenisií.

Ne mau faʻa ō ki he kai kaiʻangá ke vakai kia ʻIenisī. Ne ʻikai ke mau faʻa tatali ki he ʻaho te mau lava ai ʻo heka aí. Ka neongo pe naʻe lahi fēfē e feinga ʻa ha taha, naʻe ʻikai pē lava ha taha ia ʻo akoʻi ʻa ʻIenisī. Naʻá ne fuʻu ongongataʻa. Naʻe ʻikai pē ke mau lava ʻo heka ai.

ʻI he ʻaho ʻe taha, ne feinga e kaungāmeʻa ʻo ʻeku tamaí ke heka ai ʻi ha laka. ʻI he taimi naʻe ʻalu hifo ai ʻa ʻIenisī mo e tokotaha ne heka aí, ʻi he halá, naʻe puna pea fakatooki ʻe ʻIenisī e tokotaha heká ki lalo pea kamata ke ne lele he koló. Naʻe lele makaka ʻaupito ʻa ʻIenisī ʻo lavea ai hono vaʻé ʻi ha paipa vai. Naʻá ku tuli mui atu ʻia ʻIenisī peá u maʻu ia ʻoku tokoto mamahi mai he veʻe halá.

Naʻá ku loto mamahi. Ne mau ʻofa ʻia ʻIenisī. Kapau naʻá ne talangofua ki he faiakó, naʻá ne mei hoko ko ha hoosi fiefia mo moʻui lelei. Ka naʻe ʻikai fanongo mo muimui ʻa ʻIenisī ia ki hono pulé. Ka kuó ne lavea he taimí ni pea tokoto ʻi he halá ʻi lotomālie.

Naʻe akoʻi au ʻe he talanoa ʻo ʻIenisií ki he ngaahi tāpuaki ʻoku maʻu ʻi he taimi ʻoku tau muimui ai ki he ʻEiki, ʻa ia ko hotau Fakamoʻui ko Sīsū Kalaisí. ʻI he taimi ʻoku tau angaʻofa mo angamalū mo loto-fakatōkilalo aí, ʻe lava ke tau fiefia ʻi heʻetau tukuange ke tataki kitautolu ʻe he Fakamoʻuí.