ʻOkú Ne Fie Maʻu ʻEku Tokoní he Taimí Ni

ʻOku ou tangutu ʻi he mīsini tuituí ʻo tuitui ha ngaahi konga tupenu. ʻOku teuteuʻi ʻe he ngaahi sīpinga lanu fakaʻofoʻofa maʻá e fānaú ʻa e tafaʻaki ki ʻolungá, pea hā fakaʻofoʻofa mai e ngaahi lanú mei he tafaʻaki ki tuʻa ʻo e ngaahi kafu ʻoku ou tuitui maʻá e pēpē toki fāʻeleʻí.

ʻOku tānaki ʻe he Kau Fineʻofa ʻi homau uōtí ha fanga kiʻi meʻa fāʻele ki he ngaahi feituʻu ʻoku masivesiva mo uesia ʻe he fakatamakí. ʻOku ʻikai ko ha fefine tuitui au, ka kuó u tukupā ke u kau. ʻOku ou fiefia ʻi hono fili ʻo e tupenu ke fakaʻaongaʻí mo hono kosi ʻo e ngaahi tapafā lahi tatau mo e sipi kafú.

ʻOku ou fakatahaʻi e tafaʻaki toʻomataʻu ʻo e tupenú, tuitui takai e tapá, pea tuku ha kiʻi konga ke fulihi ʻaki e tafaʻaki totonú ki tuʻa. ʻOku ou tuitui leva e tapá, kosiʻi e ngaahi tulikí, fulihi e kafú ke taupotu e tafaʻaki lanu kehekehé ki tuʻa, pea tuituiʻi e konga naʻe tuku taʻe tuituí.

ʻOku ou tuitui e tafaʻaki ki ʻolunga ʻo e ngaahi tapá ke fakapapauʻi ʻoku maʻu e tuituí. ʻOku ou tuku fakalelei e tupenú ʻi he mīsini tuituí pea tuitui fakavavevave. ʻI heʻeku fakavavevave ko ia ke ʻosi kae fakaʻosi ʻeku ngaahi ngāue fakaʻapí, naʻe haʻu ha fakakaukau kiate au: “Fēfē kapau ko ʻeku tuitui e kafu ko ʻení maʻá e valevale ko Sīsuú?”

ʻI heʻeku maʻu e fakakaukau ko iá, naʻá ku māmālie hifo pea tokanga ʻaupito ke hangatonu e tuituí. Ka neongo ʻeku tokangá, naʻe ʻikai pē ke hangatonu e tuituí ia.

ʻOku ou tuitui leva ha tapafā ʻinisi ʻe 10 (25 cm) ʻi lotomālie ke fakamaʻu fakataha e ongo tafaʻaki ki muʻa mo muí. ʻOku ou ngaohi ha sīpinga pepa matolu, fokotuʻu ia ʻi he lotomālie ʻo e sipí, pea fakaʻilongaʻi takai ia. ʻOku ou tuku fakalelei e tupenú ʻi he mīsini tuituí, tuku hifo fakalelei e huí, pea tuitui fakalelei.

ʻI he taimi ʻoku ʻosi aí, ʻoku ou tuʻusi e filó pea toʻo hake e kafu kuo ʻosí. ʻOku ʻikai ke tapafā ia—ʻoku hangē ia ha tapafā tapa kehekehé.

ʻOku ou tuku e kafú ki he tafaʻakí, toʻo hake ha tupenu foʻou, pea kamata foʻou—ʻo toe ngāue lahi ange ke feʻunga e meʻaʻofa ko ʻení mo e ʻOtuá. Ka ʻoku aʻu pē ki he lahi ʻo e ngāué, ʻoku fakalakalaka siʻisiʻi pē hono olá. ʻOku ʻikai ke feʻunga e kafu takitaha ʻoku ou tuituí.

ʻOku ou ongoʻi ʻoku ʻikai ke u lava ʻo ʻave ha taha ʻo e ngaahi kafú he taʻú ni ki he feituʻu tānakiʻangá. ʻE hoko atu ʻeku akoakó, pea mahalo pē ʻe ʻi ai ha ʻaho te u lava ai ʻo tokoni.

ʻOku toe haʻu ha fakakaukau ʻe taha ki hoku ʻatamaí: “Kapau te ke tatali kae ʻoua kuo lelei ʻaupito hoʻo tuituí, e aʻu e valevale ia ko Kalaisí ki ʻIsipite.”

ʻOku mahino kiate au. ʻE mole e faingamālie ke tokoní. ʻOku tali ʻe he Fakamoʻuí ʻetau ngaahi foakí ʻi he taimi ʻoku tau fakaʻaongaʻi ai hotau lelei tahá, neongo ʻoku ʻikai ke feʻunga. ʻOku ou ʻilo he ʻikai ke taʻe fie mohe ha valevale toki fāʻeleʻi, ʻoku takatakaiʻi ʻaki ha sipi kafu molū, mo maʻa, koeʻuhí ko e ʻikai tapafā e ngaahi tulikí.

ʻI heʻeku fakakaukau atu pe ʻe ʻaonga ʻeku ngaahi ngāue ʻi he ngaahi fie maʻu ʻa e funga ʻo e māmaní, ʻoku haʻu e akonaki ʻa Kalaisí ki heʻeku fakakaukaú: “Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú” (Mātiu 25:40).

Ko ia ʻoku hokohoko atu ʻeku tuitui sipi kafú, ʻo feingaʻi ki he fakaʻofoʻofa taha te u lavá. ʻOku ou ʻilo ʻoku ʻi ai ha fie maʻu he taimí ni, kae ʻikai ʻi ha taimi taʻe pau he kahaʻú ʻi heʻeku lava ʻo tuitui leleí.