Ko ʻEmau Meʻaʻofa Kilisimasi Lelei Tahá
Adriana Nava Navarro, Polīviá
Kuo tānaki mai ʻa homau fāmilí ke mau fakafiefia, ʻi he Efiafi kimuʻa he Kilisimasí ʻo hangē ʻoku mau fai ʻi he taʻu kotoa peé. Naʻe ofi ke hoko e 12 tuʻuapō ʻi hono ui fakataha kimautolu ʻe he Tangataʻeikí, ʻo talamai ʻoku ʻi ai ha meʻa ke ne fakaʻaliʻali mai kiate kimautolu.
Naʻe ʻikai ke mau fakatokangaʻi mo hoku ngaahi tokouá mo ʻemau faʻeé e meʻa naʻe teuteu ʻe he Tangataʻeikí, koeʻuhí ko e teuteu mo e fiefia kotoa ʻoku hoko ʻi he Efiafi kimuʻa he Kilisimasí. ʻI heʻemau maau fakatahá, naʻá ne kamata leva ke fakaʻaliʻali mai ha ngaahi tā.
Naʻe fakahā mai ʻe he Tangataʻeikí ʻene ʻofa kiate kimautolú, ʻi heʻene fakaʻaliʻali mai ʻa e taá, ʻa ia naʻe kau ai ha fakatātā ʻo e Fakamoʻuí, ngaahi ʻata ʻo e Kilisimasí, mo e ngaahi kupuʻi lea ne fili fakalelei. Naʻe toe fakamanatu mai foki ʻe heʻene fakaʻaliʻalí ʻa e ʻuhinga moʻoni ʻo e Kilisimasí mo e fiefia mo e loto houngaʻia ʻoku totonu ke tau maʻu ki he ʻaloʻi ʻo e Fakamoʻuí. Naʻe hā foki ʻi ha laʻi tā ʻe taha ʻo ha fuʻu ʻakau Kilisimasi fakaʻofoʻofa e ngaahi lea, “ʻE ʻomi kiate au ʻe he ʻofa ʻa Sīsū Kalaisí ha moʻui foʻou ʻi he Kilisimasi ko ʻení.”
Ko e konga mahuʻinga taha ʻo e fakaʻaliʻali ʻa e Tangataʻeikí ko ʻene ngāue ʻaki ai ha tā valivali ʻo e Fakamoʻuí ke ʻomi kiate kimautolu ha ongoongo. Naʻe ʻikai ko ha faʻahinga ongoongo noa pē ia; ka ko e ongoongo lelei tahá ia. Naʻe hā ʻi ʻolunga ʻi he Fakamoʻuí ʻa e ngaahi lea “Kuó u fakakaukau ke u papitaiso ʻi he Siasi ʻo Sīsū Kalaisi ʻo e Ngaahi ʻAho Kimui Ní.”
Ne faifai pea fakakaukau ʻemau tamaí ke kau ki he Siasí! Mahalo ʻe ala faingofua pē ʻa e fili ko iá ki ha kakai ʻe niʻihi, ka naʻe faingataʻa ʻaupito ia ki heʻemau tamaí. Kuó ne ako e ongoongoleleí pea ako fekauʻaki mo e Siasí ʻi he taʻu ʻe 25. Neongo ʻemau ngaahi ngāue lelei tahá mo e ngaahi fealeaʻaki lahi mo e kau faifekaú, ka naʻe teʻeki ai pē ke ne papitaiso. Naʻe ʻikai ke mahino kiate kimautolu hono ʻuhingá, ka naʻa mau ʻiloʻi naʻe teʻeki ai ke ne mateuteu.
Ko e moʻoni ne ʻi ai e ngaahi taimi ne u ongoʻi ai he ʻikai pē ke papitaiso ʻeku tamaí. Ka neongo ia, naʻe ʻikai pē mole mei hoku lotó ʻa e ʻamanaki leleí, pea ne mau hoko atu ʻi hono lotua iá. Naʻe tali ʻe he ʻEikí ʻemau lotú, ʻi he Efiafi kimuʻa he Kilisimasí.
ʻI he taimi naʻe fakahoko mai ʻai ʻe he Tangataʻeikí ʻene filí, ko e ʻuluaki meʻa pē naʻa mau faí ko e tangi ʻi he fiefia. Naʻa mau maʻu ha ngaahi ongo kehekehe—fiefia, ʻohovale, pea mahulu hake aí, ko ha fiefia lahi fau ʻa ia ʻoku faingataʻa ke fakamatalaʻi.
Naʻe ʻikai liliu pē ʻe he ongoongo ʻa e Tangataʻeikí e Efiafi kimuʻa he Kilisimasí—ka naʻá ne liliu e moʻui homau fāmilí kotoa. ʻOku kei fie maʻu pē ke mau fakalakalaka fakafoʻituitui mo fakafāmili, ka ʻoku ou ʻiloʻi ʻe lelei ange e kahaʻú he taimí ni koeʻuhí ʻoku mau fakataha ʻi he Siasí.
ʻOku ou loto houngaʻia ʻaupito ʻi he ʻEikí koeʻuhí ko e tāpuaki ko ʻení. ʻE silaʻi homau fāmilí ʻi ha ngaahi māhina siʻi ʻi he temipalé. Naʻe hoko e ongoongo ko ia ʻa e Tangataʻeikí ko e meʻaʻofa Kilisimasi lelei tahá.