Malakai

ʻOku ʻuhinga hoku hingoá “ko ʻeku talafekau,” pea ʻi heʻene peheé naʻá ku fakahoko e “mamafa [ʻo e] folofola ʻa e [ʻEikí] ki ʻIsilelí.”¹ ʻI hoku kuongá, fakafuofua ki he taʻu ʻe 450 kimuʻa hono ʻaloʻi ʻa Kalaisí,² naʻe kamata ke lotosiʻi ʻa e tokolahi ʻo e kau Siú pea ʻikai ke nau toe moʻui angatonu.³ Naʻe valokiʻi kinautolu ʻe he ʻEikí ʻo fakafou ʻi heʻeku ngaahi akonakí.

Naʻe faʻa angamaheni ʻaki e līʻoa ʻa e kau taulaʻeiki Siu meí he hako ʻo Līvaí ki he fakahoko e ngaahi ouaú, ka naʻe angakovi ʻa e kau Līvai ʻi hoku taimí. Naʻa nau fuʻu taʻehoungaʻia, fakafisi ke fakalāngilangiʻi ʻa e ʻOtuá, pea feilaulau ʻaki ʻa e mā ʻuli mo e monumanu taʻe haohaoá.⁴ Kuo nau maumauʻi ʻa e fuakava ʻo e lakanga fakataulaʻeikí naʻe fai ʻe he ʻOtuá mo Līvaí.

Naʻe angakovi foki mo e kakaí—ʻo ʻikai ngata pē ʻi he kau taulaʻeikí. Naʻa nau mali ki tuʻa he fuakavá, vete honau ngaahi uaifi ne nau mali ʻi heʻenau kei talavoú, pea fakafisi ke totongi ʻenau vahehongofulú mo e ngaahi foakí.⁵

Neongo naʻe folofola ʻa e ʻEikí fekauʻaki mo e ngaahi ʻulungaanga kovi ko ʻení, ka naʻá Ne finangalo lelei ke fakamolemoleʻi koeʻuhí he naʻá Ne ʻofa ki Hono kakaí: “Tafoki mai kiate au, pea te u tafoki kiate kimoutolu.”⁶ Ko e founga ʻe taha ke tafoki ai ki he ʻEikí ko hono ʻomi “ʻa e ngaahi vahehongofulu ʻo e meʻá ki he tukuʻanga koloá.”⁷

Naʻe lāunga e kakaí, “Ko e meʻa taʻeʻaonga ʻa e tauhi ki he ʻOtuá: … ʻoku fakalanga hake ʻa kinautolu ʻoku fai angahalá [ke tuʻumālie],”⁸ ka naʻá ku akoʻi ko e ngaahi hingoa ʻo kinautolu naʻe “manavahē ki he [ʻEikí] … mo nau faʻa fakalaulauloto ki hono huafá” naʻe tohi ia ʻi ha “tohi fakamanatu.”⁹

Naʻá ku toe kikiteʻi foki “ʻe tatau mo e vevé” ʻa e kau fai angahalá, ʻi he Hāʻele ʻAngaua Mai ʻa e ʻEikí, ka ko kinautolu ʻoku nau manavahē ki Hono huafá “ʻe hopo hake ʻa e laʻā ʻo e angatonú mo e fakamoʻuí ʻi hono kapakaú.”¹⁰

Naʻá ku kikiteʻi ʻe haʻu e palōfita ko ʻIlaisiaá kimuʻa ʻi he Hāʻele ʻAngaua Maí, ke toe fakafoki mai e ngaahi kī ʻo e lakanga fakataulaʻeiki ʻa ia te ne “liliu ʻa e loto ʻo e mātuʻá ki he fānaú, mo e loto ʻo e fānaú ki heʻenau mātuʻá.”¹¹

ʻOku tau ʻiloʻi ʻi heʻeku ngaahi akonakí, ʻoku manatuʻi ʻe he ʻEikí Hono kakaí mo tauhi ʻEne ngaahi talaʻofa ki Heʻene fānau faivelengá. ʻOkú Ne fie maʻu ke tau tui ki he ngaahi talaʻofa ko ʻení pea, ke tau toe foki hake kiate Ia ʻi he fakatomalá.¹²