Ko e Fakamoʻuí mo e Sākalamēnití

ʻĪmisi

A young man taking the sacrament.

Ko e hā ʻokú ke fakakaukau ki ai ʻi he taimi ʻokú ke kai ai ʻa e maá mo inu he vai ʻo e sākalamēnití pe ʻi he taimi ʻokú ke teuteuʻi, tāpuakiʻi, pe tufaki ai e sākalamēnití? Ko e tokolahi ʻo kitautolu ʻoku tau fakalaulauloto ki heʻetau ngaahi fuakavá mo e founga ʻoku tau moʻui ʻakí. ʻOku tau fakakaukau fekauʻaki mo ʻetau ngaahi angahalá mo lotua ke maʻu ha fakamolemole pea fakapapau ke fai lelei.

Ko e ngaahi konga mahuʻinga ʻeni ʻo e ouau ʻo e sākalamēnití. ʻOku toe ʻi ai foki mo ha meʻa kehe ke fakalaulauloto ki ai—ko ha meʻa ʻoku fuʻu loloto pea pau ʻa ia ʻoku kau ia ʻi he lotu ʻo e sākalamēnití. Ko hono manatuʻi ko ia ʻa Sīsū Kalaisi, ko e ʻAlo ʻo e ʻOtuá, ko e Fakamoʻui ʻo e māmaní. Ko kinautolu ʻoku nau kai ʻa e maá ʻoku nau palōmesi ke nau “ʻilo ʻi he fakamanatu ki he sino ʻo [e] ʻAló” pea ke “manatu maʻu ai pē kiate ia” (T&F 20:77). Ko e meʻa tatau pē, kiate kinautolu ʻoku nau inu e vaí, ʻoku nau palōmesi ke inu “ʻi he fakamanatu ʻa e taʻataʻa ʻo [e] ʻAló” pea “ʻoku nau manatu maʻu ai pē kiate ia” (T&F 20:79).

ʻOku mahuʻinga ki he ouaú ʻa e fili ko ia ke manatuʻi ʻa e Fakamoʻuí mo ʻEne Fakaleleí mo e feilaulaú. Hangē ko hono akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻI he lea faingofua mo fakaʻofoʻofa ʻo e lotu sākalamēnití … ʻoku hangē ko e foʻi lea mahuʻinga taha ʻoku tau fanongo ki aí ko e manatú. … Ko e meʻa ʻoku fakamamafaʻi ʻi he ongo lotú fakatouʻosi ko hono fakahoko kotoa ʻeni ʻi he fakamanatu ʻo Kalaisí. ʻI heʻetau maʻu iá ʻoku tau fakamoʻoniʻi ai te tau manatu maʻu ai pē kiate ia, koeʻuhí ke ʻiate kitautolu maʻu ai pē ʻa hono Laumālié.”¹

ʻĪmisi

Frontal head and shoulders portrait of Jesus Christ. Christ is depicted wearing a pale red robe with a white and blue shawl over one shoulder. Light emanates from His face.

Naʻe fakamamafaʻi ʻe he Fakamoʻuí ʻa e ngaahi meʻa tatau pē ʻi he taimi naʻá Ne fakahoko ai e sākalamēnití mo ʻEne kau ʻaposetoló, lolotonga e kātoanga Laka Atú ʻi Selusalema ʻi he pō fakaʻosi ʻo ʻEne ngāue ʻi he moʻui fakamatelié—ko e pō naʻá Ne mamahi ai ʻi he Ngoue ko Ketisemaní koeʻuhí ko kitautolu kimuʻa peá Ne toe mamahi ʻi he kolosí. Hangē ko ʻení, hili hono ʻoange kiate kinautolu ʻa e mā ke kaí, naʻá Ne pehē, “Ko hoku sinó ʻeni, ʻa ia kuo foaki koeʻuhí ko kimoutolu: fai ʻeni ʻi he fakamanatu kiate au” (Luke 22:19–20; vakai foki, Mātiu 26:26–28).

Lolotonga e ʻuluaki ʻaho ʻo e Fakamoʻuí ʻi he lotolotonga ʻo e kau Nīfaí ʻi he ongo ʻAmeliká, naʻá Ne toe akoʻi foki kiate kinautolu ʻa e ouau ʻo e sākalamēnití. Naʻá Ne toe fakahinohinoʻi kinautolu ke nau maʻu ia ʻi he fakamanatu ki Hono sinó mo e taʻataʻá pea fakahā kiate kinautolu ʻi heʻenau fai iá, “ʻe hoko ia ko e fakamoʻoni ki he Tamaí ʻoku mou manatu maʻu ai pē kiate au” (3 Nīfai 18:7). Naʻá ne palōmesi ange leva, “Kapau ʻoku mou manatu maʻu ai pē kiate au te mou maʻu hoku Laumālié ke ʻiate kimoutolu” (3 Nīfai 18:7, 11).

Ko ha tāpuaki fakaofo moʻoni ia! Ko e hā ha meʻaʻofa mahuʻinga ange te tau toe lava kemaʻu, ʻi ha māmani ʻoku fonu ʻi he ngaahi faingataʻá mo e puputuʻú mo e ngaahi ʻahiʻahi ʻoku feinga maʻu pē ke ne taki halaʻi kitautolú? ʻI heʻetau maʻu ʻa e Laumālié, te tau lava leva ʻo “ʻiloʻi hono moʻoni ʻo e ngaahi meʻa kotoa pē” (Molonai 10:5). Te ne ʻomi ai kiate kitautolu e mālohi mo e poto ke moʻui ʻi he founga ʻoku fie maʻu ʻe he ʻEikí ke tau moʻui ʻakí, ke fai ʻa e ngaahi fili ʻoku totonú, ke ngāue faivelenga, pea hoko ʻo hangē ko Iá.

Ko e hā te mou lava ʻo fai ke manatuʻi ai Ia, ʻi hoʻomou maʻu e sākalamēnití ʻi he uike takitaha? Ko e hā te mou lava ʻo fai ke manatu maʻu ai pē kiate Ia—ʻi he kotoa ʻo e uiké pea ʻi hoʻomou moʻuí?

ʻOku ou fie fakaafeʻi kimoutolu ke mou fakalaulauloto ki he ngaahi fehuʻi ko iá pea fai ha tukupā ke manatu maʻu ai pē ki he Fakamoʻuí. Te ke ofo ʻi he founga te ne liliu hoʻo moʻuí.