Muri ira na Parofita

Au a veiqaravi ena Mataivalu e Wai ni Amerika ena mua ni Karua ni Valu Levu. Au a dua na dausoko, na itutu e ra duadua ena mataivalu e wai. Au a qai rawata na Dausoko Kalasi Dua, ka tarava na noqu rawata na iLesilesi Vakavunivola Kalasi Tolu.

Sa mai cava na iKarua ni Valu Levu, kaʼu qai vagalalataki. Ia au a cakava e dua na lalawa-ka, kevaka meʼu na lesu tale ki na mataivalu, au sa vinakata meʼu veiqaravi vaka e dua na vakailesilesi vakaivalu. Au vakasamataka, “Sega tale na valenikuro duka vei au, sega tale na masi vuloa, ke rawa niʼu levea”.

Ni oti na noqu vakagalalataki, au a lewena na Mataivalu e Wai Tuvakawawa ni Amerika. Au a laki vakatovotovo ena veibogi ni Moniti. Au a vuli sara vagumatua meʼu na rawaka vakavuli. Au a taura na veimataqali veitarogi e nanumi rawa: kena vakasama, vakayago, kei na vakanananu eloma. Me itinitini, a basika mai na itukutuku totoka: Ko sa vakadonui mo ciqoma na ilesilesi vaka dua na turaganivalu e ra ena Mataivalu e Wai Tuvakawawa ni Amerika.

Au a vakaraitaka ena yalomarau ki vua na watiqu, o Frances, ka kaya, “Au sa rawata! Au sa rawata!” A mokoti au o koya ka kaya, “Ko sa cakacaka dina vakaukauwa mo rawata.”

Ia a qai yaco e dua na ka. Au a kacivi meʼu laki dua na daunivakasala ena matabisopi ni noqu tabanalevu. Na soqoni ni matabose ni bisopi a vakayacori ena bogi vata ga ni noqu soqoni ni vakatovotovo ena mataivalu e wai. Au kila ni sa tiko e dua na veicoqacoqa mosimosi. Au kila ni sa sega vei au na gauna meʼu tomana kina na Mataivalu e Wai Tuvakawawa kei na noqu itavi ki na matabisopi. Na cava meʼu sa na cakava? Sa dodonu me caka e dua na vakatulewa.

Au a masulaka. Kaʼu sa mani laki raica na turaga ka a noqu peresitedi ni iteki niʼu a se gonetagane voli, o Elder Harold B. Lee (1899–1973), ka lewe ni Kuoramu ni iApositolo Le Tinikarua ena gauna oya. Au a dabe sobu veibasai mai na nona teveli. Au tukuna vua na levu ni noqu vakamareqeta na ilesilesi oya. Au a vakaraitaka vua vakaidina, na ilavelave ni vola ni veikacivi au a ciqoma.

Ni oti e dua na gauna ni nona vakasamataka tiko na ka oqo, a kaya vei au, “Oqo na ka mo na cakava, Baraca Monson. Mo vola e dua na ivola ki na Bureau of Naval Affairs ka tukuna vei ira ni baleta na nomu veikacivi mo na dua na lewe ni matabisopi, sa na sega kina ni o vakadonuya na ilesilesi ena Mataivalu e Wai Tuvakawawa ni Amerika.”

A luvuci na lomaqu. A kuria okoya, “Qai volavola ki na komada ni Twelfth Naval District e San Francisco ka tukuna vei ira ni ko na vinakata mo na vakagalalataki mai na tuvakawawa.”

Au a kaya, “Elder Lee, ko ni sega ni kila vakamatata na mataivalu. Era na sega ni vakatara vakaidina me na soli vei au na ilesilesi oya kevaka au na sega ni vakadonuya, ia na Twelfth Naval District ena sega ni sorovi au. Ni labuebue voli na ivalu e Korea, ena kacivi vakaidina e dua na turaganivalu se bera ni lesi vakaivalu. Keu kacivi lesu, au na via lesu tale vaka e dua na turaganivalu, ia au na sega kevaka au sega ni vakadonuya na ilesilesi oqo. Ko ni sa vakadeitaka li ni oqo na ivakasala ko ni sa vinakata meʼu ciqoma?”

A biuta o Elder Lee na ligana ki na tabaqu ka kaya ena sala vakatama, “Baraca Monson, mo vakabauta vakalevu cake . Na bula vakaivalu e sega ni rauti iko.”

Au lako i vale. Au biuta lesu tale na ivola ni veilesi tauvi wai ni mata ki na kena waqanivola vata kei na ivola veitokoni ka sega ni vakatara ni ciqoma. Au sa qai vola e dua na ivola ki na Twelfth Naval District ka kerea na veivakagalalataki mai na Mataivalu e Wai Tuvakawawa.

Na noqu vagalalataki mai na Mataivalu e Wai Tuvakawawa a tiko ena iotioti ni lawalawa ka cakacakataki ni bera na kena cabolo na iValu e Korea. A yavalati na cakacaka ena noqu valenivolavola liu. Oti e ono na macawa na noqu kacivi meʼu dua na daunivakasala ena matabisopi, au a kacivi meʼu sa bisopi ni noqu tabanalevu.

Au na sega ni taura na itutu ena Lotu au taura tu nikua kevaka au a sega ni muria na ivakasala ni dua na parofita, kevaka au a sega ni masulaka na vakatulewa oya, kevaka au a sega ni mai marautaka e dua na dina bibi: na vuku ni Kalou dau rairai tu vakavuqa me ka lialia ki vua na tamata.¹ Ia na lesoni levu duadua eda rawa ni vulica ena bula oqo oya ni sa vosa na Kalou ka ra talairawarawa na Luvena, era na donu tu ga.

E sa dau tukuni tu ni veika makawa e veivukiaki ena iji lalai ka sa vakakina na noda bula. Na vakatulewa e vakatautaka na icavacava. Ia eda sa sega ni talabiutaki tu ena noda vakatulewa.

Kevaka o vinakata mo raica na rarama mai lomalagi, kevaka o vinakata mo vakila na veivakauqeti ni Kalou Kaukauwa, kevaka o vinakata mo taukena na veivakilai oya e vunilomamu ni sa tuberi iko tiko na Tamamu Vakalomalagi, muri ira ga na parofita ni Kalou. Ni ko muri ira na parofita, o na tiko ena yalava taqomaki.