Surotenyo dagiti Propeta

Nagserbiak iti United States Navy agingga iti gibus ti Maikadua a Gubat iti Lubong. Maysaak a seaman, ti kababaan a mabalin a ranggo iti navy. Kalpasanna nagbalinak a kualipikado nga agbalin a Seaman First Class, kalpasanna nakualipikadoak nga agbalin a Yeoman Third Class.

Naggibus ti Maikadua a Gubat ti Lubong, ket idi agangay nagikkatak. Ngem inkeddengko a no agsubliak iti military, kayatko ti agserbi a kas maysa a commissioned officer. Napanunotko, “Diakon agluto iti kusina, diakon agkuskos iti kubierta, no maliklikak daytoy.”

Kalpasan a nagikkatak, kimmappengak iti United States Naval Reserve. Nagsanayak iti tunggal rabii ti Lunes. Nagadalak a nasayaat tapno makualipikadoak iti akademia. Innalak ti amin a klase ti eksamen a napanunotko: mainaig iti panunot, bagi, ken rikna. Kamaudiananna, dimteng ti napintas a damag: “Naawatka nga umawat iti appointment ti maysa a wagayway iti United States Naval Reserve.”

Siraragsak nga impakitak daytoy iti asawak, ni Frances, ket kinunak, “Naawatak! Naawatak!” Inarakupnak ket kinunana,“Inkarigatam ti nagbannog tapno magun-odmo daytoy.”

Ngem kalpasanna maysa a banag ti napasamak. Naawaganak nga agbalin a mammagbaga iti bishopric ti wardko. Naaramid ti bishop’s council meeting iti dayta met la a rabii ti navy drill meetingko. Ammok nga adda dakkel a parikut. Ammok nga awan ti panawenko a mangipatungpal iti Naval Reserve ken dagiti pagrebbengak iti bishopric. Ania ti nasken nga aramidek. Nasken nga agdesisionak.

Inkararagak daytoy. Kalpasanna nakipagkitaak iti tao nga stake presidentko idi ubingak, ni Elder Harold B. Lee (1899–1973), ti Korum dagiti Sangapulo-ket-dua nga Apostol idi. Nagsinnangakokami iti tugaw iti lamisaan. Imbagak kenkuana no kasano ti kapateg kaniak dayta nga appointment. Kinapudnona, impakitak ti kopia ti surat ti appointment a naawatko.

Kalpasan ti panangutobna iti banag iti apagkanito, kinunana kaniak, “Daytoy ti nasken nga aramidem, Brother Monson. Suratam ti Bureau of Naval Affairs ket ibagam kadakuada a gapu iti awagmo kas miembro ti bishopric, saanmo a maawat dayta nga appointment iti United States Naval Reserve.”

Nagladingitak. Innayonna, “Kalpasanna suratam ti commandant ti Twelfth Naval District iti San Francisco ket ibagam kadakuada a kayatmo ti agikkat iti dayta a buyot.”

Kinunak, “Elder Lee, dimo maawatan ti military. Siempre agkedkeddanto nga ited kaniak dayta nga appointment no agkedkedak nga umawat iti daytoy, ngem dinto ipalubos ti Twelfth Naval District a palusposandak. Gapu iti gubat a mapaspasamak iti Korea, awan duadua a maawaganto ti saan a nadutokan nga opisial. No agsubli a maawagan, kaykayatko ti agsubli kas maysa a commissioned offcer, ngem diakto maaramid no diak awaten daytoy nga appointment. Siguradoka kadi a daytoy ti balakad a kayatmo nga awatek?”

Sinallabaynak ni Elder Lee ket kinunana a kasla ama kaniak, ”Brother Monson, padakkelem ta pammatim. Saan a para kenka ti military.”

Nagawidak. Insublik ti natedtedan iti lua nga appointmentko iti sobre a karagpin ti surat ken nagkedkedak nga awaten daytoy. Kalpasanna sinuratak ti Twelfth Naval District ket kiniddawko nga agikkatak iti Naval Reserve.

Ti panagikkatko iti Naval Reserve ket iti kaudian a grupo a nagtuloy sakbay ti panangrugi ti Gubat iti Korea. Naaruatko ti kawesko iti kuartel. Innem a lawas kalpasan a naawaganak nga agbalin a mammagbaga iti bishopric, naawaganak nga agbalin a bishop iti wardko.

Diak koma naaddaan iti saad iti Simbaan ita no diak sinurot ti balakad ti maysa a propeta, no diak inkararagan dayta a desision, diak koma nabigbig ti pateg ti maysa a napateg a kinapudno: ti sirib ti Dios no dadduma kasla kinamaag kadagiti tao.¹ Ngem ti kadakkelan a maysa a leksion a mabalintayo a sursuruen iti mortalidad ket no agsasao ti Dios ket agtungtungpal dagiti annakna, kanayonto nga agbalinda a nasayaat.

Nakuna a ti pakasaritaan ket kasla babassit a pang ngeddeng, ket kasta met ti maaramid iti biagtayo. Dagiti desisiontayo ti mangngeddeng iti pagtungpalantayo. Ngem saantayo nga agmaymaysa kadagiti desisiontayo.

No kayatyo a makita ti lawag ti langit, no kayatyo a mariknan ti pammaregta ti Mannakabalin a Dios, no kayatyo ti maaddaan iti dayta a rikna iti kaungganyo a ti Nailangitan nga Amayo tartarabayennakayo, ngarud surotenyo dagiti propeta ti Dios. No surotenyo dagiti propeta, addakayto iti natalged a lugar.