Cov Mus Saib Xyuas Tom Tsev tsab Xov
Tej Cwj Pwm ntawm Yexus Khetos: Leej Tub uas Mloog Lus
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej lub neej thiab tej luag hauj lwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Thaum peb ua raws li Yexus Khetos tus yam ntxwv peb txoj kev ntseeg Nws loj tuaj. Txwj Laug Jeffrey R. Holland ntawm Pawg Kaum Ob tug Thwj Tim hais tias, “qhov uas Yexus xub xaiv thiab yog qhov tseem ceeb tshaj plaws hais txog nws txoj kev nrog nws leej txiv sib raug zoo yog qhov uas—nws hlub nws leej txiv thiab mloog nws lus thiab ua raws li nws hais vim nws yog ib tug tub uas hlub nws heev?” … Kev mloog lus yog thawj txoj kev cai ntuj ceeb tsheej.”1
Cov vaj lug kub qhia tias, thaum peb tau ib txoj koob hmoov los ntawm Vajtswv, yog los ntawm txoj kev ua raws li txoj kev cai ntawd uas yog txoj koob hmoov ntawm lub hauv paus (saib Q&K 130:20-21). Peb sab ntsuj plig loj hlob thaum peb los nyob ze Vajtswv dhau los ntawm kev mloog lus thiab kev caw lub hwj chim ntawm tus Cawm Seej txoj Kev Theej Txhoj los rau hauv peb lub neej.
Txwj Laug D. Todd Christofferson ntawm Pawg Kaum Ob tug Thwj Tim hais tias, “Thaum peb ua raws li tej ntsiab cai thiab cov lus txib ntawm Yexus Khetos txoj moo zoo, peb txais koob hmoov uas Vajtswv cog lus tias peb yuav txais raws li Nws tau khi lus rau peb. Cov koob hmoov ntawd pab peb ua tej yam thiab tsis txhob raug lwm tus ua tej yam rau peb thaum peb ua neej nyob. … Kev mloog lus ua rau peb muaj peev xwm kav peb lub neej, ua rau peb haj yam muaj peev xwm mus thiab los, ua hauj lwm thiab tsim tej yam tshiab.”2
Vaj Lug Kub Ntxiv
Lukas 22:41–46; Lus Qhuab Qhia thiab Kev Khi Lus 82:10; 93:28
Los ntawm cov Vaj Lug Kub
“Qhov uas muaj zog ntawm sab ntsuj plig vim yus pheej ua raws li cov lus txib tas li puas yog ib qho uas yus faib tau rau lwm tus?” Txwj Laug David A. Bednar, ntawm Pawg Kaum Ob tug Thwj Tim, nug. “Lus teb rau tej lus nug no yog … tsis tau.”3
Zaj lus piv txwv txog kaum tus hluas nkauj qhia txog lub ntsiab cai no. Txawm tag nrho cov hluas nkauj nqa teeb “mub ntsib tus nraug vauv,” tsuas muaj tsib tug hluas nkauj uas muaj tswv yim thiab muaj roj nyob hauv lawv tej teeb. Tsib tug hluas nkauj tsis muaj tswv yim vim lawv “tsis npaj roj.”
Thaum txog ib tag hmo txawm muaj ib lub suab hu nrov nrov hais tias: “Tus nraug vauv tuaj lawm; cia li tawm tuaj tos nws.” Txhua tus hluas nkauj kho lawv tej teeb kom cig, tiam sis cov hluas nkauj uas tsis muaj tswv yim tsis muaj roj lawm. Lawv hais rau cov hluas nkauj uas tsis muaj tswv yim, “Thov muab nej cov roj faib rau peb; rau qhov peb cov teeb roj tas lawm twb yuav tuag.”
Cov hluas nkauj uas muaj tswv yim teb hais tias, “Tsis tau, nyob tsam tsis txaus rau peb thiab nej; nej cia li mus … yuav tom khw rau nej.” Thaum tsis tug hluas nkauj uas tsis muaj tswv yim tab tom mus yuav roj lawm, tus nraug vauv txawm tuaj txog thiab tsib tus hluas nkauj uas muaj tswv yim nrog nws mus thiab “kaw qhov rooj rau lawm”
© 2015 Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/14. Pub txhais ua lus Hmoob: 6/14. Kev txhais lus Visiting Teaching Message, January 2015. Hmong. 12581 295
Xav Txog Qhov No
Leej twg coj yam ntxwv txog kev mloog lus nyob hauv phau vaj lug kub?