Tshooj 82
Kev tshwm sim uas tus Yaj Saub Joseph Smith tau txais, nyob hauv Independence, Ciaj Ciam Av Jackson, Missouri, lub Plaub Hlis Ntuj hnub tim 26, xyoo 1832. Lub sij hawm no muaj kev sib sab laj ntawm cov pov thawj hlob thiab cov txwj laug ntawm lub Koom Txoos. Nyob hauv kev sib sab laj, sawv daws tsa tes pom zoo rau Joseph Smith los ua tus Thawj Tswj Hwm ntawm lub Pov Thawj Hwj Hlob, twb tau muab nws tsa rau lub luag hauj lwm ntawd ua ntej nyob rau hauv ib lub rooj sab laj ntawm cov pov thawj hlob, cov txwj laug, thiab cov mej zeej, nyob hauv Amherst, Ohio, lub Ib Hlis Ntuj hnub tim 25, xyoo 1832 (saib cov lus piav lub ntsiab ntawm tshooj 75). Txoj kev tshwm sim no rov qab hais txog tej lus qhia uas tau muab nyob hauv ib zaj kev tshwm sim ua ntej (tshooj 78) kom txhim tsa ib lub koom haum ua lag luam—uas lawv hu ua lub Koom Haum Ua Lag Luam Koom Siab (raws li Joseph Smith qhia, tau muab lo lus “koom haum” los hloov lo lus “koom haum ua lag luam”)—los tuav lub Koom Txoos tej kev ua lag luam thiab kev luam ntawv.
1–4, Tus uas tau ntau, tus ntawd yuav tsum pauj ntau; 5–7, Kev tsaus ntuj kav nyob hauv lub ntiaj teb; 8–13, Tus Tswv yuav ua raws li Nws cog lus thaum peb ua raws li Nws hais; 14–18, Xi-oos yuav tsum zoo nkauj thiab dawb huv zuj zus tuaj; 19–24, Txhua tus neeg yuav tsum nrhiav kev ua zoo rau nws tus neeg zej zog.
1 Kuv hais tseeb tseeb rau nej, kuv cov tub qhe, hais tias npaum li uas nej ib tug zam txim rau ib tug tej kev txhaum, twb ib yam li ntawd kuv, tus uas yog tus Tswv, yuav zam txim rau nej.
2 Txawm li ntawd los, muaj cov nyob hauv nej uas tau ua txhaum ntau heev; muaj tseeb tiag, nej sawv daws twb tau ua txhaum; tiam sis kuv hais tseeb rau nej tias, ceev faj txij no mus, thiab tsis txhob ua txhaum, tsam tej kev txiav txim mob heev yuav poob rau saum nej taub hau.
3 Rau qhov tus uas tau ntau tus ntawd yuav tsum pauj ntau; thiab tus uas ua txhaum rau qhov kaj ci tshaj tus ntawd yuav txais kev raug txim loj tshaj.
4 Nej thov kuv lub npe kom tau txais tej kev tshwm sim, thiab kuv muab rau nej; thiab npaum li uas nej tsis ua raws li tej lus kuv hais, uas kuv muab rau nej, nej hloov los ua cov neeg ua txhaum; thiab kev txim lij thiab kev txiav txim yog lub txim uas tau muab txuas rau kuv txoj kev cai.
5 Yog li ntawd, kuv hais dab tsi rau ib tug ces kuv hais rau sawv daws: Saib xyuas, vim tus yeeb ncuab nthuav nws lub hwj chim, thiab kev tsaus ntuj kav;
6 Thiab Vajtswv txoj kev chim siab npau tawm tsam cov neeg ntiaj teb; thiab tsis muaj ib tug ua zoo, vim sawv daws tau tawm ntawm txoj kev mus.
7 Thiab nim no, kuv hais tseeb rau nej tias, kuv, tus uas yog tus Tswv, yuav tsis muab kev txhaum twg rau nej ris; nej cia li mus thiab txhob ua txhaum ntxiv; tiam sis rau tus neeg uas ua txhaum nws tej qub kev txhaum yuav rov qab los, tus Tswv nej tus Vajtswv hais li.
8 Thiab ntxiv, kuv hais rau nej tias, kuv muab ib lo lus txib tshiab rau nej, kom nej yuav to taub kuv lub siab nyiam ntsig txog nej;
9 Los yog hais tias, kuv muab tej kev qhia rau nej kom nej paub coj li cas rau kuv pom, kom yuav pab nej tau nej txoj kev cawm seej.
10 Kuv, tus uas yog tus Tswv, yuav tsum ua raws li kuv cog lus thaum nej ua raws li kuv hais; tiam sis thaum nej tsis ua raws li kuv hais, nej tsis tau kev cog lus.
11 Yog li ntawd, kuv hais tseeb rau nej tias, tsim nyog uas kuv tus tub qhe Edward Partridge thiab Newel K. Whitney, A. Sidney Gilbert thiab Sidney Rigdon, thiab kuv tus tub qhe Joseph Smith, thiab John Whitmer thiab Oliver Cowdery, thiab W. W. Phelps thiab Martin Harris los sib khi ua ke nrog ib txoj kev cog lus thiab kev khi lus uas kev ua txhaum yuav rhuav tsis tau, tsuas yog yuav raug txiav txim tom qab kiag xwb, nyob hauv nej ob peb txog hauj lwm saib xyuas—
12 Los tswj tej xwm ntawm cov pluag, thiab txhua yam raws li pawg npisov hauv thaj av Xi-oos thiab hauv thaj av Kirtland tib si;
13 Vim kuv tau fij thaj av Kirtland tseg cia thaum txog lub sij hawm kuv pom zoo rau haiv neeg ntseeg ntawm tus Siab Tshaj Plaws, thiab ua ib ceg txheem ntseeg rau Xi-oos.
14 Vim Xi-oos yuav tsum zoo nkauj thiab dawb huv zuj zus tuaj; nws tej ciaj ciam av yuav tsum dav tuaj; nws tej ceg txheem ntseeg yuav tsum muaj zog tuaj; muaj tseeb tiag, kuv hais tseeb rau nej tias, Xi-oos yuav tsum sawv thiab hnav nws tej tsoos tsho zoo nkauj.
15 Yog li ntawd, kuv muab lo lus txib no rau nej, kom nej muab txoj kev khi lus no khi nej tus kheej ua ke, thiab yuav tsum ua kom raws li tej kev cai ntawm tus Tswv.
16 Saib seb, qhov no kuj yog kuv laj lim tswv yim uas zoo rau nej.
17 Thiab nej yuav tsum sib npaug, los yog hais tias, nej yuav tsum tau tej teej tug sib npaug, kom pab tswj tej xwm txheej ntawm nej tej hauj lwm saib xyuas, txhua tus neeg raws li qhov nws xav tau thiab nws yuav tsum tau, npaum li uas tej nws xav tau ntawd ncaj ncees—
18 Thiab txhua yam no kom pab rau lub koom txoos ntawm tus Vajtswv muaj sia zees nyob, kom txhua tus neeg yuav ua rau nws choj nyiaj muaj ntau ntxiv, kom txhua tus neeg yuav ntsu lwm choj nyiaj, muaj tseeb tiag, li ib puas npaug, muab coj mus tso rau hauv tus Tswv lub tsev rau khoom, los mus ua sawv daws li teej tug rau tag nrho lub koom txoos—
19 Txhua tus neeg nrhiav qhov zoo rau nws tus neeg zej zog, thiab ua txhua yam nrog lub qhov muag ntsia ntsoov rau Vajtswv lub yeeb koob.
20 Kuv tau muab tus txheej txheem no tsa ua ib tug txheej txheem kav ib txhis rau nej, thiab rau cov uas sawv nej chaw tom qab mus, npaum li uas nej tsis ua txhaum.
21 Thiab tus neeg uas ua txhaum rau txoj kev khi lus no, thiab ua nws lub siab tawv qhawv tawm tsam kev khi lus no, nws yuav raug txim raws li tej kev cai ntawm kuv lub koom txoos, thiab yuav raug muab tso rau Dab Ntxwg Nyoog txoj kev tsim txom kom txog hnub txhiv dim.
22 Thiab nim no, kuv hais tseeb rau nej, thiab qhov no yog lub tswv yim, muab nej tus kheej cog ua phooj ywg nrog tej muaj nyiaj nplua nuj uas tsis ncaj ncees, thiab lawv yuav tsis ua rau nej puas tsuaj.
23 Cia txoj kev txiav txim rau kuv ib leeg, vim kev txiav txim yog kuv li thiab kuv yuav them rov qab. Cia li muaj kev kaj siab nrog nej nyob; kuv tej koob hmoov nrog nej nyob mus ntxiv.
24 Vim lub nceeg vaj twb yog nej li, thiab yuav yog mus ib txhis li, yog nej tsis poob ntawm nej txoj kev khov kho mus. Twb yog li ntawd. Amees.