Kantaha ang Imong Paborito nga Himno
Angela Olsen Center, Ohio, USA
Mga paghulagway pinaagi ni Bradley H. Clark
Bag-ohay lang nakong gihimugso ang akong anak nga babaye, si Rebekah. Sakit gyud samtang gabati ko, ug gikapoy ko.
Sa dihang gipahimutang na si Rebekah sa akong bukton, mibati ko nga kinahanglang kantahon nako ang akong paborito nga himno, “Ako Anak sa Dios” (Mga Himno ug mga Awit sa mga Bata, nu. 301). Ang una nakong tubag kay, “Dili, gikapoy ko pag-ayo. Kantahan lang nako siya ana unya.” Apan mibalik kadto nga hunahuna. Busa, bisan tuod gikapoy ko, gisugdan nako pagkanta ang unang bersikulo. Miapil pagkanta ang akong bana ug inahan.
Sa dihang nahuman na namo ang among pagkanta, mibati ko og espesyal nga pagbati diha sa kwarto. Bisan ang doktor, kinsa hangtud nianang puntoha propesyonal kaayo ug dili managad, may mga luhang midagayday sa iyang nawong. Siya nagpasalamat kanamo sa pagkanta niining nindot nga awit. Siya miingon nga sa tanang katuigan nga siya nagpaanak, wala pa siya mobati og sama niini sukad.
Namalandong ko niadtong kasinatian ug naghunahuna kon mangita ba ko og rekord sa himno ug ihatag kaniya. Sa walay swerte, na-busy ko kaayo ug nakalimot na niini.
Dayon miabut na ang adlaw para sa akong postpartum checkup. Sa pagsulod sa doktor sa kwarto, misanag ang iyang panagway, ug iya ko nga gigakos. Siya miingon nga wala gyud siya kalimot sa kanta ug naningkamot gani nga mangita niining musika sa Internet aron iya kining makanta para sa iyang pamilya. Mao kadto nga higayon nga napahinumduman ko sa Espiritu Santo nga mangita og kopya sa musika para niya. Misaad ko niya nga sulod sa semana mobalik ko dala ang musika.
Nianang gabhiuna nag-ampo ko nga makakita og arrangement sa kanta nga pinakanindot para kaniya. Pagkasunod hapon mi-order ko og CD nga nag-feature sa kanta. Sa dihang miabut kini sa koreo mga pipila ka adlaw ang milabay, naghinam-hinam na gyud ko nga ihatag kini kaniya.
Siya nalipay nga midawat niini ug nagpasalamat kanako sa regalo. Miingon siya nako nga dili siya sigurado ngano, apan kini nga kanta importante kaayo niya para ipakigbahin sa iyang pamilya. Samtang nagpadayon mi sa pag-istorya, wala lang nako gipakigbahin kaniya ang akong gugma para sa kanta apan akong pagpamatuod usab sa yanong mga kamatuoran nga gitudlo niini.
Samtang nag-drayb ko padulong pauli nianang adlawa, nabati nako ang gugma sa atong Langitnong Amahan para sa usa sa Iyang anak nga babaye—akong doktor. Siya nakaila ug nahigugma kaniya, ug buot Niya nga siya makasabut nga siya mahimong makabalik Kaniya pag-usab.