Ang Walay Paghunahuna sa Kaugalingon ug Sagradong Sakripisyo sa Manluluwas
Ni Presidente Boyd K. Packer
Presidente sa Korum sa Napulog Duha ka mga Apostoles
Gikan sa usa ka debosyonal nga pakigpulong, “Truths Most Worth Knowing,” nga gihatag didto sa Brigham Young University niadtong Nob. 6, 2011. Alang sa kompleto nga teksto sa Iningles, bisitaha ang speeches.byu.edu.
Ang Ginoo anaa kanunay. Iyang giantus ug gibayaran ang silot kon andam mo nga modawat Niya isip inyong Manunubos.
Kitang tanan nagkinabuhi nga utangan sa espirituhanong paagi. Sa usa ka paagi o sa lain, ang bayrunon (account) nagtubo. Kon hinay-hinay inyong bayaran, dili kaayo mo mabalaka. Sa dili madugay makakat-on mo og disiplina ug masayud nga adunay moabut nga adlaw sa pagpaningil. Pagkat-on sa pagbayad sa inyong espiritwal nga utang kanunay kaysa pasagdan nga magtubo ang interes ug silot niini.
Tungod kay kamo gisulayan, gidahuman nga kamo makahimo og mga sayop. Naghunahuna ko nga kamo nakabuhat og mga butang sa inyong kinabuhi nga inyong gibasulan, gani mga butang nga dili kamo makapangayo og pasaylo, ni makakorihir; busa, nagdala mo og palas-anun. Karon panahon na nga gamiton ang pulong nga kahasol sa konsensya, diin ang lama sama sa indelible nga tinta ug dili sayon nga matangtang. Ang pagbati nga may kalabutan sa kahasol sa konsensya mao ang pagkawala sa kadasig, pagmahay sa nawala nga mga panalangin ug mga oportunidad.
Kon kamo nanlimbasug sa kahasol sa konsensya, kamo sama sa mga tawo diha sa Basahon ni Mormon diin ang propeta miingon, “Tungod sa ilang kadautan ang simbahan misugod sa pagkunhod; ug sila misugod sa dili pagtuo sa espiritu sa pagpanagna ug sa espiritu sa pagpadayag; ug ang mga paghukom sa Dios sa walay kalooy motan-aw kanila sa nawong” (Helaman 4:23).
Kanunay natong sulbaron ang atong problema sa kahasol sa konsensya pinaagi sa pagsulti sa uban ug pagsulti sa atong kaugalingon nga ok ra kini. Apan sa usa ka paagi, sa atong kinahiladman, wala kita motuo niini. Ni kita motuo sa atong kaugalingon kon ato kining isulti. Kita mas nahibalo. Kini mahinungdanon!
Ang mga propeta kanunay nagtudlo sa paghinulsol. Si Alma miingon, “Tan-awa, siya moanhi aron pagtubos niadto kinsa pagabunyagan ngadto sa paghinulsol, pinaagi sa hugot nga pagtuo sa iyang ngalan” (Alma 9:27).
Prangka nga misulti si Alma ngadto sa iyang badlungong anak, “Karon, ang paghinulsol dili modangat ngadto sa mga tawo gawas kon adunay silot, diin usab walay katapusan ingon sa kinabuhi sa kalag nga kinahanglan maingon, gipauban tugbang niana nga laraw sa kalipay” (Alma 42:16).
Adunay duha ka nag-unang mga katuyoan sa mortal nga kinabuhi. Ang una mao ang pagdawat sa lawas nga mahimo, kon atong himoon, malimpyo ug mabayaw ug mabuhi hangtud sa kahangturan. Ang ikaduha ka katuyoan mao ang pagasulayan. Sa pagsulay, kitang tanan sigurado nga masayop. Apan kon atong tugutan, kita makakat-on gikan sa atong mga sayop. “Kon kita magaingon nga wala kita makasala, siya atong gipakabakakon, ug wala kanato ang iyang pulong” (1 Juan 1:10).
Kamo, tingali, mibati nga ubos ra sa panghunahuna ug panglawas ug nabalaka o nabug-atan sa palas-anon sa espiritwal nga bayrunon nga gimarkahan og “milapas na.” Kon kamo mismo makaamgo niining kamatuoran panahon sa pagpamalandong (nga kadaghanan kanato naglikay niini), aduna pa bay mga butang nga wala masulbad nga nakasamok kaninyo? Aduna bay butang nga nakapakonsensya kaninyo? Kamo ba, sa usa ka bahin o sa lain, nahasol sa konsensya nga dili ingon niana ka grabe o grabe kaayo?
Kanunay kami makadawat og mga sulat gikan niadtong nakahimo og dagkong mga sayop ug nabug-atan. Sila naghangyo: “Mapasaylo pa ba ko? Mausab pa ba ko?” Ang tubag kay oo!
Si Pablo mitudlo sa mga taga-Corinto, “Kaninyo walay nakaabut nga bisan unsang pagpanulay nga dili maantus sa tawo: ang Dios kasaligan, ug dili niya itugot kamo nga pagapanulayon sa labaw sa inyong kaarangan, apan uban sa pagpanulay siya magatagana usab og lutsanan sa paglikay aron kamo makahimo sa pag-antus niini” (1 Mga Taga-Corinto 10:13).
Ang ebanghelyo nagtudlo kanato nga ang kahupayan gikan sa kasakit ug kahasol sa konsensya maangkon pinaagi sa paghinulsol. Gawas niadtong pipila—kadtong pipila lang gyud—kinsa miapil sa perdisyon human hingpit nga nasayud, walay kinaiya, walay pagkaadik, walay rebelyon, walay kalapasan, walay sayop gamay man o dako ang dili maapil sa saad sa hingpit nga pagpasaylo. Bisan unsa pa ang mahitabo sa inyong kinabuhi, ang Ginoo nag-andam og paagi aron kamo makabalik kon kamo mosunod sa mga pagdasig sa Espiritu Santo.
Ang uban napuno og mapugsanong pagbati, tintasyon nga magbalik-balik sa hunahuna, tingali aron mahimong batasan, dayon adiksyon. Kita nabantang sa pipila ka kalapasan ug sala ug usab sa pagpangatarungan nga kita dili mobati og kahasol sa konsensya tungod kay kita natawo nianang paagiha. Kita nalit-ag, ug moabut ang kasakit ug kahasol nga ang Manluluwas lamang ang makaayo. Kamo adunay gahum sa paghunong ug maluwas.
Si Satanas Moatake sa Pamilya
Si Presidente Marion G. Romney (1897–1988) kausa misulti ngari kanako, “Ayaw lamang sila sultihi aron sila makasabut, sultihi sila aron dili nila malain sa pagsabut.”
Si Nephi miingon: “Kay ang akong kalag mahimuot sa kayano; kay sa ingon niini nga paagi ang atong Ginoong Dios nagbuhat taliwala sa mga katawhan. Kay ang Ginoong Dios naghatag og kahayag ngadto sa salabutan” (2 Nephi 31:3).
Busa paminaw! Yano ko nga mamulong isip gitawag ug dunay obligasyon sa paghimo niini.
Kamo nasayud nga adunay kaaway. Ang kasulatan mihulagway kaniya niining paagiha: “Kadto nga karaan nga bitin, kinsa mao ang yawa, … ang amahan sa tanan nga mga bakak” (2 Nephi 2:18). Siya gisalikway sa sinugdanan (tan-awa sa D&P 29:36–38) ug wala hatagi og mortal nga lawas. Siya misaad karon nga gun-ubon ang “mahinungdanon nga laraw sa kalipay” (Alma 42:8) ug mahimong kaaway sa tanang pagkamatarung. Siya mitutok sa pag-atake sa pamilya.
Kamo nagpuyo sa panahon diin ang kadaut sa pornograpiya mikuyanap sa tibuok kalibutan. Lisud sa pag-eskapo niini. Ang pornograpiya nakatutok sa bahin sa inyong pagkatawo diin kamo adunay gahum sa pagbaton og kinabuhi.
Ang pagkalambigit sa pornograpiya moresulta ngadto sa mga kalisud, diborsyo, sakit, ug daghang matang sa kagubot. Walay bahin niini nga limpyo. Ang pagkolekta, pagtan-aw, o pagdala-dala niini sa bisan unsang matang susama ra sa pagdala og bitin sa inyong backpack. Kini nagbantang kaninyo sa dili mapugngang pagpaak sa bitin uban sa makamatay nga lala niini. Dali ra nga masabtan, tungod sa kalibutan nga ingon niini karon, nga halos dili tuyoon nga mabantang kamo niini, mobasa niini, o motan-aw niini nga wala maghunahuna sa grabeng sangputanan niini. Kon kini nahitabo kaninyo, pasidan-an ko kamo nga hununga kini. Hununga kini karon!
Ang Basahon ni Mormon nagtudlo nga tanang “tawo gitudloan sa igo nga sila masayud sa maayo gikan sa dautan” (2 Nephi 2:5). Kana naglakip kaninyo. Kamo nasayud kon unsa ang husto ug sayop. Pagmabinantayon nga dili mo mobuhat og sayop.
Bisan tuod kadaghanan sa mga sayop mahimong pribado nga ikumpisal sa Ginoo, adunay mga kalapasan nga labaw pa niana ang buhaton aron mapasaylo. Kon grabe ang inyong nahimong sayop, pakigkita sa inyong bishop. Kay kondili, ang ordinaryong pagkumpisal, hilom ug personal, mahimo. Apan hinumdumi, ang talagsaong kabuntagon sa pagpasaylo mahimong dili moabut dayon. Kon sa sugod kamo matumba, ayaw og hunong. Ang pagbuntog sa pagkawala sa kadasig kabahin sa pagsulay. Ayaw og hunong. Sama sa akong tambag kaniadto, kon kamo mikumpisal ug mibiya sa mga sala, ayaw na kini usaba.
Ang Manluluwas Miantos para sa Atong mga Sala
Ang Ginoo anaa kanunay. Iyang giantus ug gibayaran ang silot kon andam mo nga modawat Niya isip inyong Manunubos.
Isip mga mortal, kita mahimo, sa tinuoray dili, hingpit nga makasabut giunsa sa Manluluwas pagtuman sa Iyang maulaong sakripisyo. Apan sa karon ang giunsa dili ingon niana kaimportante sa rason sa Iyang pag-antus. Nganong Iya kining gibuhat para ninyo, para nako, para sa tanang katawhan? Iya kining gibuhat tungod sa gugma sa Dios nga Amahan ug sa tanang katawhan. “Walay bisan kinsa nga may gugma nga labaw pa niini, nga ang usa ka tawo magahalad sa iyang kinabuhi sa pagpakamatay alang sa iyang mga higala” (Juan 15:13).
Sa Getsemani, si Kristo mipalayo gikan sa Iyang mga Apostoles aron mag-ampo. Kon unsay nahitabo wala na sa atong gahum aron masayud! Apan kita nasayud nga Iyang natuman ang Pag-ula. Andam Niyang gidala ang mga sayop, sala ug kahasol sa konsensya, pagduha-duha ug kahadlok sa tibuok kalibutan. Siya nag-antus para kanato aron kita dili mag-antus. Daghang mga mortal nag-antus sa kasakit ug nakasinati og sakit, grabe nga kamatayon Apan ang Iyang paghingutas milabaw pa niining tanan.
Sa akong edad, akong nasayran kon unsa ang pisikal nga sakit, ug dili kini makalingaw! Walay makalingkawas niining kinabuhi nga walay makat-unan kon unsa ang pag-antus. Apan ang personal nga kasakit nga dili nako maagwanta mao nga akong masayran nga ako ang hinungdan sa pag-antus sa uban. Mao kini nga ako nakasabut og gamay sa paghingutas nga nasinati sa Manluluwas didto sa Tanaman sa Getsemani.
Ang Iyang pag-antus lahi kay sa ubang mga pag-antus kaniadto o sukad tungod kay Iyang gidala sa Iyang Kaugalingon ang tanang silot nga napahamtang sa tawhanong pamilya. Hunahunaa kana! Siya walay utang nga angay bayaran. Siya wala makasala. Bisan pa niana, ang sumada sa tanang kahasol sa konsensya, sa kasubo ug kaguol, sa kasakit ug pagpakaubos, tanang mga kasakit sa hunahuna, emosyonal, ug pisikal nga nahibaloan sa tawo—tanan kini Iyang nasinati. Adunay Usa lang diha sa talaan sa kasaysayan sa katawhan kinsa wala gyuy sala, kwalipikado nga manubag sa mga sala ug kalapasan sa tanang katawhan ug makalahutay sa sakit nga mabati sa pagbayad niini.
Iyang gihalad ang Iyang kinabuhi ug mahinungdanong miingon, “Ako mao ang nagpas-an ngari kanako sa mga sala sa kalibutan” (Mosiah 26:23). Siya gilansang; Siya namatay. Dili nila makuha ang Iyang kinabuhi gikan Kaniya. Siya miuyon nga mamatay.
Posible ang Hingpit nga Kapasayloan
Kon kamo nadagma o nahisalaag sa usa ka higayon, kon kamo mibati nga nabilanggo karon sa kaaway, kamo makapadayon uban sa hugot nga pagtuo ug dili na maglatagaw sa kalibutan. Adunay mga tawo nga andam mogiya kaninyo pabalik sa kalinaw ug kahilwasan. Gani ang grasya sa Dios, sama sa gisaad diha sa kasulatan, moabut “human sa tanan nga atong mabuhat” (2 Nephi 25:23). Ang kaposibilidad niini, para nako, mao ang kamatuoran nga angayang masayran.
Mosaad ko nga moabut ang maanindot nga kabuntagon sa kapasayloan. Dayon “ang kalinaw sa Dios, nga lapaw sa tanang pagpasabut” (Mga Taga-Filipos 4:7) moabut pag-usab sa inyong kinabuhi, usa ka butang sama sa sidlak sa adaw, ug kamo ug Siya “dili na gyud hinumduman ang [inyong] sala” (Jeremias 31:34). Unsaon ninyo sa pagkasayud? Inyong masayran! (Tan-awa sa Mosiah 4:1–3.)
Mao kini ang akong gusto nga itudlo niadtong naproblema. Siya motabang ug mosulbad sa problema nga dili ninyo masulbad, apan kinahanglan bayaran ninyo ang bili. Kini dili mahitabo kon dili kana buhaton. Siya buotan nga tigmando sa paagi nga Iyang gibayaran ang gikinahanglang bili, apan buot Niya ipabuhat kaninyo ang kinahanglan ninyong buhaton, bisan kon kini sakit.
Gihigugma ko ang Ginoo, ug gihigugma nako ang Amahan nga mipadala Kaniya. Ang atong mga palas-anon sa pagkawala sa kadasig, sala, ug kahasol sa konsensya mahalad diha Kaniya, ug sa Iyang maloloy-on nga sabut, ang tanang utang mamarkahan og “bayad na tanan.”
“Umari kamo karon, ug usahan ta paghusay, nag-ingon ang Ginoo: bisan pa ang inyong mga sala mapula, sila pagapution ingon sa nieve; bisan pa sila lubos mapula, sila mahimong sama sa maputing balhibo sa karnero.” Kana, mipadayon si Isaias, “kong kamo mobuot ug magmasinugtanon” (Isaias 1:18–19).
Duol Kaniya
Ang kasulatan nga “pagkat-on og kaalam diha sa imong kabatan-onan; oo, pagkat-on sa imong kabatan-on sa paghupot sa mga sugo sa Dios” (Alma 37:35) usa ka pagdapit nga inubanan og saad sa kalinaw ug proteksyon gikan sa kaaway. “Ayaw itugot nga adunay magatamay kanimo tungod sa imong kabatan-on; hinonoa alang sa mga magtotoo, pagkinabuhi ingon nga panig-ingnan sa sinultihan, ug sa paggawi, sa gugma, sa pagtoo, sa kaputli” (1 Timoteo 4:12).
Ayaw pagdahum nga sayon ra ang tanan sa inyong kinabuhi. Bisan gani niadtong nagkinabuhi kon unsay angay, usahay sukwahi ang mahitabo. Atubanga ang matag hagit sa kinabuhi uban sa pagkapositibo ug kasigurado, ug kamo makabaton og kalinaw ug pagtuo nga makapatunhay ninyo karon ug sa umaabut.
Alang niadtong wala pa makaangkon sa tanang panalangin nga gusto ninyong maangkon, nagtuo gyud ko nga walay kasinatian o oportunidad nga kinahanglanon aron matubos ug maluwas ang ihikaw kaninyo nga matinud-anong nagkinabuhi. Magpabiling takus; magmalaumon, magmapailubon, ug magmainampoon. Ang mga butang adunay pamaagi nga mamaayo ra. Ang gasa sa Espiritu Santo mogiya kaninyo ug modasig sa inyong mga lihok.
Kon kamo usa niadtong nanlimbasug sa kahasol sa konsensya, pagkawala sa kadasig, o depresyon isip resulta sa mga sayop nga inyong nabuhat o sa mga panalangin nga wala pa moabut, basaha ang makapasigurado nga mga pagtulun-an nga makita sa himno nga “Come unto Jesus”:
Duol kang Jesus, sa kalisdanan,
Kamong sa sala nabug-atan.
Siya mogiya kaninyos kadangpan
Ang mosalig maluwas.
Duol kang Jesus, naminaw Siya,
Kon sa kangitngit ka nasaag.
Giyahan ka sa Iya nga gugma
Paingon sa kahayag.
Duol kang Jesus; kadungog Siya,
Kon tinguhaon iyang gugma.
Sayri nga anghel nimo duol ra
Gikas mansyon sa taas?1
Ako moangkon, uban sa akong mga Kaigsoonan diha sa Apostoles, nga linain nga saksi ni Ginoong Jesukristo. Kana nga pagsaksi mamatud-an kada higayon nga akong mabati sa akong kaugalingon o sa uban ang makalimpyo nga epekto sa Iyang sagrado nga sakripisyo. Ang akong pagsaksi, ug sa akong Kaigsoonan, tinuod. Kami nakaila sa Ginoo. Dili siya estranghero ngadto sa Iyang mga propeta, tigpadayag, ug manalagna.
Ako nakasabut nga kamo dili hingpit, apan kamo nagsubay niana nga dalan. Pagbaton og kaisug. Hibaloi nga si bisan kinsa nga tawo nga adunay lawas adunay gahum ibabaw niadtong walay lawas.2 Gihikawan si Satanas sa usa ka lawas; mao nga kon mag-atubang kamo og mga tintasyon, hibaloi nga inyong mabuntog kadtong tanang mga tintasyon kon inyong gamiton ang kabubut-on nga gihatag ngadto ni Adan ug Eva sa tanaman ug gihatag niining kaliwatan.
Kon kamo molantaw sa unahan uban sa paglaum ug tinguha nga buhaton unsay gikinahanglan sa Ginoo nga inyong buhaton—mao ra kana ang gipaabut.