Lakaw uban sa Hugot nga Pagtuo
Ni Elder Anthony D. Perkins
Sa Seventy
Gikan sa usa ka debosyonal nga pakigpulong, “Nevertheless I Went Forth,” gihatag didto sa Brigham Young University niadtong Peb. 4, 2014. Alang sa kompleto nga teksto sa Iningles, bisitaha ang speeches.byu.edu.
Upat ka mga leksyon sa dinasig nga desisyon nga gihimo ni Nephi makapakunhod sa inyong kahadlok ug makadugang sa inyong pagsalig sa pagpadayon.
Detalye gikan sa Ang Espiritu sa Pag-ampo, ni Claudio Roberto Aquiar Ramires
Kamong mga young adult karon nagpuyo sa unsay gitawag nga “ang Dekada sa Pagdesisyon.” Naghimo kamo og daghan sa labing importante nga mga pagpili sa inyong kinabuhi, sama sa “pag-adto a templo, pagserbisyo og misyon, pag-eskwela, pagpili og trabaho, ug pagpili og kauban ug magpabugkos alang karon ug alang sa kahangturan diha sa balaan nga templo.”1
Ako mamulong ilabi na niadtong kinsa nanglimbasog sa usa o daghan niining importante nga mga desisyon—tingali ang uban dili makahimo sa pagpili tungod sa kahadlok nga makahimo og sayop nga desisyon o nagkinahanglan og tambag aron magpabilin nga masaligon sa usa ka desisyon nga gihimo sa una.
Upat ka mga leksyon sa dinasig nga desisyon nga gihimo ni Nephi, kon gamiton, makapakunhod sa inyong kahadlok ug makadugang sa inyong pagsalig sa pagpadayon.
1. Pagsunod sa mga kasugoan
Ang katapusang bersikulo sa sagradong rekord nga nag-summarize sa iyang kinabuhi: “Kay sa ingon ang Ginoo misugo kanako, ug ako kinahanglan gayud nga motuman” (2 Nephi 33:15).
Ang hugot nga pagtuo ug gugma ni Nephi alang sa Manluluwas makita sa iyang pagkamasulundon sa mga sugo sa Dios. Nag-ampo siya (tan-awa sa 1 Nephi 2:16). Mibasa siya sa mga kasulatan (tan-awa sa 1 Nephi 22:1). Nagtinguha ug nagsunod siya sa direksyon gikan sa buhi nga propeta (tan-awa sa 1 Nephi 16:23–24). Ang maong pagkamasulundon nakapahimo sa Espiritu Santo sa gamhanang paagi sa pag-uban ni Nephi sa iyang tibuok kinabuhi ug nakaangkon og padayon nga personal nga pagpadayag.
Kamo usab kinahanglang magpabilin nga duol sa Ginoo pinaagi sa pagtuman sa mga sugo sa Dios. Mopamatuod ko nga ang makanunayon nga pagkamasulundon sa gagmayng mga butang sama sa pagbasa sa mga kasulatan, pag-ampo kada adlaw, pagtambong sa mga miting sa Simbahan, pagpaminaw sa tambag sa buhi nga mga propeta, ug pagserbisyo sa uban makapahimo ninyong takus sa Espiritu—ug sa pagpadayag nga ikahatag niini.
Ang pagkahingpit dili kinahanglanon sa personal nga pagpadayag. Ang kinahanglanon mao ang adlaw-adlaw nga paghinulsol (tan-awa sa Mga Taga-Roma 3:23). Kon ang inyong paghinulsol sinsero ug kompleto (tan-awa sa D&P 58:42–43), ang makalimpyo nga gahum sa Pag-ula makaaghat sa Espiritu sa paggiya ninyo sa bug-at nga mga desisyon sa inyong kinabuhi.
2. Padayon uban sa Hugot nga Pagtuo
Ibutang ang inyong kaugalingon sa sitwasyon ni Nephi. Ang inyong amahan mosulti ninyo nga ang Ginoo misugo sa inyong pamilya sa pagbiya sa inyong bahandi ug moadto sa kamingawan. Gusto ba kamong masayud mahitungod sa inyong panaw ug destinasyon?
Nagtuo ko nga si Nephi nahimuot unta kon ang Ginoo klaro pang mipadayag sa iyang umaabut. Apan dili ingon niana maglihok ang Dios uban ni Nephi, ug dili ingon niana Siya maglihok uban ninyo.
Samtang ang pamilya ni Nephi nagpanaw sa kamingawan, ang mga instruksyon miabut kaniya lamang “matag karon ug unya” (1 Nephi 16:29; 18:1). Ang pagtan-aw sa panaw sa iyang kinabuhi uban sa kahibalo sa sinugdanan dili unta makahatag kaniya og mga kasinatian sa pagpaugnat sa kalag ug pagpalig-on sa pagtuo nga nakatabang niya nga mahimong mas sama ni Kristo.
Kon kamo naghulat sa Dios nga mopadayag unsa nga kurso ang kuhaon, kinsa ang minyoan, unsa nga trabaho ang dawaton, asa mopuyo, mopadayon ba sa graduate school, ug pila ka buok anak, tingali dili gayud kamo mobiya sa inyong apartment. Mopamatuod ko nga ang personal nga pagpadayag moabut lamang “matag karon ug unya.”
Ang atong Langitnong Amahan gusto nga kita motubo, ug kana naglakip sa pagpalambo sa atong abilidad sa pagtimbang-timbang sa mga kamatuoran, paghimo og paghukom, ug paghimo og mga desisyon. Apan midapit usab Siya nato sa pagdala sa atong mga desisyon ngadto Kaniya pinaagi sa pag-ampo (tan-awa sa D&P 9:7–9). Si Elder Richard G. Scott sa Korum sa Napulog Duha ka mga Apostoles: mitudlo nga ang mga tubag sa atong mga pag-ampo moabut “sa usa sa tulo ka mga paagi.”2
Nagkumpirmar nga Kasiguroan
“Una,” miingon si Elder Scott, “mobati ka og kalinaw, kahupayan, ug kasiguroan nga momatuod nga ang inyong desisyon husto.”3 Ang akong asawa, si Christy, ug ako nakakaplag nga ang kasiguroan alang sa makuyaw nga mga desisyon nga makaapekto sa kinabuhi makuha gikan sa mga kasulatan human sa pagsimba diha sa templo.
Pananglit, human sa pagpamalandong pag-ayo ug pag-ampo, nakahukom kami sa pagbiya sa among bag-ong gidamgo nga balay sa Texas, midawat sa pagbalhin sa trabaho, ug mibalhin uban sa unom ka gagmayng mga anak ngadto sa Bejing, China. Apan nagtinguha gayud kami alang sa espirituhanong kumpirmasyon sa maong dako nga desisyon. Balaan nga kasiguroan miabut namo—didto sa templo—samtang kami nagbasa niining mga pulong sa Doktrina ug mga Pakigsaad: “kini mao ang akong kabubut-on nga ikaw kinahanglan … [dili] ayaw pagpabilin sa daghan nga mga adlaw niini nga dapit; … ayaw paghunahuna sa imong kabtangan. Lakaw ngadto sa silangan nga bahin sa mga yuta” (D&P 66:5–7).
Ang tingog ni Jesukristo diha sa mga kasulatan, inubanan sa gamhanang mga pagbati gikan sa Espiritu Santo, nagkumpirmar nga ang among desisyon sa pagbalhin ngadto sa China sakto.
Makalibog nga mga Pagbati
Ang ikaduhang paagi nga ang Langitnong Amahan motubag og pag-ampo mao ang pinaagi sa “makalibog nga pagbati, kasamok sa hunahuna, nagpasabut nga ang imong pagpili sayop.”4
Human sa akong misyon sa Taiwan, naghunahuna ko nga ang international law nindot nga kurso nga pilion. Samtang si Christy ug ako naghunahuna nianang posible nga umaabut, nakasabut mi nga dugang lima ka tuig sa mahal nga edukasyon nagpaabut sa unahan.
Ang ekonomiya sa U.S. ubos sa grabe nga resisyon ug ang among kwarta limitado, mao nga nag-istoryahanay mi nga ang pag-apil sa Air Force ROTC maalamon nga pagpili aron makabayad sa akong pag-eskwela. Apan sa akong pagkuha sa gikinahanglan nga eksamin ug pagsulat sa papeles, dili namo mabati ang pagkakomportable sa paghimo niana nga pasalig. Walay kasamok sa hunahuna o dili maayo nga pagbati ang miabut—ang walay kalinaw lamang.
Dinasig kana nga ingon og dili resonable nga pinansyal nga desisyon, sa usa ka bahin, tungod kay usa unta ako ka terible nga abogado!
Balaang Pagsalig
Ang Dios motubag sa mga pag-ampo sa ikatulong paagi: walay tubag. “Kon kamo nagpuyo nga takus ug ang inyong pagpili uyon kanunay sa pagtulun-an sa Manluluwas ug kamo kinahanglan nga mobuhat,” miingon si Elder Scott “padayon uban sa pagsalig.”5
Ang katapusang pagsulay ni Nephi sa pagkuha sa tumbaga nga mga palid naghulagway unsaon nato sa pagpadayon uban sa balaan nga pagsalig. Siya mirekord:
“Ako giubanan sa Espiritu, wala masayud sa sinugdanan sa mga butang nga ako mobuhat.
“Bisan pa niana ako mipadayon” (1 Nephi 4:6–7).
Ang mga higayon moabut atol sa inyong dekada sa pagdesisyon nga kamo dili na makalangay-langay ug kinahanglang molihok. Nakat-unan nako nga, sama sa gitudlo ni Elder Dallin H. Oaks sa Korum sa Napulog Duha ka mga Apostoles, “makaangkon kita og mga aghat sa Espiritu kon nabuhat nato ang tanan nga atong mahimo, kon kita naningkamot ubos sa kainit sa adlaw kay sa paglingkod lang diha sa landong mag-ampo alang sa direksyon sa unang lakang nga himoon.”6
Sama ni Nephi, ang Espiritu sa tukma nga panahon mokumpirma o mopasidaan sa inyong napili nga dalan.
3. Pagpakabuhi Karon
Ang pasalig ni Nephi sa panaw ngadto sa gisaad nga yuta lahi kay sa iyang mga igsoong lalaki nga sila si Laman ug Lemuel. Mihimo sila og desisyon sa pag-adto, apan ang ilang mga kasingkasing wala gayud mobiya sa Jerusalem. Nag-ayo si Nephi sa naguba niyang pana sa pagpangayam og pagkaon ug nagmina og oro aron makahimo og barko samtang ang iyang igsoong mga lalaki nagpahayahay lang sa tolda.
Karon ang kalibutan adunay daghang mga Laman ug Lemuel. Apan ang Ginoo nagkinahanglan og mga lalaki ug mga babaye sama ni Nephi. Makasinati kamo og dakong kauswagan sa kinabuhi kon hingpit kamong mopasalig sa inyong mga desisyon ug maningkamot nga mouswag ang inyong kahimtang karon bisan samtang kamo nagplano sa kaugmaon.
Si Nephi mihimog panig-ingnan sa maalamong tambag ni Presidente Thomas S. Monson: “Ang pagdamgo sa nangagi ug pangindahay sa kaugmaon makahatag kanato og kahupayan apan dili kini makapuli sa pagpakabuhi sa karon. Mao kini ang adlaw sa atong oportunidad, ug kinahanglang atong pahimuslan.”7
4. Pagkuha og Kalig-on sa Uban
Bisan human kita nagtinguha sa Espiritu, padayon sa atong desisyon, ug mapasaligon ngadto niini, mga pagduha-duha moabut gihapon ug makapangutana kita sa atong desisyon. Sa maong sirkumstansya usa ka gisaligan nga sakop sa pamilya o higala makahatag og tambag ug kalig-on sa pagpadayon sa pagbuhat og matarung. Mosugyot ko nga sa iyang panaw, ang asawa ni Nephi mao ang iyang gisaligan.
Ang pagpasalamat alang sa asawa ni Nephi miabut nako samtang nagbisita sa Church History Museum. Nadani ko sa usa ka painting didto ni Nephi nga gihigot ngadto sa poste sa barko, nga nabasa tungod sa kusog nga unos.8
Sa tupad ni Nephi mao ang iyang asawa ug usa sa iyang mga anak. Nakasinati usab siya sa samang unos ug mga hagit sama ni Nephi, apan ang iyang mga mata mahagiton ug ang iyang kusgan nga mga bukton mapanalipdong giagbay sa iyang mga abaga. Nianang higayona nakaamgo ko nga ako usab gipanalanginan og maunungon nga kapikas nga naghatag og kalig-on sa mga panahon sa akong pagsulay. Nanghinaut ko nga ako dunay sama nga kalig-on ngadto kaniya.
Mga kaigsoonan, ang pagpreserbar ug pagpalambo sa espirituhanong kalig-on nga inyong naangkon (o angkunon pa) isip usa ka misyonaryo o sa ubang matarung nga pagserbisyo mao ang inyong labing importante nga hiyas aron mahimong gitinguha nga bana ug amahan. Mga sister, ang espirituhanong pagkasensitibo, hugot nga pagtuo, ug kaisug sa pagsunod ni Jesukristo mao ang inyong labing maayong mga hiyas isip asawa ug inahan.
Modapit ko ninyo nga mahimong matang sa tawo nga kakuhaan og maalamong tambag ug kalig-on sa karon o umaabut nga kapikas. Ang mahiyason nga lalaki ug takus nga babaye, nabugkos alang sa karon ug hangtud sa kahangturan sa templo, makaatubang sa malisud nga mga butang isip managsama nga magkauban.
Mosaad ko nga kon kamo mogamit sa mga leksyon nga nakat-unan gikan ni Nephi ug sa moderno nga mga propeta mahitungod sa paghimo og mga desisyon, kamo giyahan uban sa personal nga pagpadayag “matag karon ug unya.” Sa inyong pag-uswag subay sa inyong dekada sa pagdesisyon, hinaut nga kamo, sama sa gibuhat ni Nephi, adunay hugot nga pagtuo sa pag-ingon:
“Ako giubanan sa Espiritu, wala masayud sa sinugdanan sa mga butang nga ako mobuhat.
“Bisan pa niana ako mipadayon” (1 Nephi 4:6–7).