Sa VinakaTu

Era veikauwaitaki vakaiira na ivuvu se vakacava ga na ituvaki ni veimaliwai, bula vakailavo se vakapolitiki. Ena kena vakabera madaga na nodra toso ki liu, vakavu leqa, se baleta na solibula yadudua kei na cakacaka vakaukauwa, era veivukei vakaiira.

Ena noda vuravura vakatautaki ena rawaka kei na veitokoni, na inaki yadudua se vakailawalawa e dau uasivita na nodra kauwaitaki na tani se na vaqaqacotaki ni matanitu ni Kalou. Ena bula veimaliwai nikua, na kena rawati na veitakete tatadrataki e rawa ni dau vakayagataki me kilai kina na keda yaga.

Na tuvai kei na rawati na takete e rawa ni dua na ka totoka. Ia ena gauna e rawati kina na takete ena nodra vakatikitikitaki, guilecavi, se vakamositi na yalodra eso, e sa rui uasivi na isau ni kena rawati na takete oqori.

Era dau veirairaici na ivuvu ena nodra veiwasewase, ia era nanumi ira talega era muri tiko mai, era tea na kakana me baleti ira na lewe ni ilawalawa era muri tiko mai.

Era kila vinaka tu na kaukauwa ni matavuvale kei na itokani. Baleta ni ra vakanuinui tiko vei ira yadudua, era sa kaukauwa mai kina. Na itokani era sa wili me lewe ni matavuvale tale ga.

Nodra ivakaraitaki na ivuvu e ivakananumi vinaka vei keda me da toso tani mai na veitemaki ka tu tani voli, ka me da gole yani ka veivuke vei ira eso ka dau yalololoma ka lomani ira yadudua.

“Mai me da bau, ki lomalagi vou.”

Na qaqani sere oqo a yaco me sa sere ni matanitu kivei ira na vaqara vanua sa waloloi tu. E sa ka dredre me da vakasamataka na kaukauwa ni nodra cakacaka o ira na yalo cecere oqo. Na taubale e dua na ka rawarawa duadua era cakava. Era cakacakavata me rawa kina na kakana, vakavinakataki na nodra qiqi, qaravi na manumanu, qaravi ira na tauvimate kei na malumalumu, vakasaqaqara ka kumuni wai, ka taqomaki ira mai na veika rerevaki kei na dredre eso ena lekutu.

Era yadra ena veimataka ka ra kila vakamatata na nodra inaki kei na takete me ra: qarava na Kalou kei ira na wekadra ka me ra yaco yani ki na bucabuca e Salt Lake. E veisiga e matata vei ira na vei naki kei na takete; era kila na veika me ra vakayacora ka sa vakabetena na nodra toso ki liu ena veisiga.

Ena noda gauna—ni sa tu vakarawarawa na veika eda gadreva—eda temaki me da vuki tani se guce ni sa dredre mai na sala sa tu e liu se sa rui tubu tale vakasivia na cere e sa tu e matada. Ena veigauna vakaoqori, ena rawa ni veivakauqeti me da vakananumi ira na turaga, marama, kei ira na gone era sega ni vakatara na tauvimate, dredre, mosi, kei na mate me vakavuna na nodra vakasuka ena nodra salatu digitaki.

Era vulica na ivuvu na nodra cakava na veika dredre e vakatitobutaka ka vakaqaqacotaka na yagodra, vakasama, kei na yalodra; e vakalevutaka na nodra kila me baleta na kedra ituvaki vakalou; ka vakatubura na nodra yalololoma vakataki ira. Na ivakarau oqo e tudei kina na yalodra ka vakalougatataki ira ena veigauna kece sara ni sa mai cava na nodra taubale ena veibuca kei na cabe e veiulunivanua.

Ni ra lagasere na ivuvu, era lagata na ikatolu ni lesoni: “Oti na itavi ga.”

E sa dua dina na veidabui levu ena noda gauna ni da sa vakalougatataki tu ena levu na ka ia e da sega tu ni marau. Na idivi ni bula sautu kei na veika vakalivaliva e vakurabuitaki keda ka sovaraka mai na tataqomaki, veivakamarautaki, veivakalasami rawarawa, kei na veika veiganiti. Ia eda se raica wavoliti keda ga e levu sara na bula tawamarau.

Na ivuvu, ka ra soli bula taka e levu sara na ka, era lako voli ga ka walokaitaka na veika gadrevi rawarawa saraga me ra bula kina. Era kila vakamatata tu ni bula marau e sega ni yaco mai ena vatuka ni kalougata se vakacalaka. Ka na sega dina sara ni yaco mai ena veika taucoko eda vakanuinuitaka me yaco vakaidina. Na bula marau e sega ni yaco mai ena veika e yaco tiko ena taudaku ni noda ituvaki ni bula. E yaco mai loma—veitalia ga na ka e yaco wavoliti keda.

Era kila tu oqo o ira na ivuvu, ena yalo oqori era kunea kina na bula marau ena veituvaki kei na veika dredre kecega—vakakina ena veika dredre oya a tiko sobu ka vakaleqa na wai titobu ni nodra bula vakayalo.

E so na gauna eda railesuva na veika era vosota rawa na ivuvu ka da kaya, “Au sa vakavinavinaka saraga niu sega ni bula donuya na gauna oya.” Ia au diva vei ira na ivuvu yaloqaqa oqori, kevaka mera a rawa ni raici keda nikua, era na sega ni tukuna na kauwai vataga oya.

E dina ni sa veisau na gauna kei na ituvaki, na ivakavuvuli eso ni kena sotavi na dredre kei na rawati vinaka ni tiko vata vaka e dua na vanua vakaitikotiko sautu voli ena mata ni Kalou e sega ni veisau.

Sa rawa ni da vulica mai vei ira na ivuvu me tiko vei keda na vakabauta ka nuitaka na Kalou. E rawa ni da vulica me da yalololoma vei ira na tani. E rawa ni da vulica ni cakacaka kei na gugumatua e vakalougatataki keda sega ena bula vakayago walega ia ka vakayalo talega. E rawa ni da vulica ni bula marau e sa rawa ni noda se vakacava na keda ituvaki.

Na sala vinaka duadua eda rawa ni rokova ka vakaraitaka kina na noda vakavinavinaka vei ira na ivuvu sa ikoya na noda vakasotara vata ki na noda bula na yalo ni vakabauta na ivakaro ni Kalou, yalololoma kei na loloma vei ira na wekada, kei na gugumatua, kakavaki, kei na reki era vakaraitaka vakavinaka sara na ivuvu ena nodra bula.

NI da cakava vakakina, sa rawa ni da takosova yani na veitabagauna sa oti, taura vata na ligadra o ira na ivuvu rokovi, ka tomana na domoda vata kei ira ena noda lagata vata: “Ka Talei! Ka Talei!”